فیلیئر

ایک روز، مارچ کے مہینے میں، پیر کی صبح، مجھے چھٹی جماعت شروع کرنا پڑی۔ پانچویں جماعت تک، جب ہم جونیئر سکول میں تھے تو سینئرسکول کو بڑی حسرت سے دیکھا کرتے تھے جہاں لڑکے نیکروں کی جگہ پتلونیں پہنتے تھے۔ کبھی کبھی یہ سوچ کر کہ ہم بھی عنقریب پانچویں جماعت پاس کر کے وہاں سینئرسکول میں جاکے پڑھیں گے، ہمیں کچھ کچھ ڈر بھی لگتا تھا کیونکہ سینئر سکول میں اساتذہ کو بچوں کو سوٹیوں اور بلیک بورڈ صاف کرنے والے لکڑی کے ڈسٹروں سے مارنے کی اجازت تھی جبکہ جونیئر سکول میں استانیاں صرف تھپڑ اور گھونسے مار سکتی تھیں اور لڑکیوں کے سروں کے بال کھینچ سکتی تھیں کیونکہ یہ ایک عام رواج ہے کہ لڑکیاں لمبے لمبے بال رکھتی ہیں جو آسانی سے ہاتھ میں آ جاتے ہیں اور ان کو زور زور سے کھینچا جا سکتا ہے۔ جیسا کہ سیدہ زوبیہ رضا کے بالوں کو مس رعنا قریب قریب ہر روز کھینچتی تھیں کیونکہ وہ سکول سے صرف دس منٹ کے پیدل فاصلے پر رہتی تھی مگر ہمیشہ کلاس شروع ہونے کے دس پندرہ منٹ بعد سکول پہنچتی تھی۔ جونیئر سکول میں مس طیبہ اور مس رعنا جیسی دو ایک استانیاں ہی زیادہ ظالم تھیں ورنہ باقی تو بیچاری کچھ خاص زک نہیں پہنچاتی تھیں۔

سینئر سکول اور جونیئر سکول کے درمیان گراؤنڈ میں ایک بہت بڑا اور گہرا گڑھا تھا۔ سینئر سکو ل کے لڑکے بتاتے تھے کہ 1971ء میں جب ہمارے ملک پاکستان کی اپنے ہمسایہ ملک ہندوستان سے جنگ ہوئی تو ایک روز اچانک ہندوستان کے کچھ جہاز تیزی سے اڑتے ہوئے آئے اور آکر یہاں ماڈل ٹاؤن میں چند ایک بم گرا کر چلے گئے۔ ان میں سے کچھ بم ادھر اس گراؤنڈ میں بھی آن پھٹے تھے اور اس طرح یہ گڑھا وجود میں آ گیا تھا۔ مگر بعد میں، کچھ برس بعد مجھے یہ پتہ چلا تھا کہ ایسا کچھ نہیں ہوا تھا اور دراصل اس جگہ ایک زمانے میں تیراکی کیلئے تالاب بننا شروع ہوا تھا جو پھر پیسے کم پڑ جانے کی وجہ سے سکول والوں نے روک دیا تھا۔ نجانے سکول والوں کو اس گڑھے کو واپس بھر دینے کا خیال کیوں نہ آیا، کیونکہ یہ گہرا اور خطرناک تھا اور اس میں گرکر سکول کے بچے یونیفارم پہنے پہنے ہلاک یا معذور ہو سکتے تھے۔ شاید سکول والوں نے اسے یہ سوچ کر یونہی چھوڑ دیا ہوگا کہ اگر کبھی پیسے جمع ہو گئے تو نیا گڑھا کھودنے کے عوض اس کھدے کھدائے گڑھے میں تیراکی کا تالاب بنا لیں گے لیکن پھر شاید پیسے جمع ہونے کا انتظار کرتے کرتے اتنا وقت گزر گیا کہ اس عظیم الشان گڑھے کی تہہ سے بڑے بڑے درخت اگ کر باہر، زمین کی سطح سے بھی اوپر نکل آئے اور جوں جوں وہ درخت اونچے ہوتے گئے توں توں لوگ بھولتے گئے کہ یہاں پر تو کبھی تیراکی کا تالاب بننا مقصود تھا۔

پتلون پہننے اور سوٹیوں اور ڈسٹروں سے مار پڑنے کے علاوہ ایک اور فرق بھی تھا سینئر اور جونیئر سکول کا اور وہ یہ تھا کہ سینئر سکول میں لڑکیوں کو داخلہ نہیں دیا جاتا تھا۔ اس زمانے میں ایسے سکول کم کم ہوتے تھے جہاں دس بارہ برس سے زیادہ عمر کے لڑکے لڑکیاں اکٹھے، ایک ہی جماعت میں بیٹھ کر پڑھتے ہوں کیونکہ یہ بات شرافت اور اسلام کے خلاف ہے اور پاک ممالک اور پاکیزہ معاشروں میں اس کی اجازت نہیں دی جا سکتی۔ پانچویں جماعت کے بعد جونیئر سکول کی لڑکیاں ادھر ادھر دوسرے سکولوں میں پڑھنے چلی جاتی تھیں۔ جیسے مس نبیہا کا سکول جس کا نام نجانے کیا تھا مگر سب اسے اس طرح ہی پکارتے تھے یعنی ’’مس نبیہا کا سکول۔ مس نبیہا کا سکول۔‘‘

اس سال مارچ کے مہینے میں، چھٹی جماعت کا پہلا دن ختم ہونے تک سینئر سکول کے بارے میں میرا تمام جوش ٹھنڈا پڑ چکا تھا۔ میں سکول کے پرنسپل کے خوف میں پہلے سے بھی زیادہ مبتلا ہو چکا تھا اور اردو کے استاد سر شوکت سے دونوں ہاتھوں پہ دو دو سوٹیاں کھا چکا تھا۔

اس پہلے روز صبح مجھے سکول پہنچنے میں تھوڑی دیر ہو گئی کیونکہ ابا سے ٹائی بندھوانے کی جگہ میں کچھ دیر یہ کوشش کرتا رہا کہ اسے خود ہی باندھ لوں۔ چونکہ میں ابا کو کئی بار ٹائی باندھتے دیکھ چکا تھا، میرا خیال تھا کہ میں خود، بغیر کسی مدد کے یہ کام کر سکتا ہوں۔ اس میں ہوتا ہی کیا ہے؟صرف اتنا کہ گلے میں ٹائی ڈال کے ایک دو بار بائیں طرف والے چوڑے حصے کو دوسرے حصے کے اوپر ڈالنا ہوتا ہے جس سے ایک سوراخ سا وجود میں آتا ہے جس میں سے اسی چوڑے حصے کو گزارنا ہوتا ہے۔ اس کے بعداسے ایک اور سوراخ میں سے کھینچ کھانچ کے گزارکر لٹکتے ہوئے پتلے حصے کے اوپر لٹکا دینا ہوتا ہے۔ مگر جب کوشش کے باوجود مجھ سے یہ کام نہ ہوا اور ٹائی ابا ہی سے بندھوانی پڑی تو میں کھسیانہ ہو کے بڑبڑایا کہ جونیئر سکول کی طرح الاسٹک والی بندی بندھائی ٹائی ہی خرید لیتے تو بہتر رہتا۔

