دھنک کے رنگ نہیں

اور پھر پھول اتنا رویا۔ اتنا رویا کہ اس کا کلیجہ پھٹ گیا۔ گھاس سر اٹھاکر بولی۔ ’’ارے بھائی تم روتے کیوں ہو؟ ابھی ابھی تو تمہارے منہ پر ہنسی آئی تھی کہ تم رونے بھی لگے؟‘‘ پھول نے مرتے مرتے جواب دیا۔ میں روتا ہوں اس لئے کہ دوسرے ہنس سکیں۔‘‘ اور پھول مر گیا۔

دوسرے دن ٹہنی پر گلابی کلیاں جھوم جھوم کر ہنس رہی تھیں۔ گھاس نے شرمندہ ہو کر سر جھکا لیا۔ میں کتنی نادان ہوں! اتنی سی بات میری سمجھ میں نہ آ سکی۔‘‘

ہم سب گھاس کی طرح نادان ہیں۔

(ایک جاپانی گیت)

رفیق میاں کندھے پر اچکن لٹکاکر باہر نکلے تو پیچھے سے حوری لپکی ہوئی آئی اور پردے کو اپنے جسم کو آس پاس لپیٹ کر، سر نکال کر بولی۔

’’اجی ماموں جان پاندان میں ڈالی نہیں ہے۔‘‘

رفیق میاں پلٹے۔ ’’نہیں ہے تو نہ رہے کون پان کھانے کا اتنا شوقین ہے؟‘‘

وہ پھر سے بولی۔ ’’امی جان کہتی ہیں، واپسی میں ضرور لائیےگا۔ ہاں اور وہ پانوں نچانے لگی۔

’’یہ تو بھئی خواہ مخواہ کے خرچے ہیں، بی بنو۔ بھلا۔‘‘

ابھی ان کی بات ان کے منہ ہی میں تھی کہ اچانک ان کی نگاہیں حوری کے تھرکتے پیروں سے جا ٹکرائیں۔

’’ارے؟‘‘

اچانک ان کے منہ سے نکلا۔ ان کی نگاہیں حوری کے پیروں سے چپک کر رہ گئیں۔

’’ارے یہ گلابی گرگابیاں؟‘‘ حوری نے اترا اترا کر پیر نچانے شروع کر دئیے۔ مخمل کی نازک نازک گلابی کا مدار گرگابیاں۔ جیسے دو مہکے مہکے گلاب حوری کے پیروں میں کھل اٹھے تھے۔ ان کا دل دھڑ، دھڑ، دھڑکا اور پھر وہ دل مزے سے حلق میں آکر جھولنے لگا۔ اماں تو بوڑھی ٹھہریں۔ وہ بھلا ایسی گرگابیاں پہننے لگیں؟ آپا بھی بے چاری بیوہ۔ سفید ساڑی کے سوا کبھی انھوں نے دوسرے رنگ کی ساڑی تک نہ پہنی، تو ایسی چمکتی دمکتی گرگابیاں وہ کہاں پہننے چلیں۔ وہ زہرہ دلہن۔ انھیں تو میں جانتا ہوں۔ ان کے پاس بھی ایسی گرگابیاں نہیں۔ پھر۔۔۔ پھر۔۔۔ انو میاں؟۔ انو میاں ٹھہرے مرد۔ وہ آخر ایسی رنگین، بھڑکیلی گرگابیاں کیسے پہن سکتے ہیں اور بچے تو بچے ہی ٹھہرے۔۔۔ پھر؟ ہو سکتا ہے آپا بی کے جہیز کی رکھی رکھائی ہوں اور حوری نے مارے اتراہٹ کے پہن لی ہوں۔ مگر آپابی کا سارا جہیز تو کبھی کا ختم ہو چکا ہے اور جو کبھی جہیز کی ہوتیں تو بھی اتنے دنوں تک ان کی چمک دمک ماند نہ پڑ جاتی؟ ہو سکتا ہے کہ حوری نے ہی خریدی ہوں۔ اچھا اگر حوری نے ہی خریدی ہیں تو یہ اس کے

پیروں سے اتنی بڑی کیوں ہیں کہ ایڑیاں تو اندر رہ گئی ہیں ا ور جوتی پیچھے سے باہر نکل گئی ہے۔‘‘

انھوں نے حیرت سے پھر حوری کے پیروں کو دیکھا۔ گرگابیاں تو اپنے منہ سے کچھ نہیں کہتیں۔ ان کے زبان نہیں ہوتی۔ پھر یہ کیسی گرگابیاں تھیں بھئی جو باقاعدہ پٹ پٹ باتیں کر رہی تھیں، چہک رہی تھیں اور رفیق میاں کو باقاعدہ مجبور کر رہی تھیں کہ وہ بھی چہکیں اور ان کے ساتھ باتیں کریں۔

بھلا آدم کے سنسان ویران، جنت کے باغ میں یہ کون سی حوا آ گئی ہے کہ سارے میں گلاب مہکنے لگے ہیں۔ وہ جھلا کر بولے۔ ’’ارے یہ کس کی گرگابیاں چڑھا رکھی ہیں؟ خراب ہو جائیں گی تو؟‘‘

حوری نے پردے میں پاؤں چھپانے کی کوشش کی۔ پھر چلبلا کر بولی۔ ’’ارے وہ خراب کاہے سے ہونے لگیں۔‘‘

’’اور جو تو مسلسل ناچے جا رہی ہے تو ایسی نازک گرگابیاں پھٹیں گی تھوڑے ہی۔‘‘

حوری کس قدر منہ پھٹ تھی۔ ’’شکو باجی کا درد آپ کو کیوں ہو رہا ہے۔ بھئی واہ جس کی چپلی وہ تو کچھ نہ کہے۔ تیسرا ہی دل اٹکاتا پھرے۔‘‘

شکو باجی؟ بالآخر وہ کھل کر پوچھ بیٹھے۔

’’وہی جو اندر بیٹھی ہیں۔ وہ دھانی رنگ کی ساڑی پہنے۔‘‘ وہ اک دم پردہ چھوڑ کر باہر لپک آئی۔ ’’قسم خدا کی ماموں جان۔ ان کا سارا بکس لال نیلے پیلے کپڑوں سے بھرا پڑا ہے اِتےّ پیارے پیارے رنگ کہ پوچھئے متی اور ایک چھوٹا بکسا ہے، جس میں ڈھیروں چوڑیاں ایک اور بکسا ہے جس میں ان گنت چپلیاں، ڈھیروں جوتیاں رنگ برنگی کہ نظر نہ ٹھہرے۔ ایک اور بکس ہے جس میں۔۔۔‘‘

’’انہوں ہوں۔ کیا بکواس لگا رکھی ہے۔ تجھ سے اتنی ساری تفصیل کس نے پوچھی تھی۔ اور یوں اچک اچک کر باتیں نہ بنا۔ کہیں آڑھا ترچھا پاؤں پڑ گیا تو گرگابی بے چاری ٹوٹ جائےگی۔ اتنی نازک جو ہے۔

’’تو کیا غضب ہو جائےگا خدا وندا۔ ڈھیروں تو جوتیاں ہیں۔ کچھ قحط تو نہ پڑ جائےگا۔‘‘

’’مگر دوسرے کی چیز لینا کچھ اچھا لگتا ہے۔‘‘ وہ اسے ذرا سی غیرت دلانے پر تلے ہوئے تھے۔

’’یہ دوسرا کیا ہوتا ہے جی میاں۔ میری پھوپھی ہی تو ہے اور بھلا پھوپھی کہیں غیر ہوتی ہے جی ماموں جان؟‘‘

رفیق میاں نے حیرت سے دیدے کھول کر پوچھا۔

’’تیری پھوپھی۔ تیری پھوپھی یعنی کہ اپنی آپا بی کی نند‘‘

’’ظاہر ہے۔‘‘ وہ انتہائی لاپروائی سے بولی۔

’’مگر میں نے تو آج تک نہیں دیکھا بھائی

حوری تنک کر بولی۔ ’’تو اس کا مطلب یہ کہاں نکلتا ہے کہ آپ نے نہیں دیکھا تو وہ میری پھوپھی نہیں ہوئیں۔‘‘

’’تو بڑی چربانک ہے لڑکی۔ یہ نہیں سوچتی کہ میں تیرا بڑا ماموں ہوں اور تو ایسی زبان چلاتی ہے۔‘‘

’’واہ بھئی واہ۔ میں نے ایسی کون سی بری بات کہی۔ اپنا دل صاف نہیں، اس لئے جناب نے لتاڑ بتائی۔ میں نے تو ذرا ہی زبان ہلائی تو مجھ پر الزام‘‘

رفیق میاں کو پہلی بات یاد آ گئی۔ تو آپ اسی لئے ڈلی منگوانے پر اصرار کر رہی تھیں کہ گھر میں مہمان آ گئے ہیں۔‘‘

’’ظاہر ہے۔‘‘ وہی لہجہ بےزاری بھرا۔

’’حوری۔۔۔ اے حوری۔ اری حور‘‘ اندر سے آپا بی کی آواز آئی۔ اور حوری پردے کو جھلاتی سپڑ سپڑ اندر کو بھاگ گئی۔

نرم نرم گلابی گلابی گر گابیاں اس کے پیروں تلے کس بری طرح رگڑے کھا رہی تھیں۔ رفیق میاں جھلا گئے، ’’اری کمبخت۔۔۔‘‘

کوئی آدھ پون گھنٹے بعد رفیق میاں باہر سے واپس آئے تو اپنے کمرے میں پہنچ گئے مگر ہمیشہ کی طرح انھوں نے پلنگ پر پڑ کر تھکی ہاری سانس نہیں لی۔ بلکہ اچکن کو ٹانگ کر وہ دھیرے دھیرے گنگنانے لگے۔ پیروں کی چاپ سن کر حوری پھر جان کھانے کو آموجود ہوئی تھی۔ آتے ہی تنک کر بولی۔ ’’ڈلی آئی یا نہیں؟‘‘

رفیق میاں نے خوشی خوشی اس کا ہاتھ پکڑ لیا۔

’’آج بہت اترا رہی ہے ری اور جود و چانٹے جڑ ہی دوں تو۔‘‘

حوری شرارت اور گستاخی سے بولی ’’اور میرے پیر تو غالباً جناب نے دیکھے ہی نہیں۔‘‘

’’اچھا۔! وہ بناوٹی غصے سے بولے۔‘‘ تو مطلب یہ ہے کہ آپ ان چپلیوں سے ہماری خبر لیں گی نا؟

حوری کھی کھی کر کے ہنسنے لگی۔ ’’اچھا لائیے چھالیہ تو دے دیجئے۔‘‘ وہ ہاتھ پھیلا کر کھڑی ہو گئی۔

’’تو چل۔ میں خود ہی لئے آتا ہوں۔‘‘ اور وہ پلنگ کے نیچے جوتے ٹٹولنے لگے۔ آگے آگے حوری تھی اور گلابی مخملیں گر گابیوں کی ہلکی ہلکی دپ۔ دپ اور پیچھے پیچھے رفیق میاں تھے اور تازہ تازہ گلابوں کی مہک۔ حوری پردہ اٹھا کر اندر کہیں غائب ہو گئی تھی۔ سامنے باورچی خانے سے دھواں اٹھ رہا تھا۔ اماں ہانڈی بھون رہی تھیں۔ رفیق میاں آگے بڑھ گئے۔

پرلے دالان میں انو میاں کی بیوی بیٹھی اپنے بچے کو دودھ پلا رہی تھیں وہ مایوسی سے اور آگے بڑھ گئے۔ سامنے والے کمرے میں حوری کی اسلم سے چھین جھپٹ جاری ہو چکی تھی۔ شائد گڑیا کی چوٹی کھینچے جانے کا سا کوئی سنگین معاملہ پیش تھا۔ انھوں نے زور سے چھالیہ کی پڑیاتخت پر پٹخ دی اور اماں سے بولے۔

’’یہ چھالیہ کی پڑیا یہاں رکھ رہا ہوں۔ پاندان جانے کدھر پڑا ہے۔ ورنہ میں خود ہی کلیا میں ڈال دیتا۔‘‘

کونے والے کمرے میں جہاں سبز پردہ جھول رہ اتھا، ہلکی سی گڑ گڑاہٹ ہوئی اور اک دم رفیق میاں چکرا کر رہ گئے۔

دھنک کے رنگ۔

قوس قزح کی رنگینیاں۔۔۔

دھیرے سے پاندان تخت پر رکھ کر وہ بولی۔

’’امی پان کھا رہی تھیں۔ معاف کیجئے آپ کو تکلیف ہوئی۔‘‘

نہ پھول مہکے نہ کھلیان چٹکیں، نہ ہوائیں چلیں، نہ بادل جھومے۔ بس آپ ہی آپ بہار سی چھا گئی، جیسے سارے میں دھنک کے رنگ ہی رنگ بکھرگئے۔ رنگ جو بہاروں اور خوشیوں سے عبارت تھے۔

ہرا آنچل پاندان کے کونے سے اٹک گیا۔ تو وہ ذرا کی ذرا رُکی، مڑی اور ہلکی سی ’’اونہہ‘‘ کے ساتھ آنچل چھڑا کر اندر چلی گئی اور تو کچھ نہیں لیکن اس کی مخمل والی گلابی گلابی ایڑیاں وہیں رہ گئیں جو اتنی تازہ، اتنی نازک تھیں۔ جیسے گلاب کی کچی کلیاں۔ قسم خدا کی، یہ پانوں نہیں یہ گلاب ہیں۔ رفیق میاں نے اپنے ہونٹوں پر ہاتھ رکھ لئے، کہیں دل کی بات زبان نہ کہنے لگے اور جو زبان کہہ دے تو کان نہ سن لیں۔ تو یہ بات کھل جائےگی کہ دیکھو بھائی یہ رفیق میاں تو محبت کرنے لگے ہیں!

اب جب کبھی اندر سے پانوں کی گلوریاں باہر بھجوائی جاتیں تو رفیق میاں کو ان پانوں سے صفا گلابوں کی خوشبو آتی اور وہ حوری سے پوچھتے۔ ’’ہاں حوری یہ پان کس نے بنائے ہیں؟‘‘

’’شکو باجی نے۔‘‘

’’کس نے؟‘‘ وہ جان کر دوبارہ پوچھتے۔

حوری چڑ جاتی۔ ’’شکو باجی نے۔ شکو باجی نے۔ شکو باجی نے۔ اب سن لیا یا نہیں؟‘‘

’’ارے یہ تمہاری شکو باجی بڑھیا کی طرح دن رات پان ہی چباتی رہتی ہیں کیا؟‘‘ وہ شرارت سے پوچھتے۔

’’ہش۔‘‘ وہ ناک سکوڑ کر کہتی۔ انھیں پان کھانے کی کیا غرض پڑی ہے، ان کے ہونٹ تو خود ایسے سرخ ہیں کہ بس۔‘‘

’’ہم کو کیا پتہ۔ لیکن یہ آپ کو شکو باجی سے کیا لینا ہے جی۔ وہ بھلے سے پان کھائی چھالیہ کھائیں آپ سے مطلب؟‘‘

رفیق میاں جھٹ سے بات کا رخ پھیر دیتے، جو حوری سی طرار لڑکی بات چھوڑ دے تو سارے میں اودھم مچ جائےگی اور یہ گلوریاں تو دن بھر میں کم سے کم چار پانچ بار چلی آتی تھیں کمبخت۔ ورنہ اماں جی کے ہاتھوں تو نہ کبھی پان ہی ملا نہ پان کی طلب کبھی محسوس ہوئی۔ اب تو جب دیکھو تب رفیق میاں کی چونچ لال ہے اور وقت بے وقت حوری سے فرمائش کئے جا رہے ہیں۔

’’اری حوری ذرا پان تو بنوا لائیو۔‘‘

’’ابھی ابھی تو پان کھایا تھا ماموں جان آپ نے۔ ہوا کیا ہے آپ کو؟‘‘

وہ چونک جاتے۔

’’واقعی مجھے کیا ہوا ہے؟ کیا ہو رہا ہے؟

کوئی ہفتہ بھر بعد کی بات ہے رفیق میاں مردانے میں بیٹھے کچھ کاغذات الٹ پلٹ کر رہے تھے کہ پردہ اٹھا کر اماں اندر آ گئیں۔

’’کیا بات ہے اماں؟‘‘ انھوں نے اپنا ہاتھ روک کر ماں سے پوچھا۔

اماں گھٹنوں پر ہاتھ رکھ کر دیوار کے کنارے لگ کر بیٹھ گئیں۔ ’’تیری آپا بی کی نند اور ساس آئی ہوئی ہیں۔‘‘ انھوں نے اپنے طور پر گویا بہت بڑی اور نئی خبر سنائی۔‘‘