جب میں تیز تیز چلتے، تقریباً بھاگتے بھاگتے، سکول پہنچا تو سکول شروع ہونے کی گھنٹی بج رہی تھی اور میرے پاس اتنا وقت نہیں تھا کہ پہلے کلاس میں جاکر سیٹ مل کے اس پہ بستہ رکھوں اور پھر اسمبلی لان میں جاؤں۔ لیٹ آئے ہوئے بچے اپنے بستوں کو راہداری میں دیوار کے ساتھ رکھ کے اسمبلی میں جا رہے تھے۔ میں نے بھی یہی کیا۔

اسمبلی گراؤنڈ کے شمالی حصے میں گراؤنڈ کے سرے سے چند فٹ ادھر سیمنٹ کا ایک مستقل سٹیج بنا ہوا تھا جو گراؤنڈ سے کوئی ڈیڑھ فٹ اونچا تھا۔ اس پر چار پانچ بڑی کلاسوں کے لڑکے ایک قطار میں کھڑے ہوئے اسمبلی کی کاروائی شروع ہونے کا انتظار کر رہے تھے۔ سٹیج کے بیچوں بیچ ایک لمبا سا لوہے کا پائپ نصب تھا۔ سٹیج کی پشت پر لان کا جو چھوٹا چند فٹ چوڑا ٹکڑا باقی تھا، اس پر پرنسپل صاحب سمیت تمام اساتذہ حضرات ایک قطار بناکر کھڑے تھے۔

جیسا کہ عام طور پر سکولوں میں بچے ہاؤسوں میں تقسیم ہوتے ہیں، ہمارے سکول میں بھی ایسا ہی تھا۔ ہاؤسوں کے نام پنجاب کے مختلف شہروں پہ رکھے گئے تھے۔ لاہور، گوجرانوالہ، شیخوپورہ اور سیالکوٹ۔ البتہ جو ہوسٹل میں رہنے والے بچوں کا ہاؤس تھا اس کا نام اقبال تھا۔ یعنی علامہ اقبال، ہمارے قومی شاعر اورفلسفہ کے بلند پایہ ماہر۔ یہ عجیب سی بات تھی کہ صرف ایک ہاؤس کا نام کسی انسان پہ رکھا گیا تھا اور باقی سب کے شہروں پہ۔ نامعلوم ایسا کیوں تھا۔ یہ بھی عجیب بات تھی اور نامعلوم ایسا بھی کیوں تھا کہ یہ نام پنجاب کے شہروں پہ تھے جبکہ اگر پانچ ہاؤس ہی بنانے تھے تو پاکستان کے چار صوبوں کے دارالخلافوں اور ایک پاکستان کے اپنے دارالخلافہ کے نام رکھے جا سکتے تھے، یعنی لاہور، کراچی، پشاور، کوئٹہ اور اسلام آباد۔

خیر، جیسا تھا سو تھا۔ اس بحث کا کوئی فائدہ نہیں کیونکہ ایک تو یہ کہ ایسی باتوں سے کیا فرق پڑتا ہے کہ آپ نے فلاں چیز کا نام یہ کیوں رکھا اور وہ کیوں رکھا؟ دوسرا یہ کہ اگر ایسی باتوں سے فرق پڑتا بھی ہو تو بھی اب ان کا ذکر فضول ہے کیونکہ یہ ممکن نہیں کہ ماضی میں جاکر اس قسم کی خرابیوں کو دور کیا جا سکے اور نہ ہی اس بات کی کوئی ضمانت دی جا سکتی ہے کہ سکول والے میرا مشورہ سن کر اپنے ہاؤسوں کے نام بدل ہی دیتے۔ ایک تیسری بات بھی ہے اور وہ یہ کہ اگر ایسا ہی مجھے ان ناموں پر اعتراض تھا تو تب ہی جا کے میں نے یہ بات سکول والوں سے کیوں نہ کہی؟ اور اگر تب میری ایسی ہمت نہ پڑ سکی تو پھر اب ان اعتراضات کو اٹھانے سے کیا میں اپنے آپ کو باہمت اور بہادر ثابت کر سکوں گا؟

میرا ہاؤس شیخوپورہ مقرر ہوا تھا ا س لیے میں اسمبلی میں جا کے شیخوپورہ ہاؤس کی قطاروں میں کھڑا ہو گیا۔ ذرا پیچھے کی طرف، کیونکہ میں دیر سے پہنچا تھا۔

جب سب قطاریں بن گئیں اور لڑکے فارغ کھڑے کھسر پھسر کرنے لگے تو اسمبلی شروع ہوئی۔ ان چار پانچ لڑکوں میں سے، جو سٹیج پر چڑھے کھڑے تھے، سب سے دائیں والا دو قدم آگے بڑھا اور زور سے چلایا۔ Silence

یعنی خاموش ہو جاؤ۔ سب خاموش ہو گئے۔ پھر اس نے دو تین بار کبھی ہمیں attention ہونے کو کہا اور کبھی stand at ease۔ زور زور سے اور بلا وجہ چلا چلا کے۔ ہم بھی زمین پر پاؤں مار مار کے کبھی attention ہو کے سیدھے کھڑے ہو جاتے رہے اور کبھی stand at ease کرتے رہے جس میں ٹانگیں کھول کے کھڑے ہوتے ہیں او ر ہاتھ پیچھے باندھ لیتے ہیں، حالانکہ اگر stand at easeہے تو پھر اس کا مطلب تو یہ ہونا چاہیے کہ آپ اپنی مرضی سے آسانی کے ساتھ کھڑے ہو جائیں۔ جس بھی طرح آپ کا دل چاہے۔

ہم سے یہ سب کرواکے وہ لڑکا پائپ کے ساتھ مصروف ہوا جس پہ رسی کے ساتھ پاکستان کا جھنڈا بندھا ہوا تھا۔ اس نے رسی کھینچ کھینچ کے بڑی سرعت سے جھنڈے کو اوپر پائپ کے سرے پہ پہنچایا تاکہ وہ وہاں ہوا کے دوش پر لہرا سکے اور ہمارے وطن کی عزت اور سربلندی میں اضافے کا باعث بنے۔ یہ سب کرکے وہ اپنی جگہ واپس چلا گیا۔

اس سکول میں یہ ایک عجیب بات تھی کہ روز صبح ایک لڑکا انگریزی کے اخبار میں سے تین چار خبریں پڑھ کے سنایا کرتا تھا۔ یہ پرنسپل صاحب کے حکم پہ ہوتا تھا جو قد میں لمبے تھے اور جن کی آنکھیں سرخ اور غضبناک تھیں۔ وہ ہر اسمبلی کے دوران خبروں کے بعد سٹیج پہ چڑھ آتے تھے اور پڑھی گئی خبروں کے بارے میں انگریزی میں سوالات کرتے تھے۔

Where is Paris?

Who is the Prime Minister of India?

What is the capital of Brazil?