’’انھیں تو آئے بھی غالباً چار چھ دن ہو گئے ہیں نا۔‘‘

وہ لاپروائی سے بولے۔ اماں چپ رہ گئیں۔ بیٹے نے ماں کو چورنگا ہوں سے دیکھا اور گلا صاف کر کے بولے۔ ’’آپ کچھ خاموش خاموش نظر آ رہی ہیں اماں۔ کیا بات؟‘‘

’’نہیں تو۔‘‘ اماں نے خواہ مخواہ کی ہنسی چہرے پر لانی چاہی۔ تجھے وہم ہو رہا ہے۔

’’آپ کو قسم ہے اماں جو آپ نے مجھ سے کوئی بات چھپائی۔ ورنہ میں سمجھ لوں گا کہ آپ کو مجھ سے محبت نہیں ہے۔‘‘

’’اے واہ میاں۔ کیسی بات کرتا ہے۔ بھلا تجھ سے محبت نہ ہوگی تو پھر کس سے ہوگی۔ اللہ کے بعد تو ہی تو میرا پہلا اور آخری سہارا ہے۔‘‘ اماں کا جی کلپ اٹھا۔ آنکھیں بھیگ گئیں‘‘ اور یوں بھر پور جوانی میں تجھ پر بڑھاپا آیا تو کس کے کارن‘‘؟ انھوں نے رفیق میاں کے سر پر ہاتھ رکھ دیا۔ جس میں اکا دکا سفید بال جھلک رہا تھا۔

’’اونہہ۔‘‘ رفیق میاں نے پیار سے اماں کا ہاتھ جھٹک دیا۔‘‘ میں نے ایسا کیا کر دیا ہے آپ کے لئے جو آپ بار بار یاد دلاتی رہتی ہیں۔ میرا تو جی چاہتا ہے اماں کہ اللہ مجھے ہزار جنم دے اور میں ہر جنم آپ پر اور بھائی بہنوں پر یوں ہی وارتا جاؤں۔‘‘

بس بس۔۔۔ اماں نے منہ میں پلو ٹھونس لیا۔ اب ایسا نہ کہہ میرے بچے۔ تیرے پاؤں پڑتی ہوں۔ میراجی کیسے کیسے کٹتا ہے کہ تو نے ہماری خاطر، میری خاطر، ان بچوں اور اس گھر کی خاطر کیسا سنجوگ لے لیا۔ آج کو تیرا بھی گھر ہوتا، تیری بھی دلہن ہوتی، تیرے بھی بال بچے، تیرے بھی جی کو ٹھنڈک پہنچتی مگر۔۔۔‘‘

’’اف، اماں بی تو ہوا ہی کیا۔ آپ کیوں یوں دل کو جلا رہی ہیں۔ کیا مجھے کسی نے منع کیا تھا؟ کیا کسی نے میرا ہاتھ روکا تھا؟

’’وہی تو میں بھی کہتی ہوں۔‘‘ وہ آنسو پونچھتی پونچھتی بولیں۔‘‘ اگر آج کو تیرے سر اتنی ذمہ داریاں نہ ہوتیں تو کیا تو یوں ہی اکیلا پڑا رہتا؟ اب تو میراجی رہ رہ کر یہ کہتا ہے کہ۔۔۔‘‘ آنسو ان کا گلا دبوچے لے رہے تھے۔

رفیق میاں نے ہنس کر بات کاٹی۔ ’’افوہ اماں ان سب باتوں کا بھلا یہ کون سا موقع ہے؟ اچھا بتائیے۔‘‘ وہ خوش دلی کا مظاہرہ کرتے ہوئے بولے۔ ’’آپ میرے پاس کس کام سے آئی تھیں۔‘‘

اماں نے دوپٹے سے اپنی آنکھیں صاف کرکے کہا۔ ’’بیٹا مہمان گھر آئے ہوئے ہیں، گھی ختم ہو چکا ہے۔ پراٹھوں اور انڈوں کے لئے تو گھی ہونا ہی چاہئے۔۔۔ ذرا سا تھا تو اتنے دن چل گیا۔ اب تو ڈول خالی پڑا ہے۔‘‘

’’کوئی بات نہیں میں منگوا دوں گا۔ اتنی سی باتوں کے لئے آپ یوں پریشان کیوں ہوتی ہیں اماں؟‘‘

’’اتنی سی بات؟‘‘ اماں الجھ کر بولیں۔ ’’کیا تیرے قدموں تلے گنگا بہہ رہی ہے جو اتنی سی بات ہے یہ۔ اور ماشاء اللہ سے کھانے کے لئے تو پورا گھر بھرا پڑا ہے۔ بھائی، بھاوج، تین بچے۔۔۔‘‘

’’اماں۔ اماں۔‘‘ وہ ماں کے لہجے کو دھیما کروانے کے لئے خود بھی دبے دبے بولنے لگے۔

’’آپ ذرا چپ رہا کیجئے۔ انو کو بار بار الاہنے نہ دیا کیجئے۔ بدک گیا تو گھر چھوڑ کر چلا جائیگا‘‘

’’جاتا ہے تو سو بار جائے۔ ہمارا کیا لے جائےگا؟‘‘

’’ہمارا چین، سکون لے جائے گا۔‘‘ رفیق میاں کھوئے کھوئے لہجے میں درد سے بولے۔۔۔ ’’آپ بھول گئیں وہ ابا میاں کا کتنا دلار ا تھا اور ابا میاں نے مرتے مرتے آپ سے کہا بھی تو تھا کہ بیگم، انو اور کوئی نہیں، میرا ہی دوسرا روپ ہے۔ اور ابا میاں نے مجھ سے بھی تو کہا تھا نا اماں، کہ رفیق بیٹے میرے بعد اور کون ہوگا جو اس گھر کو دیکھے۔ تم سے مجھے بہت ساری امیدیں ہیں۔ میرے پیچھے تم سا بیٹا ہو تو قبر میں بھی چین ہی چین ہے۔ آپ انو کو دکھ دیں گی تو ابا میاں کی روح کہاں چین پائےگی۔‘‘

تمہاری شہ پاکر ہی وہ اتنا غیر ذمےدار اور لاپروا ہو گیا ہے، ورنہ کس نے دیکھا ہے کہ جوان جو روکا مرد اور اتنے سارے بچوں کا باپ، یو گھر زندگی اور پیسے خرچے سے بیگانہ رہے کہ پھوٹی کوڑی دینے کا روادار نہیں رہے۔ الٹے دھونس جماتا پھرے۔‘‘

’’سنبھل جائےگا اماں۔ آخر عمر ہی کیا ہے۔‘‘

’’یہ لو اور سنو۔ ڈھیر سے بچوں کا باپ ہے اور کیا عمر ہونی چاہیئے۔‘‘

’’ایسا چھوٹا دل بھی نہیں کرنا چاہئیے اماں۔ اوپر والا دیتا ہے، ہم کسی کو کھلانے کا دعویٰ کر سکتے ہیں بھلا! سب اللہ کی دین ہے۔‘‘

’’وہ تو ٹھیک ہے بیٹا کہ اللہ کی دین ہے، لیکن اللہ بھی کب تک دےگا۔ دےگا۔ دےگا، پھر ہاتھ سمیٹ لےگا۔‘‘

’’ارے واہ اماں یہ کیسے ممکن ہے بھلا۔ بھولے بھٹکے دو چار مقدمے تو مہینے بھر میں مل ہی جاتے ہیں۔‘‘

’’اور کھانے والے جو گاڑی بھر ہیں؟‘‘ اماں تلخی سے بولیں۔ رفیق میاں نے جان کر بات کا رخ موڑ دیا۔

’’اچھا تو اماں میں صبح ہی باقر کو بھجوا کر گھی منگوادوں گا۔ کسی اور چیز کی ضرورت ہو تو مجھ سے کہلوا دیجئےگا۔‘‘

ماں کی آنسو بھری آنکھیں وہ بھول نہ سکے رہ رہ کر انھیں ان جھریوں بھرے چہرے کا خیال آتا رہا۔ جس پر آنسو آڑی ٹیڑھی ترچھی لکیریں بناتے ہوئے بہے جا رہے تھے اور کیا اماں بی کا رونا غلط تھا۔ دکھوں سکھوں سے پالی گئی اولاد کا کون سکھ نہیں چاہتا۔ کس ماں کا دل گردہ ہے کہ جاں جوان اولاد کو کنوار پن کی تنہائیاں بھوگتے دیکھے۔ نصیبوں کے ستم تو دیکھو کہ پھول کو بھی ہاتھ لگایا تو وہ کانٹا ہو گیا۔ ماں باپ کے گھر کوئی ہن تو برستا نہ تھا۔ جیسا میکہ ویسی ہی سسرال ملی۔ مگر اللہ نے آل اولاد سے خوش رکھا۔ ایک بیٹی اور دو بیٹے ہوئے اب اور کیا چاہئیے تھا۔ روکھی سوکھی سے، ہنسی خوشی سے بسر ہوتی تھی۔ بیتی عمر کے سترہویں، اٹھارہویں میں آئی تو ماں باپ نے اچھی جگہ دیکھ کر سرکا بوجھ اٹھا دیا۔ مگر قسمت کی ہٹی تھی کہ بھر ی جوانی میں رنڈاپے نے آ گھیرا۔ اوپر تلے چار بیٹے ہوئے۔ حوری باپ کی موت کے کوئی چھ سات ماہ بعد پیدا ہوئی۔

عورت کا سارا دم خم مرد کے دم سے ہوتا ہے۔ مرد ہی چھوڑ جائے تو کون اس کو پوچھے۔ کون اس کی عزت کرے۔ باپ اور بھائی نہیں چاہتے تھے کہ غریبی سے سہی، مگر نازوں لاڈوں کی پالی کو سسرال میں یونہی چھوڑ دیں۔ سسرال والے بھلے سے لاکھ نانا کرتے رہے مگر انھوں نے بیٹی کو گھر بلا ہی لیا۔ یہ پھر بھی اپنا ہی گھر تھا۔ برے بھلے کی کیا بات تھی۔ جو یہ کھاتے وہی کچھ وہ بھی کھاتی۔ جو یہ پہنتے وہی کچھ وہ بھی پہنتی۔ یہ تو نہ تھا کہ عمر بھر سسرالیوں کی جھیڑ جھیڑ پیڑ پیڑ سنا کرتی۔ چار دن تو ہر کوئی اوپر اوپر کرتا ہے اور پھر بات بات میں گوسے نکال کر موت میں ڈالنا شروع کر دیتے ہیں۔ ایسے سے میکہ کیا برا ہوتا ہے۔

جانے کون سا الو گھر پکار گیا تھا کہ ایک سے ایک مصیبت ٹوٹتی گئی۔ دن نہ گزرے تھے کہ باپ بھی چلتے ہوئے۔ دو دو بیوائیں اور ان کے چھوٹے چھوٹے بچے۔ جو کچھ بڑا پن تھا وہ رفیق میاں ہی میں تھا۔ پڑھائی جاری تھی مگر اب ساری ذمہ داری انھیں کے سر آ پڑی۔ ماں نے پھر بھی اپنے اتنے حواس نہ کھوئے کہ بیٹے کی پڑھائی ہی ختم کروادیتیں۔ پاس کا زیور، برتن بھانڈے کام آتے رہے۔ رفیق میاں کو وکالت کی ڈگری مل گئی۔ یہ تو ہوا کہ منہ بھگونے کو کوئی آسرا تو ہوا، ورنہ چھوٹے انو میاں تو بچپن ہی سے ماں باپ کے لاڈلے تھے۔ اب ان سے کیا آس تھی۔ ان کی اور رفیق میاں کی عمروں میں فرق بھی تھا۔ باپ بیٹے جیسا نہ سہی، مگر گنے جاتے یہ باپ ہی سے۔ وہ بھلا دیتے کیا اور یہ لیتے کیا؟ بلکہ خود ہی چار آٹھ آنے کے لئے بھائی اور ماں کے آگے ہاتھ پھیلایا کرتے۔ ایسے میں وہ کسی کے پھیلے ہوئے ہاتھ میں کیا رکھ سکتے تھے۔ دسویں کے بعد تو ان کی پڑھائی کا سلسلہ بھی ٹوٹ گیا۔ بھائی نے لاکھ چاہا کہ پڑھ لکھ کر ڈاکٹر بن جائے مگر شائد ان کے مقدر ہی میں کسی کے زخموں پر مرہم رکھنا نہ لکھا تھا تو وہ کرتے بھی تو کیا کرتے؟

یونہی برس گزر گئے۔ زندگی اس قدر سپاٹ تھی کہ کوئی اونچ نہ نیچ۔ اس قدر ویران تھی کہ رنگ نہ بو۔ آخر ماؤں کے جی میں بھی ارمان ہوتے ہیں۔ اماں بی ایسی کون سی انوکھی تھیں اور بڑے بیٹے کی موجودگی میں آخر کو بول ہی اٹھیں۔

’’اللہ نے جیسی بھی گزار دی۔ اس کا شکوہ کس سے کیا کریں۔ ہم سے بھی گئے گزرے لوگ اس دنیا میں موجود ہیں۔ مگر میاں اب تو یہی جی چاہتا ہے کہ میرے بھی آنگن میں بہو پازیب چھنکاتی پھرتی۔ اس سے پہلے بھی اماں نے ہزار بار کہا ہوگا۔ مگر بیٹے ٹال ٹال گئے جس پر اتنی ذمہ داریاں ہوں، وہ کیا گھر بسائےگا۔

’’میری سمجھ میں نہیں آتا کہ پھر آپ دیر کیوں کر رہی ہیں، سوچ کیا رہی ہیں۔ آخر کر کیوں نہیں ڈالتیں ایک ہنگامہ۔ لے آئیے دلہن بھی۔‘‘

اماں کی آنکھیں چمک اٹھیں۔‘‘ کلموہنے۔ اتنے دنوں سے پھر منہ کیوں سیئے بیٹھا تھا۔ آج کو چار چار پوتے گھر بھر میں ادھم مچاتے لوٹتے پھرتے۔‘‘

’’پوتوں کا کیا ہے۔ آج بہو لے آئیے، چند ہی سالوں میں پوتے پوتیوں سے آنگن بھر جائیگا۔‘‘ وہ ہنسے۔ ’’مگر آپ نے کوئی ڈھنگ کی لڑکی بھی دیکھی ہے۔‘‘

’’تو تو کان ہی نہیں دیتا پھر لڑکی دیکھ کر میں کرتی بھی کیا۔ اب تو نے حامی بھر لی ہے، تو سمجھ میں نے لڑکی بھی دیک لی۔‘‘ وہ خوشی خوشی بولیں۔

رفیق میاں کچھ سمجھ کر چکرائے۔ ’’مگر امان میں تو انور میاں کی شادی کے بارے میں کہہ رہا ہوں۔‘‘

’’کیا کہا۔‘‘ اماں ان کی آنکھوں میں جھانکتی ہوئی بولیں۔ ’’انو کی شادی ہوگی اور تو یوں ہی سانڈ بنا گھومتا رہےگا۔‘‘

’’اماں۔‘‘ وہ ایک ٹھنڈی سانس بھر کر سنجیدگی سے بولے۔‘‘ میرے حالات ایسے نہیں ہیں اماں کہ میں شادی کرنے کے بارے میں سوچ بھی سکوں۔‘‘

’’اوئی میں بھی تو سنوں کہ وہ کون سے حالات ہیں جو تیری شادی میں پتھر روڑے اٹکا رہے ہیں؟‘‘

’’اماں میری حالت اس ستون کی سی ہے جو ساری چھت کو سنبھالے رہتا ہے۔ ستون ذرا بھی اپنی جگہ سے ہلا کہ ساری عمارت نیچے۔ میں ایسی نا سمجھی کی حرکت کبھی نہیں کر سکتا۔‘‘

’’عقل والے ستون کوہلنے بھی نہیں دیتے۔ قدم جمائے کھڑے رہتے ہیں۔ تجھے خود بھروسہ نہیں۔‘‘

’’ہاں اماں۔ مجھے کھلے لفظوں میں اقرار کرنے دیجئے کہ خود مجھے ہی اپنی ذات پر بھروسہ نہیں۔ مجھے اتنے سارے مرحلے طے کرنے ہیں اگر کوئی ایسی ویسی جورو مل گئی جس نے گھر والوں میں پھوٹ ڈالوا دی تو میں آپ کو کیا منہ دکھاؤں گا۔ یہ سارے لوگ کدھر بھٹکیں گے۔‘‘