ایسے بین الاقوامی نوعیت کے سوالات تھے جو وہ پوچھتے تھے۔ جو لڑکے جواب نہ دے سکتے تھے ان کی پرنسپل صاحب بہت بےعزتی کرتے تھے اور انہیں سرعام ڈانٹتے دھمکاتے تھے۔ عام طور پر سوالات اگلی صفوں میں کھڑے ہوئے لڑکوں سے ہی پوچھے جاتے تھے اور یہی وجہ تھی کہ اسمبلی میں آگے کھڑے ہونا کوئی فخر اور خوشی کی نہیں بلکہ خوف کی بات سمجھی جاتی تھی۔

اس روز پرنسپل صاحب سٹیج پر آئے اور ایک تقریر شروع کی۔ یہ تقریر زیادہ تر چھٹی جماعت کے لیے تھی کیونکہ وہ جونیئر سکول سے پاس ہوکے یہاں آج پہلے دن نئی آئی تھی۔ یعنی ہم لوگ۔ پرنسپل صاحب نے چھٹی جماعت کو سینئر سکول میں خوش آمدید کہا اور بتایا کہ اب وہ بڑے ہو گئے ہیں اور انھیں ذمہ داری اور تمیز کا مظاہرہ کرنا ہوگا۔ یعنی جیسا کہ ہم جونیئر سکول میں غیر ذمہ داری اور بدتمیزی کا بازار گرم کرتے کرتے اچانک یہاں کسی خاص جگہ آن پہنچے تھے جہاں ایسے بازار گرم کرنے کی کوئی خاص ممانعت تھی۔ آخر وہ بھی تو اسی سکول کا حصہ تھا، جونیئر سکول، جہاں سے ہم آئے تھے۔ سو ہمیں خندہ پیشانی سے خوش آمدید کہنے کے عوض ایسے تنبہیی انداز میں اس قسم کی باتیں کہنے کی کیا ضرورت تھی کہ جیسے ہم کوئی خراب اور نا پسندیدہ لوگوں کا گروہ ہوں؟ یہ بھی کہا کہ اگر ایسا نہ ہوا، یعنی ہم نے ذمہ داری اور تمیز کا مظاہرہ نہ کیا، تو وہ بہت بری طرح پیش آئیں گے۔ ہم پرنسپل صاحب سے پہلے ہی بے حد ڈرتے تھے۔ وہ کبھی کبھی جونیئر سکول معائنہ کیلئے آتے تھے اور کلاسوں میں گھس گھس کر بچوں سے انگریزی میں اوٹ پٹانگ سوالات کرتے رہتے تھے جن کے جواب کبھی کوئی بچہ نہ دے سکتا تھا۔ یہ وہ اس لیے کرتے تھے کہ جونیئر سکول کی ہیڈ مسٹریس صاحبہ کو جتلا سکیں کہ دیکھو کیسے نالائق بچے ہیں تمہارے سکول میں اور تم کیسی ناکام ہیڈ مسٹریس ثابت ہو رہی ہو۔ ایسا کرنے سے ممکن ہے کہ یہ ہوتا ہو کہ ہیڈ مسٹریس صاحبہ،جو گہری سرخ لپ اسٹک لگاتی تھیں، تنخواہ میں اضافے کامطالبہ نہ کر پاتی ہوں یا ہو سکتا ہے کہ ایسا کرنے کا مقصد صرف ہمیں اور ہیڈ مسٹریس صاحبہ کو ہراساں کرنا ہو اور اس سے پرنسپل صاحب کے دل کو اطمینان محسوس ہوتا ہو۔

وہ ہمیشہ انگریزی بولتے تھے اور اگر بھولے سے کوئی ان سے اردو میں بات کر لیتا یا کوئی بچہ بھولے سے ان کے کسی سوال کا جواب اردو میں دے دیتا تو وہ بڑی خوف ناک شکل بناتے اور ڈرامائی انداز میں اپنا سر جھکاکے اپنا کان بات کرنے والے کے منہ کے سامنے لے جا کے کہتے :

’’ What? What is this language you speak?‘‘

آج بھی وہ انگریزی میں بولتے چلے جا رہے تھے۔

This is an english medium school. English medium! I don't want to hear you speak anything but english. And if I catch anyone speaking urdu, he will be punished severely.

خیر یہ بات تو ہمیں پتہ ہی تھی اور ہم کچھ نہ کچھ ایسے ناپسندید ہ واقعات کے لیے تیا ر بھی تھے، لیکن پھر اسی وقت ایک دم انھوں نے انگلی سے سب سے اگلی قطار میں کھڑے ایک لڑکے کی طرف اشارہ کیا اور اس سے پوچھا:

Who tied your tie? یعنی تمہاری ٹائی کس نے باندھی؟

اس لڑکے کو شاید یقین نہ آیا کہ بھری اسمبلی میں پرنسپل نے خاص اسی کو بات کرنے کیلئے چناہے۔ وہ خاموشی سے اسی طرح پرنسپل صاحب کو دیکھتا رہا جیسے اس سوال سے پہلے دیکھ رہا تھا۔ اس کے ساتھ کھڑے لڑکے نے جب کھسر پھسر کر کے کچھ کہا تو تب اسے سوجھا کہ ہاں ایسا ہی واقعہ ہوا ہے کہ اس آدمی نے مجھ ہی سے انگریزی میں بات کی ہے۔

Sir....sir....yes sir

اس نے کہا۔ پھر اس نے تھوک نگلی اور اس کی آواز حلق میں پھنس گئی۔

Yes sir ? Yes sir ? What yes sir? I asked you a question. Who tied your tie?

پرنسپل صاحب نے چیخ کر پوچھا۔

اس نے بمشکل کہا Sir. Daddy.

’’کھی کھی کھی‘‘ کچھ لڑکے ہنسے۔

Daddy? Daddy?

پرنسپل صاحب نے مصنوعی تعجب سے پوچھا۔

Sir, father. Father, sir. اس بےچارے نے کہا۔

Father?? Father?? Father?? پرنسپل صاحب بہت اونچی آواز سے دھاڑے اور ہر بار ’’فادر‘‘ کہتے ہوئے ان کی آواز اور بلند ہوتی گئی۔ انھوں نے اپنی ٹھوڑی کو اپنے دائیں ہاتھ کی مٹھی میں پکڑا، اس طرح کہ شہادت کی انگلی ان کی ناک کے سرے پر ٹک گئی اور سر کو آہستہ سے پہلے دائیں سے بائیں اور پھر بائیں سے دائیں گھمایا جیسے کوئی بہت ہی مایوس کن بات سنی ہو۔

He is a little child whose father dresses him up. His daddy!

انہوں نے بلند آواز اور ڈرامائی انداز میں کہا۔

’’ہی ہی ہی ہی‘‘کچھ لڑکے پھر ہنسے۔

اب انھوں نے انگلی کے اشارے سے لڑکے کو سیٹج پر بلایا۔ لڑکے نے ادھر ادھر دیکھا کہ شاید کسی معجزے سے یوں ہوا ہو کہ پرنسپل صاحب نے کسی اور کو بلایا ہو۔ پھر وہ آہستہ آہستہ، کانپتا کانپتا سٹیج پر جاکے ان کے سامنے سرجھکاکے کھڑا ہوگیا۔

پرنسپل صاحب کا ایک ہاتھ تواپنی ٹھوڑی کے گردہی رہا جبکہ دوسرے سے انھوں نے اس لڑکے کی ٹائی کو پکڑ کے یوں کھینچا کہ اس کا منہ اسمبلی کی طرف پھیر دیا۔ جیسے کسی مویشی کے ساتھ رسی سے کھینچاتانی کی جائے۔