’’اے چل میاں۔ عورت پاؤں کی جوتی ہوتی ہے، اس سے اتنا بھی کیا دینا۔‘‘

’’نہیں اماں۔ آپ عورت ہو کر عورت ذات کی بے حرمتی نہ کیجئے۔ عورت تو سرکا تاج ہوتی ہے، وہ ہر روپ میں قابل عقیدت ہوتی ہے۔ میں خود کو بہت کمزور پاتا ہوں، مجھ میں اتنی، ہمت نہیں کہ سرکے تاج کو ٹھوکر لگا سکوں۔‘‘

’’تو کیا تو اب شادی کرےگا ہی نہیں؟‘‘

وہ ہنسنے لگے۔ تو اماں کہنے لگیں۔ ’’تیری باتوں سے تو یہی لگتا ہے مجھے۔‘‘

’’جی نہیں اماں، اس کا یہ مطلب تو نہیں نکلتا۔ میں شادی کروں گا ضرور۔ مگر ابھی نہیں۔ کچھ دن ٹھہر کر، جب حالات ذرا سدھر جائیں گے۔ دیکھئے نا اماں آپا جی کے بچے ہیں۔ ان کے آگے پیچھے کوئی نہیں۔ اتنے ساروں کی لکھائی پڑھائی، پرورش، تعلیم، تربیت پہننا اوڑھنا، پھر انو ہے۔ اس کی شادی بیاہ۔ اس کے بچے ہوں گے، پھر گھرداری۔ کتنی ساری الجھنیں اور بکھیڑے ہیں اور۔۔۔‘‘

اماں بات کاٹ کر بولیں۔ ’’ارے پگلے تجھے یہ بھی نہیں معلوم کہ اپنی الجھنو اور بکھیڑوں کو بانٹنے والا بھی کوئی ہونا چاہئیے۔ مرد تھکا ہارا ہو، پریشان ہو، غم نصیب ہو، تو کوئی تو ہاتھ ایسا ہو جو ممتا کی سی محبت سے اس دکھی دل کو سنبھال لے۔‘‘

’’آپ جو ہیں۔‘‘

’’ماں ماں ہے بیٹا۔ بیوی بیوی ہوتی ہے۔‘‘

’’میں اس بات کو نہیں مانتا اماں۔ عورت بہر حال عورت ہے۔ جو ہر حال میں، ہر روپ میں محبت ہی تو دیتی ہے۔‘‘

آدم اور حوا کا حوالہ دیتے ہوئے اماں صاف صاف بے تکے پن پر اتر آئیں۔

’’وہ۔۔۔ وہ اماں۔ ’’بیٹے گھبرا گئے۔‘‘ بات ایسی ہے کہ شائد آپ بھی ٹھیک ہی کہتی ہوں لیکن اماں اصل بات یہ ہے کہ اف۔۔۔ آپ میرا مطلب تو سمجھتی نہیں ہیں میں نے کبھی آپ کا حکم ماننے سے انکار کیا ہے؟ یہ تو مجبوری کی بات ہے اماں اور آپ خود جانتی ہیں اور بوجھتی ہیں کہ میں شادی کر لوں چار دن میں بال بچہ ہوگا۔ اپنی بیوی اپنے بچوں اور اپنے گھر گرہستی میں گھر کر بس یہی سوچا کروں گانا کہ میں اپنوں کا منہ مار کر دوسروں کا منہ کیوں بھروں۔ کیوں ان کی حق تلفی کروں آخر اپنی زندگی بھی میرے سامنے ہے۔ دوسرے خود کمائیں خود کھائیں، میں کیوں ان کا ساتھ دوں۔ کیا میں اکیلا کمانے کے لئے رہ گیا ہوں؟ انو تو خیر مرد ہے کچھ نہ کچھ کر ہی لےگا۔ لیکن آپا جی کدھر ٹھوکریں کھاتی پھریں گی۔ پانچ بچوں کا ساتھ، چار دن میں لڑکی جوان ہو جائےگی۔ پھر کیا ہوگا یہ ظاہر ہے کہ ہانڈی ڈوئی آپس میں کھڑ کھڑائیں گی ضرور ہی دو بہوئیں ہوں گی۔ دو بیٹے۔ دن گزریں گے تو دانتا کلکل شروع ہو جائےگی۔ ہمارا کیا ہے مگر کچلن میں کون آئےگا؟ آپا جی اور اماں بی۔! میرا تو کچھ نہیں جائےگا! اچھا بتائیے آپ نے میرے لئے کون سی لڑکی ڈھونڈی اور پسند کی ہے۔ میں کیوں یہ گناہ مول لوں کہ بڑھاپے میں ایسی محبت والی ماں کا دل دکھایا؟‘‘

اماں نے غور سے بیٹے کی صورت دیکھی۔ کتنی سچی باتیں اس نے کہیں۔ وہی تو اس گھر کا کرتا دھرتا ہے۔ وہی منہ پھیرے تو کس پہ کیا گزرے، کون جانے۔ یہاں تو سارا ہی کچا آوا تھا۔ اور پھر یہ تو دنیا میں ہوتی آئی ہے کہ شادی کے بعد مرد کا دل اس کے اپنے بس میں نہیں رہ جاتا ایسی کٹھ پتلی بن جاتا ہے جس کی ڈور کسی اور کے ہاتھ میں ہوتی ہے کہ جیسا نچائے ویسا ہی ناچے۔ بیٹے نے ماں کو کچھ اس طرح قائل کیا کہ پھر آگے منہ ہلانے کی ہمت ہی نہیں پڑی۔ جی بہلانے کو آپا بی کے بچے تھے۔ بڑے بڑے بھی تے تو کیا ہوا؟ تھے تو بچے ہی۔ ہاں یہ ضرور تھا کہ گھر میں بیواؤں کا راج تھا۔ پائل کی چھنک اور چوڑیوں کھنک مدت ہوئی اس گھر سے رخصت ہو چکی تھی۔ اب انو میاں کی دلہن آ جاتی تو یہ ویرانی بھی رخصت ہو جاتی۔ اپنے ہی قریبی عزیزوں میں بیٹی دیکھی اور انو میاں کی شادی رچ گئی۔ دالان کے ساتھ والا کمرہ میاں بیوی کو دیا گیا۔ اب دلہن جو چلتی تو پازیب چھن چھنا اٹھتی اور آنچل سنبھالتی تو چوڑیاں کھنکنے لگتیں اور کبھی جوانو میاں کو رات بےرات شرارت سوجھتی تو پھر پائل اور چوڑیاں دونوں مل کر چیخ پکار مچانا شروع کر دیتیں۔ گھر کی فضا اب ایسی تھی جیسے برسوں پڑیت پڑی رہنے والی بنجر زمین میں کسی نے ہل چلا کر ہری بھری فصل اگا دی ہو۔ پہلے تو یوں ہوتا تھا کہ سب اپنے اپنے کاموں میں مگن اور اپنے اپنے بکھیڑوں میں الجھے رہتے، لیکن اب ان اداس چہروں پر ہنسی کی چھوٹیں بھی دکھائی دے جاتی تھیں، جو مدت ہوئی مسکرانا تک بھول چکے تھے۔ رفیق میاں، جب کبھی کوئی موٹی رقم ہاتھ لگتی، چھوٹی دلہن کے لئے کوئی نہ کوئی تحفہ لے ہی آتے۔ کبھی ساڑی۔ کبھی جھمکے کبھی چوڑیاں تو کبھی کنگن۔

دلہن تو بچوں کے لئے عجوبہ ہوتی ہے۔ گھیرے میں لے کر بیٹھ جاتے اور چہلیں ہوتیں۔ اب کہیں اتنے دنوں بعد اس گھر میں قہقہے جاگے۔ شادی کے ٹھیک دسویں مہینے چھوٹی دلہن کے درد اٹھا۔ رات مصیبتوں سے کٹی۔ ایک طرف انو میاں اور دوسری طرف خود رفیق میاں دروازے کے باہر بیٹھے گھڑیاں گنتے تھے۔ اماں بدحواس۔ نند پریشان پہلا پہل معاملہ اور چودہ گھنٹے گزرنے پر بھی مشکل آسان نہ ہوئی۔ رفیق میان کا دل رہ رہ کر ڈوبتا ابھرتا۔ مصیبتوں نے ہمیشہ سے اس گھر کو تاکا تھا۔ خدا نہ کرے زہرہ دلہن کو کچھ ہو گیا تو۔ وہ جان جوان دلہن اپنی جان سے جائےگی۔ یہاں کیا ہے آٹھ چار دن میں انو میاں کا گھر دوبارہ آباد ہو جائےگا۔ پھر ڈوبتے دل سے انو میاں کو دیکھتے۔ آنکھوں میں نمی گھلی پاتے تو خیال بدلنا پڑتا کہ گھر آباد ہوگا تب آباد ہوگا۔ یہاں تو ایسے وہتاک کے مارے بیٹھے تھے کہ بری بھلی خبر جو آجاتی وہیں بیٹھے بیٹھے دم چھوڑ دیتے۔

’’ہمارے قہقہے نہ چھین لینا خدا وندا۔ ’’انھوں نے کلپ کر دعا مانگی۔

چیاں چیاں کی آواز آئی اور ادھر ان کا دل ان کے حلق میں آ بیٹھا۔ انو میاں چیاں چیاں سنتے ہی لپک پڑے، ادھر ماں بہن ہاں ہاں کرتی ہی رہیں۔

’’اے میاں کیا کرتے ہو۔‘‘ مگر وہ اندر پہنچ بھی گئے اور ہاہا ہو ہو کر کے گوشت کے گولے کو ہنسانے کا جتن بھی کرنے لگے۔

انومیاں باپ بن گئے۔

رفیق میاں کا دل آج تک اس انداز سے نہ دھڑکا تھا۔ ماں نے ٹھیک کان کے پاس بھتیجا ہونے کی خوش خبری سنائی تو بھرے دل سے ہنس کر بولے۔ ’’چلو بھائی آج ہم تایا بن گئے۔‘‘

اس دن جب آئینے کے سامنے کھڑے ہو کر انھوں نے آئینے کو خوش خبری سنائی کہ لو بھئی تم تایا ہو گئے تو آئینے نے ہنس کر کہا۔ ’’اور آج ہم بھی تم کو ایک خوشخبری سناتے ہیں کہ وہ دیکھو تمہارے کان کے پاس ایک سفید تار سا جھم جھما رہا ہے۔

کہیں یہ بڑھاپا تو نہیں؟

لوگ کہتے ہیں کہ گرمیوں کی شاموں کو جو سرسراتی ہوائیں چلتی ہیں ان میں ایک جھونکا ایسا بھی آتا ہے جو تنہائی کا احساس دلا کر کانوں کے پاس شائیں شائیں کئے جاتا ہے۔ ’’اٹھو۔ کسی کا ہاتھ تھامو۔ اٹھو کسی کا ہاتھ تھامو۔ اٹھو۔۔۔‘‘ یقیناً ایسے ہی کسی جھونکے نے آدم کو تنہائی کا احساس دلایا ہوگا۔ اور شدت سے دلایا ہوگا تبھی تو حوا نے ان کی پسلی میں اپنی سیج سجائی۔ مگر لاکھ ہوائیں چلیں، ہوائیں گرم گرم ہوائیں ٹھنڈی ٹھنڈی زندگی بخش پھواروں سے بدلیں۔ پھواریں پھر سردیوں کا پیغام لائیں۔ موسم کی اس آنکھ مچولی نے جی کو کیسے کیسے کلپایا۔ کبھی سرد برف کے جھونکے کبھی پروا کبھی چھینٹے جو بدمست ہواؤں کے دوش بدوش آتے۔ اور یہ سر سر کرتے جھونکے کانوں میں سرگوشیاں کرتے۔ ’’اٹھو کسی کا ہاتھ تھامو۔ کسی کی مہکی ہوئی زلف کو اپنے چہرے پر بکھیر لو۔ کسی کا آنچل جو دھنک رنگ ہے اس میں اپنے وجود کو چھپا لو۔ چھپا لو، لیکن رفیق میاں کے کان ایسے پٹ تھے کہ ان کے پردوں سے کبھی یہ آواز نہ ٹکرائی۔

جنے ایک دن بیٹھے بٹھائے انھیں خود ہی یہ خیال کیوں آیا۔ زہرہ دلہن نے تو کبھی کسی بات پر زبان نہ ہلائی۔ ممکن تھا کہ میں شادی کر لیتا تو میری دلہن موم کی مورت ہی ملتی۔ نہ کسی کے لینے میں نہ دینے میں۔ اونہہ اب غصے کی بات تو جانے ہی دو بھلا کون انسان ایسا ہے جسے ایک آدھ بات پر غصہ نہ آتا ہو۔ پھر میری دلہن ہی کیوں قصور وار ٹھہرائی جاتی؟

یہ سوال انھوں نے اپنے دل سے کیا تھا۔ دل کچھ جواب نہ دے پایا۔ دیتا بھی کیا لیکن دوسرے ہی دن انھیں خود بخود جواب مل گیا۔

ننھے اسلم کے چھلے پر گھر میں دھوم دھڑکا تھا۔ یوں تو اب گھر میں قہقہے سنائی دیتے ہی تھے مگر اس دن تو ہر طرف خوشی پھوٹی پڑ رہی تھی۔ ماں بن جانے کے بعد عورت کا دل بڑا نرم و نازک بڑا وہمی بن جاتا ہے۔ اور اسلم میاں تو یوں بھی ماں کو زیادہ ہی پیارے تھے کہ کڑے دردوں سے جنائے گئے تھے۔ گود بھرائی کی رسم کے لئے زہرہ دلہن جب اسلم کو گود میں لے کر بیٹھیں تو چاؤ کے مارے بیوہ پھوپھی بھی پھول پہنانے لگیں۔ چھوٹی دلہن کے منہ سے جیسے آپ ہی آپ سوچا سمجھا جملہ ٹپک پڑا۔

’’آپا بی پھول پہنانے کو ایک آپ ہی رہ گئی تھیں۔ حوری بھی تو ایک ہلکا پھلکا ہار پہنا سکتی تھی۔‘‘

دلہن نے تو اپنے حسابوں بڑی سمجھ داری کی بات کی تھی لیکن آپا بی سے چھپا نہ رہ سکا کہ ان کا مطلب کیا تھا۔ بھلا کون بہن اپنی بھابی کے سہاگ کو یعنی اپنی ہی زندگی اپنے ہی بھائی اپنے ہی خون کو ٹوک سکتی ہے۔

ارمان بھرا دل بھائی کی خوشی پر خوش ہی ہوا ہوگا، یہ تو نہ سوچا ہوگا کہ اپنا منحوس سایہ بھابی پر ڈال دیں۔ اور بھائی بھرپور جوانی میں مرکر اپنے پیچھے اولاد کو یتیم چھوڑ جائے، پھر زہرہ دلہن کے منہ سے یہ بات کیسے نکل پڑی اور پھر وہ اس انداز سے اسلم کو اپنے سینے میں سمیٹ بیٹھی تھیں کہ کانپتے ہوئے ہاتھوں سے ہار تو گراہی گرا، ادھر آپا بی بھی گر پڑیں۔ اماں بی کو جو کھٹک دن رات کھائے جاتی تھی کہ رفو میاں نے شادی نہیں کی، شادی نہیں کی۔ وہ کھٹک آج کھٹ سے کہیں اڑ گئی۔ آج انہیں یاد آیا کہ کیسی عقلمندی کی، بات بیٹے نے کہی تھی کہ ہانڈی ڈوئی ساتھ رہیں گی تو کھڑکینگی ہی۔ اگر آج یہ رفیق میاں کی دلہن نے کہا ہوتا تو کسی کو سہار ہوتی؟ کوئی نہ کوئی کچھ کہہ اٹھتا اور پھر وہ اپنے میاں کے کان بھر دیتی اور مرد کس کی سنےگا؟ ماں بہنو کی یا اپنی دل لگ بیوی کی؟ جو اس کا پلو گرماتی ہے اور بچوں سے اس کا گھر بھر دیتی ہے۔

رات کو رفیق میاں نے بڑی بھلمنساہٹ سے اپنے دل کو سمجھایا۔

’’میں جانتا ہوں تم عمر کے اس دور میں ہو کہ کسی پر نگاہ نہ ڈالوگے لیکن پھر بھی آج تمہیں سنا دیتا ہوں کہ اپنے کان بند کرلو، اپنی آنکھیں میچ لو، ایسا نہ ہو کہ کوئی سریلی آواز اور مٹھاس بھری صور ت تمہاری عبادت میں خلل ڈال دے۔

دل نے دھیرے سے جواب دیا۔

عمر کا یہی حصہ تو خطرناک ہوتا ہے۔ اسی دور میں آکر تو عورت کے پیار کی، اس کے محبت بھرے دل کی، اس کے نرم گرم جسم کی خواہشیں بڑھتی ہیں۔ پیاسا تو پانی دیکھ کر لپکتا ہی ہے۔ کیا میں یونہی قصور وار ٹھہرایا جاؤں گا؟