What is your name? انہوں نے اسی غضبناک آواز میں پوچھا۔

Farooq, sir. لڑکے نے لرزتی آواز میں جواب دیا۔

اب پرنسپل صاحب نے اس سے پوچھا کہ اسے ٹائی باندھنی کیوں نہیں آتی اور وہ چھوٹے بچوں کی طرح اپنی ڈیڈی جان سے ٹائی کیوں بندھواتا ہے؟ ڈیڈی جان ہی کہا تھا۔ لڑکا خاموش رہا اور خوف اور بےعزتی کے احسا س سے اس کا چہرہ سرخ ہوتا چلا گیا۔ ظاہر ہے کہ اس کے پاس اس سوال کا کوئی جواب نہیں تھا یا شاید اسے انگریزی پر ایسی دسترس نہ تھی کہ پرنسپل صاحب کے مقابل کچھ بول سکتا۔ دسترس ہوتی بھی تو اس سوال کا جواب ہو بھی کیا سکتا تھا؟ ٹائی نہیں باندھنی نہیں آتی تو بس نہیں آتی۔ جیسے مجھے۔

پھر پرنسپل صاحب نے حکم جاری کیا کہ کل وہ ٹائی باندھنا سیکھ کر آئےگا اور یہیں اسمبلی میں کھڑا ہو کر سب کے سامنے ٹائی باندھ کر دکھائےگا۔ یہ بھی کہا کہ اگر اسے کل تک ٹائی باندھنا نہ آئی تو وہ اسے گھر واپس بھیج دیں گے اور یہ کہ اگر اس نے کل چھٹی کی تو اس سے اگلے دن اسے اسمبلی میں بیس سوٹیاں ماری جائیں گی۔

Go back now. پرنسپل صاحب نے کہا۔

لڑکا سٹیج سے اترا اور اپنی جگہ کی طرف دو قدم چلا۔ پھر تھوڑا لہرایا۔ ذرا سا دائیں اور ذرا سا بائیں اور بے ہوش ہو کے دھڑام سے زمین پر گر پڑا۔ دسویں جماعت کے دو لڑکے بھاگے آئے اور اسے اٹھا کر ڈسپنسری میں لے گئے جہاں ایک کمپونڈرہمیشہ موجود رہتا تھا اور ہر آنے والے بیمار کو ایک میٹھی لال دوا پلا دیتا تھا۔

سٹیج پر کھڑے ان چار پانچ لڑکوں نے قومی ترانہ گانا شرو ع کیا اور باقی سکول نے اپنی آواز ان کے ساتھ شامل کی۔ سٹیج کے پیچھے اسمبلی کی طرف منہ کئے کھڑے پرنسپل صاحب بار بار کہتے :Louder....louder

تب میں نے سوچا کہ آج کی طرح روز لیٹ پہنچنا بہتر ہے تاکہ مجھے کبھی اگلی قطار میں کھڑا نہ ہونا پڑے اور تاکہ پرنسپل صاحب کے غضب سے خدا مجھے محفوظ رکھے۔

نئی کلاس کے نئے کمرے میں جو جو جہاں جہاں آکے پہلے دن بیٹھ جاتا، بس و ہی پورے سال کیلئے اس کی سیٹ رہتی۔ اس کو سِٹ ملنا کہتے تھے۔ یعنی کہ جیسے آپ نے کرسی کو ہاتھوں سے مل مل کے اپنا بنا لیا ہو۔ ہاں یہ اور بات تھی کہ کلاس ٹیچر مستقل طور پر، یا کسی اور مضمون کا استاد صرف اپنی کلاس کے دورانیہ کے لیے، کسی کی سیٹ بدل سکتا تھا۔ کلاس ٹیچر اسے کہتے تھے جس کی صبح پہلی کلاس ہوتی تھی۔ اسے کلاس ٹیچر کیوں کہتے تھے، مجھے علم نہیں، مگر شاید اس کا تعلق اس بات سے ہو کہ یہ دن کی پہلی کلاس ہوتی تھی اور اس میں حاضری لگائی جاتی تھی۔ سیٹیں جب بدلی جاتی تھیں تو عموماً سزا یا انعام دینے کے مقصد سے بدلی جاتی تھیں۔ اگلی سیٹیں انعام کے طور پر اور پچھلی سزا کے طور پر۔ گوکہ اس کے عین الٹ ہونا چاہیے تھا اور شرارتی یا نالائق بچوں کو ہمیشہ آگے بٹھائے جانا چاہیے تھا تاکہ استاد کی نظر ان پہ مستقل رہے۔ جو بچے پچھلی کلاس میں اول یا دوم آئے ہوتے، ان کو کلاس کا مانیٹر بنا دیا جاتا۔ اول آئے ہوئے کو فرسٹ مانیٹر اور دوم آئے ہوئے کو سیکنڈ مانیٹر۔ مانیٹر، یعنی وہ لڑکا جو نگرانی کرتا کہ بچے شور نہ مچائیں اور بدتمیزی نہ کریں۔ بس یہ طے شدہ تھا کہ اول اور دوم آئے ہوئے لڑکے ہی مانیٹر بنیں گے، چاہے وہ کمزور اور ڈرپوک ہی کیوں نہ ہو ں، جوفرسٹ اور سکینڈ آنے والے لڑکے اکثر ہوتے بھی تھے۔

میرے کتابوں کے بستے کا ایک لمبا سا سٹریپ تھا جسے میں اپنے سر پہ یوں چڑھا لیتا تھا کہ بستہ پیچھے تقریباً میری پیٹھ کے برابر لٹکا رہتا تھا اور جب میں چلتا تھا تو میری پیٹھ سے بار بار۔۔۔ کبھی دائیں حصے سے، کبھی بائیں حصے سے۔۔۔ ٹکراتا تھا۔ بستے پر PIA لکھا تھا، یعنی پاکستان انٹرنیشنل ائیر لائینز حالانکہ یہ بستہ امی ابا نے مجھے دوکان سے خرید کر دیا تھا، کسی ہوائی جہاز میں سفر کرنے پہ انعام کے طورپر مفت نہیں ملا تھا۔

اس پہلے دن، اس ہولناک اسمبلی کے بعد میں بستہ لٹکائے نئی کلاس میں پہنچا تو تمام سیٹیں ملی جا چکی تھی۔ اپنی کلاس میں اس دن بس میں ہی دیر سے پہنچا تھا اور اب صرف ایک سیٹ، دور، پیچھے، سب سے پیچھے، خالی تھی۔ سیٹیں دو دو کی تین قطاروں میں لگی ہوئی تھیں مگر جہاں مجھے خالی سیٹ ملی تھی وہ اتنی پیچھے تھی کہ بس صرف ایک ہی کرسی میرے دائیں جانب مزید تھی۔ یعنی بائیں جانب کوئی کرسی نہیں تھی۔

ایک گورا سا، لمبا اور توانا لڑکا جس کی داڑھی اگلے چھ ماہ میں شیو کرنے کے قابل ہونے والی تھی میرے ساتھ والی کرسی پہ پہلے سے بیٹھا مجھے دیکھ دیکھ کے مسکرا رہا تھا۔ میں اس کلاس میں باقی سب کو جانتا تھا کیونکہ وہ میرے ساتھ ہی پانچویں جماعت پاس کر کے جونیئر سکول سے آئے تھے۔ صرف یہ لڑکا نیا تھا۔ یہ لمبا لڑکا، جو مجھے دیکھ دیکھ کے تب تک مسکراتا رہا جب تک میں اس کے ساتھ والی کرسی پہ بیٹھ نہ گیا۔ صاف نظر آ رہا تھا کہ یہ لڑکا ہماری کلاس میں باقی سب سے عمر میں بڑا تھا۔