وہ ہنسے۔ ’’نادان، پیاس تو مدت ہوئی بجھ چکی ہے۔ اب کوئی خطرہ نہیں۔ یہ تو محض ایک دوستانہ مشورہ تھا۔‘‘

دل بےتکے پن سے بولا۔ بعض ملائم ہونٹ اتنے گستاخ ہوتے ہیں کہ بے صدا آواز سے پکارے جاتے ہیں۔ ہمیں چوم لو۔ ہمیں چوم لو۔۔۔ اگر ان گستاخ ہونٹوں پر بھولے بسرے پیار آ ہی گیا تو؟

’’نہیں۔‘‘ انھوں نے دھیرے سے مضبوط لہجے میں کہا۔ ’’ایسا کبھی نہ ہوگا۔ میری روح کے سارے دروازے بند ہیں۔ یہاں تک کسی کی آواز نہیں پہنچ سکتی۔ چاہے وہ پیار کی درخواست کرنے والے ملائم ہونٹ ہوں یا چنگاریاں چھوڑتے ہوئے سرخ سرخ گال۔‘‘

اس سے پہلے اماں نے ایک بار شادی کے لئے کہا تھا، بڑے پیار اور بڑی ضد سے انھوں نے بیٹے کو قائل کرنا چاہا تھا۔ خواہ مخواہ عورتوں کو بدنام کرتا ہے، بھلا چھوٹی دلہن نے آج تک کیا کیا۔ بھلے کو بڑی ہی آتی تو دلی سکون ملتا۔‘‘

’’کیوں اب سکون نہیں ہے کیا۔‘‘ انھوں نے کہا تھا۔

’’ہے کیون نہیں مگر؟‘‘

’’مگر کیا؟‘‘

ارے کمبخت۔‘‘ اماں گلا پھاڑ کر چلائیں۔ خواہ مخواہ ٹر ٹر کئے جاتا ہے کبھی تو اس ممتا کے مارے بوڑھے دل کا خیال کر۔۔۔‘‘

اس دن اماں نے ایسی گونچ گرج کے ساتھ ڈرا دیا تھا کہ ایک لمحے کو وہ جھک سے گئے تھے اور اماں بھی اپنی جگہ خوش ہو گئی تھیں، مگر اس دن کی بات اور تھی اور آج کی بات اور (ٹیکسٹ مسنگ) زہرہ دلہن کی اتنی سی بات نے سارے گھر میں سناٹا پھیلا دیا تھا۔ انو میاں بن بات اپنی جگہ روٹھ گئے تھے۔ جیسے واقعی آپا بی کا قصور ہو اور آپا بی کی آنکھوں میں ایک بار پھر آنسوؤں کی قندیلیں سلگ اٹھی تھیں۔ انھوں نے اماں سے جا کر بڑے دھیمے سبھاؤ میں کہا۔

’’میری آمدنی تو یونہی سی ہے اور کوئی ذریعہ آمدنی کا ہے بھی نہیں۔ اور اماں شادی کرنا تو سراسر آبادی بڑھانا ہے۔‘‘

بھلا اتنے سارے لوگوں کے کھانے پینے پر کچھ نہ کچھ خرچ تو لگتا ہی ہے۔ بس آپ سب لوگ میرے آس پاس رہیں۔ اماں مجھے سچ مچ بڑا غرور محسوس ہوتا ہے اور بڑی خوشی ہوتی ہے کہ میں اتنے سارے لوگوں کا بڑا ہوں۔ ان سب کی دیکھ ریکھ کرتا ہوں۔ میرے دم سے ان کی خوشیاں ہیں اور میرے ہی دم سے۔۔۔‘‘

اور ان کی بات کاٹ کر ان کا دل ان سے پوچھ بیٹھا۔

’’اور اپنی تو سناؤ۔ سچ کہنا کیا تم نے کبھی ایک چاند سی دلہن اور پھول سے بچے کی آرزو نہیں کی؟ یہ تمہارے وجود پر برف کی، سلیں رکھی ہیں، جو راتوں کو پگھل پگھل کر تکئیے کو گیلا کردیتی ہیں اور اماں (وہ دل کا الا ہنا شربت کا گھونٹ جان کر پی گئے ) سب سے زیادہ خوشی تو مجھے اس بات کی ہے اماں کہ میں آپ کا بھی بڑی ہوں۔!‘‘

اماں نے بیٹے کو سینے سے لگا دیا۔ وہ سل، جو راتوں کو چھپے چوری پگھل پگھل کر تکیہ بھگویا کرتی تھی، دن دہاڑے پگھل اٹھی

ٹپ۔ ٹپ۔ ٹپ

شروع سے رفیق میاں نے انو کو ایسی شہ دی، بات بےبات یوں پشت پنا ہی کی تھی کہ ان کو ذمہ داری کا احساس ہوا ہی نہیں۔ انسان کے آگے پیچھے کوئی الجھٹا ایسا لگا رہے کہ بار بار اسی کا دھیان بندھا رہے تو وہ ذرا ذمہ دار بن جاتا ہے۔ یہاں تو شروع سے لے کر آخر تک ہر کام کو رفیق میاں نے سنبھال لیا۔ پھر بھلا ان میں کیا احساس پیدا ہوتا اور تو اور پڑھائی بھی پوری نہ کرسکے۔ بھائی کی کمائی کو کبھی یہ سوچ سمجھ کر خرچ نہ کیا کہ یہ بھائی کے محنت کے پسینے کی کھینچ ہے اور انو میاں کا تھا ہی کیا، سبھی رفیق میاں کے بل بوتے پر زندہ تھے اگر رفیق میاں کی بھی کوئی بیوی ہوتی تو وہ اپنا حق جتا کر کچھ نہ کچھ تو سنبھال کر بچا کر رکھتی مگر انھوں نے خود ہی یہ روگ نہ پالا۔ اب تک جتنا بھی آیا سبھی کھائی میں گیا ان کا جو کچھ تھا سب گھر والوں کا تھا۔ بھولے سے بھی کبھی خیال نہ آتا کہ کبھی اپنی بھی شادی ہوگی۔ دلہن گھر آئے گی۔ اپنے بچے ہوں گے۔ اور ان کی بھی زندگی بنانی پڑےگی۔ جب آگے پیچھے کوئی فکر ہی نہیں تھی تو اور کون سا خیال ہوتا۔ جو جی سے چمٹا رہتا؟ بس آ جاکے یہی دکھ انہیں ستائے جاتا کہ میری جان پر بھلے سے جو گزرے سو گزرے لیکن سب چین اور امن خوشی سے رہیں۔ مگر اتنا سا سکھ ان کے نصیب میں نہ تھا۔ زہرہ دلہن کا منہ ایک بار کیا کھلا کہ سدا کے لئے ہی کھل کر رہ گیا۔ روز دانتا کلکل ہونے لگی۔ کبھی کبھار تو اماں بول جاتیں ورنہ اکثر خاموش ہی رہتیں۔ مگر چھوٹی دلہن کا منہ بند ہونے میں نہ آتا۔

آپا بی کے بچے اسلم کے دیوانے۔ یوں بھی گھر میں ننھا بچہ ہو تو بڑوں چھوٹوں سبھی کے لئے کھلونا ہو جاتا ہے۔ بچے اسے ستائیں بھی، ماریں بھی اور کھلا پلا کر پیار دلار بھی کریں۔ اس کا یہ مطلب کہاں ہوا کہ بچے سے دشمنی ٹھہری ہے۔ کھلائے پلائے کی حد تک تو مومانی چپ تھیں۔ لیکن جہاں بچے کی چیں بھی سنی وہ آپے سے باہر۔

’’اوئی بچہ نہ ہوا خدا کا غضب ہو گیا۔ میں کہوں، یہ کون تک ہے کہ ننھے بچے کو رلا رلا کر خوش ہوتے ہیں۔ ہنستے ہیں۔ حوری ایسی طرار تھی کہ خاموش تو اس سے بیٹھا ہی نہ جاتا۔ تیزی سے بولتی۔ ’’ہاں ہاں جان کر رلا رہے ہیں۔ سن لیا۔ ارے کھاتا ہی بہت ہے تو چلائےگا نہیں؟‘‘