جب میں اپنی سیٹ پر بیٹھ گیا تو بڑا لڑکا کچھ اور مسکرایا، اب کہ اپنے دانت بھی دکھا کے۔

’’کیا نام ہے؟‘‘ اس نے بڑے لڑکوں کی طرح پوچھا اور میر ے جواب دینے سے پہلے ہی کہا: ’’میرا نام ذوالفقار ہے۔‘‘ پھر اس نے ایک اور بڑے لڑکوں والی حرکت کی۔ مجھ سے ہاتھ ملانے کیلئے اپنا ہاتھ آگے بڑھا دیا۔

’’اس سے بات نہ کر۔یہ فیلیئر ہے۔‘‘ سامنے بیٹھے ہوئے عینک والے مکرم نے مڑ کر مجھے بتایا۔

’’یہ تیسری دفعہ فیل ہوا ہے۔‘‘ مکرم پھر بولا۔

ہم جب پاس ہو کے نئی کلاس میں جاتے تھے تو ہمیشہ ایک یا دو بچے وہاں ایسے پاتے تھے جو فیل ہونے کی وجہ سے اگلی جماعت میں جانے کے بجائے اسی جماعت میں ایک سال مزید لگا رہے ہوتے تھے۔ انھیں ہم سب بڑی حقارت سے ’’فیلیئر‘‘ کہہ کر پکارتے تھے اور عام طور پر یہ بات بالکل واضح ہوتی تھی کہ ایسے لڑکوں سے میل ملاپ یا یاری دوستی رکھنا غیر مناسب ہے۔

میں ذرا شرمندہ سا ہوا۔ حالانکہ فیل تو وہ ہوا تھا، مگر پھر بھی، میں شرمند ہ ہو اکہ مکرم مجھے اس کے سامنے یہ بتا رہا ہے کہ وہ فیلیئر ہے اور مشورہ بھی دے رہا ہے کہ اس سے بات نہ کروں۔

’’فیلیئر ہے تو کیا ہوا؟‘‘ میں نے جواباً مکرم سے کہا۔

’’ہاں تو کیا ہوا؟‘‘ فیلیئرنے بھی کہا اور مکرم کی کرسی کو ہلکا سا دھکا دیا۔ ’’تو اپنا کام کر عینکو۔‘‘ پھر اس نے میری طرف دیکھ کر دانت نکالے۔ اسی وقت ہمارے اردو ٹیچر اور کلاس ٹیچر سر شوکت کلاس میں داخل ہوئے۔ کلاس نے کھڑے ہوکر ان کا استقبال کیا اور انھیں سلام کیا۔ انھوں نے رجسٹر کھول کے حاضری لینی شروع کی۔

S1، S2، S3۔۔۔ یعنی شیخوپورہ ہاؤس 1-2-3 وغیرہ۔ وہ اس طرح ہمارے رول نمبر پکارتے گئے اور ہمYes sir, Yes sir کہتے گئے۔ کبھی کبھی کوئی لڑکا Present sir بھی کہہ دیتا تھا۔

L-15 یعنی لاہور ہاؤس 15 شوکت صاحب نے سب سے آخر میں کہا اور ایک لمحے کو ٹھٹک کر اوپر دیکھا۔

Present sir فیلیئرنے کہا اور ڈھٹائی سے دانت نکال کر شوکت صاحب کو دیکھ کے مسکرایا۔

شوکت صاحب نے تاسف سے سر ہلایا۔’’ تمہیں ایک چانس اور مل گیا؟ خدا کرے یہ تمہارا آخری چانس ہو۔‘‘

فیلیئرنے کچھ نہ کہا اور صرف ان کی جانب دیکھ کر مسکراتا رہا۔ شوکت صاحب نے سر تھوڑا اور ہلایا اور حاضری رجسٹر بند کردیا۔ فیلیئر نے میری طرف دیکھ کے ایک زیر لب قہقہہ لگایا اور میری ٹانگ پہ ہلکی سے چپت رسید کی۔ بے وجہ۔

شوکت صاحب کرسی پہ ذرا آرام سے ٹیک لگا کے، ٹانگیں لمبی لمبی پسار کے، بیٹھ گئے۔ مارچ کے اوائل کی اس پیاری صبح باہردرختوں کے پتے سرسرا رہے تھے اور ان سے چھن چھن کے اور لرز لرز کے روشنی کی کرنیں کھڑکیوں سے اندر کمرے میں پہنچ رہی تھیں۔ شوکت صاحب نے برا سا منہ بنایا، شاید اس لیے کہ انھیں اس پیاری صبح یہ کام کرنا پڑ رہا تھا۔ یعنی ایسے غیردلچسپ بچوں کو پڑھانا پڑ رہا تھا جن میں سے کئی نے زندگی میں پہلی بار پتلون پہنی تھی۔

پھر شاید انھوں نے دل ہی دل میں تہیہ کیا کہ ’’آج تو میں ہرگز کچھ نہیں پڑھاؤں گا۔‘‘

انہوں نے بیزاری سے کھڑکی کے باہر درخت کو دیکھا اور دائیں ہاتھ سے اپنی آنکھیں ملنے لگے۔

’’باری باری کھڑے ہوتے جاؤ اور اپنا تعارف کرواتے جاؤ۔ اپنا نام، والد کا نام اور پانچویں جماعت کے امتحان میں اپنی پوزیشن۔‘‘

یہی ہوا۔ ایک ایک کر کے لڑکے کھڑے ہوتے گئے اور یہ سب کچھ بتاتے گئے۔ سب سے پہلے ذاکر اٹھا اور پھر ہارون۔ ذاکر پانچویں میں اول آیا تھا اور ہارون دوم اور دونوں کو توقع تھی کہ مانیٹر بن جائیں گئے۔ یہ دونوں صبح سب سے پہلے آئے تھے اور اس وجہ سے سب سے اگلی قطار میں بیٹھے ہوئے تھے حالانکہ یہ بالکل غیرضروری تھا کیونکہ اگر یہ دیر سے بھی آئے ہوتے تو مانیٹر بن جانے کے بعد شوکت صاحب خود ہی انھیں پہلی قطار میں بیٹھا دیتے اور ایک اہم بات یہ بھی ہے کہ ذاکر چاہے مانیٹر بن جاتا اور اس بات پہ جتنا مرضی اتراتا اور اپنے اول آنے پر جتنا مرضی گھمنڈ کرتا، اسے یہ تو معلوم نہیں تھا نہ کہ ایک روز جب وہ ٹوائیلٹ میں تھا تو میں اور مکرم اسے چابی والے سوراخ سے جھانک کر گندے کام کرتے دیکھتے رہے تھے اور ’’ہی ہی ہی’’ کر کے ہنستے رہے تھے۔

میں چپ بیٹھا بچوں کے تعارف سنتا رہا جو مجھے پہلے ہی سب معلوم تھے۔

’’اوئے، اوئے۔۔۔‘‘ فیلیئر نے سرگوشی میں مجھے پکارا۔

’’دیکھو۔۔۔ یہ دیکھو‘‘ اس نے اپنی گود کی طرف اشارہ کیا۔

’’Shhhh.‘‘ شوکت صاحب بولے۔ ’’آواز نہ آئے۔‘‘

چند لمحوں کے بعد فیلیئر نے پھر سرگوشی کی۔

’’اب دیکھو۔ اب۔ جلدی سے۔‘‘

اف۔

میں کیسے بتاؤں؟ یہ بھلا کوئی ایسی بات ہے جو کوئی کسی کو بتا بھی سکتا ہے؟ کچھ اس سے بھی بھیانک بات روئے زمین پہ آج تک وقوع پذیر ہوئی ہوگی؟

جب میری نظر وہاں اس کی گود پر پڑی، جہاں دیکھنے کی دعوت وہ مجھے دے رہا تھا، تو میں نے پھٹی پھٹی آنکھوں سے دیکھا کہ اس کی پتلون کے کچھ بٹن کھلے ہوئے تھے اور اس نے ان کھلے بٹنوں کو معاشرتی علوم کی کتاب سے کچھ کچھ ڈھانپا ہوا تھا۔ لمحے دو لمحے بعد وہ اس کتاب کو مکمل ہٹا دیتا اور سرگوشی میں مجھے کہتا: دیکھ۔ دیکھ۔ یہ دیکھ۔ مجھے سمجھ نہ آئی کہ کیا کروں۔ میں سخت گھبرا رہا تھا اور گھبرانے سے بھی کہیں زیادہ شرمندگی محسوس کر رہا تھا حالانکہ اس کی اس حرکت میں میرا کوئی قصور بھی نہ تھا۔ تبھی اس نے یکلخت مجھ پہ ایک اور حملہ کیا۔

’’تو بھی دکھا نا۔‘‘ اس نے کہا۔

مجھے تو سانپ سونگھ گیا۔میں بھی دکھاؤں؟

ایسی باتیں اس طرح کرنے کی ہوتی ہیں؟ ایسی شرمناک باتیں۔ اس طرح ہنسی خوشی بھی بھلا اردو کی پہلی کلاس میں کوئی ایسی باتیں کرتا ہے؟ اچانک؟اپنی پتلون کے کھلے بٹنوں کو معاشرتی علوم کی کتاب سے ڈھانپ کے؟

’’دکھا نا۔‘‘ اس نے پھر کہا۔ مگر اب یکایک مجھے محسوس ہوا کہ ارد گرد کچھ گڑبڑ ہے۔ کلاس میں مکمل خاموشی چھا چکی تھی اور کوئی بچہ اپنے تعارفی کلمات نہیں کہہ رہا تھا۔ میں نے سامنے دیکھا تو شوکت صاحب میری جانب گھور رہے تھے۔ ایک ایک کر کے لڑکے بھی پیچھے دیکھنے لگے۔

’’وہاں کیا ہو رہا ہے؟‘‘ شوکت صاحب نے پوچھا اور کرسی سے اٹھ کے میری طرف بڑھے۔

’’سر، سر۔۔۔‘‘ میں نے گھبرا کے کہنا شروع کیا۔

’’وہاں ہو کیا رہا ہے؟ تم کر کیا کر رہے تھے؟‘‘

فیلیئر کمال چالاکی اورسرعت سے اپنی پتلون کے بٹن بند کر چکا تھا۔ ظاہر ہے کہ وہ یہ کام اکثر کرتا تھا اور اس میں طاق تھا۔ اب وہ یوں بیٹھا تھا کہ جیسے شوکت صاحب صرف مجھ سے مخاطب ہوں۔ خود وہ سیدھا، سامنے بلیک بورڈ کو معصومیت سے دیکھ رہا تھا جیسے مجھے سے بالکل لاتعلق ہو۔

’’کچھ نہیں سر۔‘‘ میں نے کہا؛ ’’وہ۔۔۔ وہ۔۔۔‘‘ بھلا ایسی گندی اور شرمناک باتیں بتاتے ہی کیسے ہیں کسی کو؟

شوکت صاحب کچی گولیاں نہیں کھیلے تھے اور فیلئیر کو تو لگتا تھا کہ بہت ہی اچھی طرح جانتے تھے۔ میں جب یہ اول فول بک رہا تھا تو وہ آکر فیلیئر کے عین پیچھے کھڑے ہو گئے اور ابھی میں ’’وہ وہ۔۔۔‘‘ ہی کہے جا رہا تھا کہ انھوں نے فیلیئر کے بال اپنی مٹھی میں پکڑے اور انھیں اوپر کھینچ کر اسے کرسی سے اٹھا کے کھڑا کرنا چاہا۔ فیلیئر بھی شوکت صاحب کو اتنا ہی جانتا تھا جتنا کہ وہ اس کو۔ اس نے بال کھینچنے کا موقع نہ دیا اور خود ہی تیزی سے کھڑا ہو گیا۔

’’سر میں اسے اپنا نام بتا رہا تھا۔‘‘ وہ بولا۔

’’جھوٹ جھوٹ۔‘‘ مکرم نے پیچھے مڑ کے کہا۔’’ سر نام تو اس نے پہلے ہی بتا دیا تھا۔ جب آپ آئے ہی نہیں تھے کلاس میں۔‘‘

’’مانیٹر کون کون ہیں؟‘‘ شوکت صاحب نے پوچھا۔

حالانکہ ابھی کوئی باقاعدہ مانیٹر بنا ہی نہیں تھا، مگر چونکہ ذاکر اول آیا تھا اور ہارون دوم، دونوں اپنی جگہوں پر کھڑے ہو گئے۔

’’سر ذاکر فرسٹ آیا ہے اور ہارون سیکنڈ۔‘‘ مکرم پھر بولا۔

’’اس کا مطلب ہے یہ مانیٹر ہیں۔ ذاکر، جاؤ جا کے دفتر سے کین لے کر آؤ۔‘‘

کین۔ بانس کی موٹی، مہلک سوٹی۔

جس اثنا میں کین کا انتظار ہو رہا تھا شوکت صاحب ہمیں بتا تے رہے کہ فیلیئر کیسا خبیث اور نالائق لڑکا ہے۔ انھوں نے صاف صاف کہا کہ بہتر ہے کہ باقی کلاس فیلیئر سے دور رہے اور اس بات پر کف افسوس ملے کہ اس نالائق بدمعاش کو تیسری بار فیل ہونے کے باوجود ایک موقع اور دے دیا گیا تھا، محض اس لیے کہ وہ پرنسپل صاحب کا دور کا رشتہ دار تھا۔ انھوں نے میری کرسی اٹھواکر کلاس کے دوسرے سرے پر، سب سے بائیں جانب والی قطار کے سب سے پیچھے رکھوا دی۔ میں شرمندہ اور پریشان، کن اکھیوںسے کبھی کبھی فیلیئر کی سمت دیکھتا تھا۔ معلوم ہوتا تھا کہ اسے اس سب کی کافی عادت تھی اور اس لیے وہ اطمینان سے صرف مسکرائے جا رہا تھا اور کبھی کبھی مجھے یا کسی اور لڑکے کو جو اس کی جانب دیکھتا، آنکھ مار دیتا تھا۔