چھوٹی دلہن انگارے اگلنے لگتیں۔ اے لیو اور سنو۔ کیا تمہارے باوا جان، جائداد چھوڑ کر مرے تھے کہ کھلائے پلائے کا الانہا دیتی ہو۔ لو بھئی چار دن کی چھوکری ہمارے منہ آتی ہے۔‘‘

آپابی جو لپک کر دو چار دھول دھپے حوری کو جڑ دیں تو جڑ دیں ورنہ بات بڑھتی چلی جاتی اور جب تک خود رفیق میاں اپنے کاغذات کے انبار سے نکل کر نہ آتے تب تک صلح صفائی نہ ہوتی۔

انھیں دنوں زہرہ دلہن کی چھوٹی بہن طاہرہ اپنی *بہن سے ملنے آئی ہوئی تھیں۔ اچھی خاصی صورت۔ ڈھنگ گن بھی اچھے۔ منہ کی ایسی میٹھی کہ بس باتیں ہی سنا کرو۔ رفیق میاں سے پردہ تھا لیکن آتے جاتے جھپک ضرور دکھائی پڑ جاتی۔ اماں تو چھوٹی بہو کے تماشے دیکھ دیکھ کر دنگ تھیں۔ مگر آپا بی چاہتیں تھیں کہ رفیق میاں گھر بسا لیں۔ جانتی تھیں کہ بھائی نے یہ ویرانی کسی اور کے لئے نہیں انہیں لوگوں کے لئے اٹھائی ہے۔ ورنہ آگے پیچھے بہن بھائی، بھانجے بھتیجے نہ لگے ہوئے تو وہ کیوں ایسے ڈھائیں ڈھائیں پھرتے، لاکھ چاہا کہ بھائی ہاں کردیں لیکن وہ کب ماننے والے تھے۔ بہن نے بہت ہی جان کھانی شروع کی تو بولے۔

’’جیسی ایک بہن ویسی دوسری۔ زہرہ دلہن نے بیٹھے بیٹھے کیسے ہاتھ پاؤں، نکالے ہیں۔ اگر طاہرہ بی بی بھی ویسی ہی نکلیں تو؟ پھر تو اس گھر کا اللہ ہی مالک ہے نا آپا بی نا۔ میرے سامنے میرے ننھے منے بھانجے بھانجیاں ہیں۔ ان کی زندگیاں ہیں۔ میرا اپنا بھائی ہے لاکھ جان جوان ہے مگر مجھے تو یہ بات نہیں بھولتی کہ ابامیاں میرے ہاتھ میں اس کا ہاتھ دے کر گئے تھے۔ پھر اس کی بیوی بچے ہیں۔ آپ ہیں۔ اماں بی ہیں۔ میں کیسے اتنے سارے لوگوں کو چھوڑ دوں؟ میں اور کتنی بار دہراؤں کہ مجھے بار بار مجبور نہ کیا جائے۔ میں اپنا ذہنی سکون نہیں برباد کرنا چاہتا۔ سب سے ٹھیک یہ ہے کہ اتنے سارے لوگوں کو چھوڑنے کی بجائے میں ایک دلہن کو چھوڑ دوں۔‘‘ آپا بی خوش ہو گئیں۔ ’’اگر طاہرہ بی بی بھی ایسی ہی نکلیں تو۔‘‘ مطلب یہ کہ وہ شادی کے لئے راضی تو ہیں مگر وہ صرف اس وجہ سے آنا کانی کر رہے ہیں کہ کہیں بڑی بہو بھی چھوٹی کی طرح لڑاکا اور بدتمیز نہ نکل آئے اور گھر کا سکون لٹ جائے۔ وہ خوشی *خوشی بولیں۔‘‘ اے میاں تو میں کوئی اچھی سی میٹھے سبھاؤ کی دلہن ڈھونڈھ لاؤں گی۔‘‘

سامنے ٹوکری میں سیب دھرے تھے۔ ایک سرخ سا سیب اٹھا کر وہ بولے ’’یوں دیکھنے میں اوپر سے تو یہ اتنا خوبصورت نظر آرہا ہے لیکن کون جانے یہ میٹھا ہے یا کھٹا آپا بی کی زبان پر تالے پڑ گئے۔

ایک دن چھوٹی دلہن نے بڑے چاؤ سے باور چی خانہ سنبھالا اور مرچوں کا کھٹا سالن پکایا۔ اور تو سب نے ہری مرچوں کا کھٹا اور تیز سالن مزے لے لے کر کھایا مگر۔ اماں بی ایک تو بوڑھی۔ دوسرے دس دن سے پشچو سے گھل رہی تھیں۔ سوں سوں کر کے جیسے تیسے مگر انھوں نے بھی کھا ہی لیا۔ بہو کو یہ بات نہ بھائی کہ سب تو تعریف کریں اور ساس سوں سوں کر کے سب کی توجہ اس بات کی طرف دلائیں کہ ’’دیکھو بھئی اس نے سالن مزے کا نہیں پکایا۔ بلکہ مرچیں کچھ زیادہ ہی جھونک دی ہیں۔‘‘

وہ کھرے پن سے بولیں۔ ’’اوئی اماں جان آپ یہ سوں سوں کیوں کئے جا رہی ہیں؟‘‘

اماں نے بیچارگی سے دیکھا اور بولیں۔ ’’بی بی میں کچھ بہانہ تو کر نہیں رہی ہوں، دیکھ لو پیچش کے مارے زبان چھالوں سے لد گئی ہے۔‘‘ انھوں نے زبان نکال کر بتائی۔ سرخ کھیری ہو رہی تھی۔

انو میاں بیوی سے مخاطب ہو کر بولے۔ ’’تمہیں معلوم تھا اماں بیمار ہیں تو ایک پھیکا سالن الگ سے پکا دیتیں۔‘‘

’’اے واہ۔ میں کوئی باورچن ہوں۔ کیا میں نے ماما گیری کرنے کا ٹھیکہ اٹھا رکھا ہے کہ سارے گھر کا کام کاج کرتی پھروں۔ ایسا ہی ہے تو چولھے کیوں نہ الگ کرلیں وہ اپنی مرضی سے کھائیں، ہم اپنا من مانا پکائیں۔‘‘

بہو کی زبان چرچر چلی جا رہی تھی۔ رفیق میاں نے ناگواری سے بھاوج کی طرف دیکھا۔ مگر کچھ بولے نہیں۔ اماں بی بھی خاموش رہ گئیں۔ مگر آپابی سے چپ نہ رہا جا سکا، تیورا کر بولیں۔ ’’دلہن۔ ایک دن چولہے کے پاس جا کر جھانکا تو اتنی باتیں کر رہی ہو آخر تمہیں اپنے بچوں سے فرصت ہی کب ملتی ہے کہ باورچی خانے کا رخ کرو۔ اوپر کا سارا کام تو باقر ہی نبیٹر لیتا ہے۔ رہا روٹی تھوپنا اور ہانڈی بھون دنیا تو آخر میں اور اماں پھر کرتی ہی کیا ہیں؟‘‘

’’گویا میں تو مالکن بن کر راج رج رہی ہوں نا۔‘‘ وہ تیکھی ہو کر بولیں۔

’’میں نے تو نہیں کہا بی بی۔ تم آپ کہہ لو تو میں کیا کہہ سکتی ہوں۔ لیکن تم ہی کہو کہ شادی کے اتنے دن گزر گئے تم نے کتنی بار باورچی خانے میں جھانک کر بھی دیکھا، ایک دن ایک سالن پکا کر یہ کہہ دینا ذرا تو زیبا نہیں کہ میں باورچن نہیں جو سارے گھر کا کام کاج کرتی پھروں۔ انسان ذرا تو ایمان کا پاس کرے۔‘‘

سارے گھر میں وہ ہلور مچی کہ توبہ ہی بھلی۔

دلہن نے رو رو کر سارا گھر سر پر اٹھا لیا۔ آخر رفیق میاں کو ٹھنڈے دل سے کہنا پڑا۔

’’آپا بی آپ غلطی پر ہیں۔ چھوٹی دلہن کا کہنا ٹھیک ہے۔ اگر ان کی مرضی ہو تو آپ چولہا ہانڈی الگ کر لیں۔‘‘

اماں جو اب تک چپ تھی پھپھک کر بولیں۔ ’’اے واہ ان کی مرضی۔ یہ ان کی مرضی کیا ہوئی۔ کون سی بڑی ان کی کمائی دھمائی ہے۔ ذرا منہ تو ہو بولنے کے لئے۔ دوسروں کے مال پر یوں چودھرائی کرتے ذرا تو شرم آئے۔‘‘