’’آج تمہارا پہلا دن ہے۔‘‘ شوکت صاحب نے مجھ سے کہا۔ ’’تمہیں صرف چار کینز ماروں گا۔‘ یہ کسی ’’سزانامہ‘‘ میں درج نہیں تھا کہ کس بات پر کتنی سوٹیاں پڑیں گی اور پہلے دن کم پڑیں گی یا زیادہ۔ سزا کے معاملے میں جس استاد کا جو دل چاہتا وہ طے کر لیتا تھا۔

مجھے چار سوٹیاں پڑیں۔ ہتھیلیوں پر۔ دو بائیں اور دو دائیں ہتھیلی پر۔ شاں۔۔۔ شاں کر کے کین ہوا کو چیرتی نیچے آتی تھی اور ہتھیلی پہ پڑنے سے پہلے،خوف زدہ کر دیتی تھی۔ میری آنکھوں سے دو آنسو نکلے۔ ایک دائیں آنکھ سے، ایک بائیں آنکھ سے اور میرے ہاتھوں پہ کین پڑنے سے لال لال پتلے نشان بن گئے، ایک دائیں ہاتھ پہ، ایک بائیں ہاتھ پہ۔ کیسا دائیں بائیں ہو رہا تھا سب، پہلے ہی دن۔ آنسو تھوڑی دیر میں جذب ہو گئے اور اس کے کچھ دیر بعد نشان ہتھیلیوں کی کھال میں غائب ہو گئے۔

فیلیئر کو بارہ سوٹیاں پڑیں۔ ایک ایک ہاتھ پہ چھ چھ۔ نشان تو اس کی ہتھیلیوں پہ بھی پڑے ہوں گے مگر آنسو اس کا کوئی نہ نکلا۔ شوکت صاحب ہمیں سزاد ے کے واپس اپنی کرسی پہ چلے گئے تو فیلیئر نے میری طرف دیکھ کر اپنی ہتھیلیاں آپس میں رگڑیں اور مجھے اشارہ کیا کہ میں بھی ایسا ہی کروں۔ مگر میں نے اپنی نظریں شوکت صاحب کی جانب لگا لیں اور ہاتھوں کو پتلون کی جیب میں ڈال دیا۔

میری پوری کوشش تھی کہ فیلیئر سے قطع تعلق کر لوں مگر یہ مشکل تھا۔ کلاس میں سب سے پیچھے دائیں طرف وہ اور بائیں طرف میں بیٹھتا تھا اور ہم دونوں کے درمیان فاصلہ تھا مگر کرسی کوئی نہیں تھی۔ میں اس سے کوئی بات نہیں کرنا چاہتا تھا گوکہ یہ ضرور ہے کہ کبھی کبھی میں اس کی طرف دیکھ لیتا تھا۔ کن اکھیوں سے، کچھ اس خیال سے کہ ضرور کوئی نہ کوئی عجیب بات دیکھنے کو ملےگی۔ اگر کبھی وہ اس لمحے میری طرف ہی دیکھ رہا ہوتا تو میں شرمندہ ہو جاتا یا کبھی ڈھیٹ بن جاتا اور اس کی طرف دیکھنے سے آنکھیں ہٹانے کی بجائے یہ ایکٹنگ کرتا کہ میں اسے نہیں دیکھ رہا بلکہ کسی گہری سوچ میں گم، فضاء میں کہیں اس سے پرے گھور رہا ہوں۔ کلاس کے علاوہ بھی فیلیئر کہیں نہ کہیں میرے مقابل آ ہی جاتا تھا۔ واٹر کولر کے کمرے میں، کینٹین میں، کسی راہداری میں، سڑھیاں چڑھتے اترتے۔ عجیب بات تھی کہ اس نے کبھی مجھ سے بات کرنے کی دوبارہ کوشش نہیں کی۔ دیکھ کے مسکرا دیتا تھا یا کبھی آنکھ مار دیتا تھا۔ بس۔ میں محسوس کرتا تھا کہ اس کا مجھ سے بات نہ کرنا میرے لیے اس کی حقارت کا مظہر تھا اور اس خیال سے میں کڑھتا تھا اور پھر یہ سوچ کر ذرا ہتک بھی محسوس کرتا تھا کہ اس کا ضرور یہ خیال ہوگا کہ دیکھو میں کیسے کیسے جرات مندانہ کاموں میں طاق اور مشاق ہوں جبکہ یہ کیسا ڈرپوک ہے جو صرف چار سوٹیاں پڑنے پر بھی رو پڑتا ہے۔

اس سکول کے کینٹین سے کوئی کھانے کی چیز لے کر نکلنا بہت مشکل کام تھا۔ کینٹین سے ایک راہداری باہر کی جانب آتی تھی اور اس میں ہمیشہ بہت بھیڑ ہوتی تھی۔ اس کی دیوار کے ساتھ ٹیک لگا کر بڑے بڑے لڑکے کھڑے رہتے تھے اور چھوٹے لڑکوں کے برگروں اور چکن پیٹیوں پر ہاتھ مار کر انھیں اچکنے کی کوشش کرتے تھے۔ لڑکے عموماً اپنا برگر یا پیٹی مضبوطی سے پکڑ کے کینٹین سے باہر آنے کی کوشش کرتے تھے مگر پھر بھی اکثر یہ ہوتا تھا کہ باہر پہنچتے پہنچتے ان کے ہاتھوں میں کچھ ملیدے کے علاوہ بہت زیادہ نہیں بچتا تھا۔

مجھے پیسے لیکر سکول جانے کی عادت نہیں تھی بلکہ ایسا کرنے سے کچھ چڑسی تھی۔ کبھی دو تین روزبعدامی زبردستی پیسے پکڑا دیتیں تو میں ایک ڈیڑھ روپیہ رکھ لیتا مگر عام طور پہ جب بھی امی کہتیں کہ پیسے لے لو تو میں کہتا کہ نہیں، ضرورت نہیں ہے۔ یہ بات جھوٹ نہ تھی اور میں صرف اس وجہ سے انکار نہیں کرتا تھا کہ مجھے چڑتھی بلکہ یہ واقعی غیرضروری تھا اور شاید مجھے چڑ تھی ہی اسی لیے کہ جب ضرورت نہیں ہے تو کیوں پیسے لے کر سکول جاؤں؟ جوں ہی آدھی چھٹی کی گھنٹی بجتی، میں اور میرے ایک دو دوست اپنے دوسرے ہم جماعتوں سے پیسے مانگنا شروع کر دیتے تھے۔ کبھی کوئی چار آنے دے دیتا تھا اور کبھی کوئی آٹھ آنے۔ کبھی صرف چکن پیٹی کے پیسے اکٹھے ہوتے تھے اور کبھی برگر اور بوتل کے بھی جمع ہو جاتے تھے مگر ایسا دن کوئی کوئی ہی آتا کہ کسی بھی شے کے لیے پیسے پورے نہ ہو سکیں۔ بریک ختم ہونے سے کوئی پانچ منٹ پہلے ہم یہ کاروبار بند کرکے کینٹین کی طرف بھاگتے اور جلدی سے جس چیز کے پیسے اکٹھے ہوئے ہوتے، وہ خرید کے مزے لے لے کر کھا جاتے۔ بریک ختم ہونے کے آس پاس کینٹین جانے کا یہ بھی فائدہ تھا کہ بڑے بڑے لڑکے، خطرناک لڑکے، تب تک کینٹین کی راہداری سے جا چکے ہوتے تھے۔

میرے پا س اس سوال کا کوئی جواب نہیں ہے کہ ہم ایسا کیوں کر تے تھے۔ یعنی بھیک کیوں مانگتے پھرتے تھے۔ اگر امی کو پتہ چل جاتا کہ میرے ان سے پیسے نہ لینے کی یہ وجہ تھی تو وہ سخت غصے میں آتیں۔تب اس قسم کی باتیں معیوب سمجھی جاتی تھیں اور کچھ گھروں یا علاقوں میں ہو سکتا ہے آج بھی سمجھی جاتی ہوں۔ میرا کسی دوست کے گھر کھانا کھا لینا یا کھا نے کے وقت چلے جانا تک معیوب گنا جاتا تھا سو ظا ہر ہے کہ یوں پیسے مانگنا تو بہت ہی برا سمجھا جاتا۔میں نہیں جانتا کہ جن دوستوں کے ساتھ مل کے میں یہ کام کرتا تھا وہ ایسا کیوں کر تے تھے مگر اپنے بارے میں مجھے بس یہ علم ہے کہ میں نے کبھی یہ نہیں سمجھا تھا کہ اس طرح پیسے مانگنے میں کوئی خراب بات تھی۔ سمجھا ہوتا تو جان بوجھ کے کیوں ایسا کرتا؟ جس طرح ابا کے ایک دوست فضوا نکل کہتے تھے کہ میں واقعی یہ نہیں سمجھتا کہ کوئی خدا موجود ہے۔ اگر سمجھتا کہ ہے اور میرے دل سے آواز اٹھتی کہ ہے، تو کیوں جان بوجھ کے میں کہتا کہ نہیں ہے؟ خاص طور پہ جب کہ آپ یہ بھی بتاتے ہیں کہ جہنم میں خدا کو نہ ماننے والوں کیلئے کیسے کیسے عذاب دینے کے بندوبست مو جود ہیں۔ امی کو فِضو انکل ان باتوں کی وجہ سے سخت ناپسند تھے اور وہ کہتی تھیں کہ میری اللہ پاک سے دعا ہے کہ جب یہ شخص جہنم کی آگ میں جل رہا ہو تو میں وہ منظر دیکھ سکوں۔ جب یہ الٹا لٹکا ہو اور اس کی کھوپڑی کے نیچے دھیمی آنچ کا شعلہ مستقل جلے اور وہ مغز جس کے اندر سے اس کے یہ خیالات برآمد ہوتے ہیں، موم کی طرح پگھل پگھل کر ٹپکے، تو میں وہ منظر دیکھ سکوں۔ جب اس کی زبان کو، جس سے یہ ایسی باتیں بکتا ہے، کالے کو برے اور دیگر سانپ یا بچھو ڈسیں، تو میں وہ منظر دیکھ سکوں۔

اس روز ہم خوب کامیاب رہے تھے اور ہم تینوں کے لیے ایک ایک چکن پیٹی کا بندوبست ہو گیا تھا۔ میں کینٹین سے اپنی پیٹی خرید کر نکلنے لگا تو میرے عین سامنے راہداری میں فیلیئر کھڑا تھا۔ اس نے بڑے اطمینان سے اپنا ہاتھ آگے بڑھایا اور میری پیٹی کا ایک ٹکڑا توڑ کر کھا نے لگا۔

’’چھٹی کہ بعد مجھے ملیں‘‘۔ اس نے ٹکڑا چباتے ہوئے کہا۔ ’’ادھر سائیکل سٹینڈ کی دیوار کے ساتھ‘‘۔

سائیکل سٹینڈ کینٹین کے پیچھے تھا اور تین طرف سے کھلا تھا۔ اس کی دیوار ایک ہی طرف تھی اور اس دیوار کے پیچھے بڑے بڑے درخت اور ان کے پیچھے ٹینس والا گراؤنڈ تھا۔

’’کیوں؟ کیا ہے؟‘‘ میں نے گھبراکے پوچھا گو میں کچھ خوش بھی ہوا کہ آج اس نے حقارت نہیں دکھائی اور مجھے شاید اپنے برابر کا سمجھا ہے۔

’’ملیں نا بس۔ کچھ دکھانا ہے‘‘۔ فیلیئرنے کہا اور چکن پیٹی کا ایک اور ٹکڑا توڑ کے چلتا بنا۔

دکھانا ہے؟ میں لرز اٹھا کہ کہیں وہی ذلیل حرکت تو نہیں کر نی اس نے دوبارہ؟ مگر مجھے یہ بھی معلوم تھا کہ میں اس دہشت ناک امکان کے باوجود سائیکل سٹینڈ کے پیچھے ضرور جاؤں گا۔

جب میں چھٹی کے بعد وہاں پہنچا تو فیلیئر دیوار کے پیچھے کی بجائے اپنی سائیکل تھامے سامنے ہی کھڑا تھا۔

’’ ادھر نہیں۔ ادھر سینئر لڑکے بہت ہیں۔ میرے ساتھ آ‘‘۔ اس نے کہا۔

’’کہاں؟‘‘ میں نے پوچھا۔

’’میرے گھر۔ میری سائیکل پہ جائیں گے۔ گھر پہ کوئی نہیں ہے۔‘‘

’’تمھارے گھر؟ کیوں؟ دکھانا کیا ہے؟‘‘ میں نے خوف سے پوچھا۔

’’چل آ جلدی۔‘‘ اس نے میرے سوالات کا جواب دیئے بغیر کہا۔

میں نے کہا کہ میں گھر بتائے بغیر اس طرح سکول سے کسی اور کے گھر نہیں جا سکتا خاص کر جب کہ میں اسے بالکل بھی جانتا نہ تھا۔ فیلیئر یہ سن کر غصے میں آیا اور اس نے کہا کہ ٹھیک ہے، تمھاری مرضی۔ نہیں دیکھنا تو نہ دیکھو۔

’’دکھانا کیا ہے؟‘‘

’’نہ۔ بتا نے کی بات نہیں ہے۔ گھر چل۔ وہیں دکھاؤں گا۔ پھر تجھے سائیکل پہ واپس بھی چھوڑ دوں گا۔ چل آ۔‘‘

میں اس کی سائیکل پہ پیچھے کیرئیر پر بیٹھ گیا اور اس نے پیڈل مارنے شروع کیے۔

’’کسی کو بتانا نہیں ہے۔ اچھاـ؟‘‘

’’اچھا۔‘‘ میں نے کہا۔ حالانکہ کچھ پتہ نہ تھا کہ دکھانا کیا ہے۔

اس کا گھر زیادہ دور نہیں تھا۔ گیٹ پر شلوار قمیض میں ملبوس ایک چوکیدار کھڑا تھا اور اندر ایک نیلی ٹیوٹا گاڑی کھڑی تھی۔

’’اماں بابا دوسری کار میں گاؤں گئے ہیں۔‘‘ اس نے سائیکل روک کر کہا۔ ‘‘مجھے گاڑی بھی چلانی آتی ہے۔‘‘

’’مجھے نہیں آتی۔‘‘ میں نے کہا۔

وہ گھر میں داخل ہوکر مجھے سیڑھیوں سے اوپر کی منزل پر لے گیا اور کمرے میں لے جا کے دروازے کو اندر سے کنڈی لگا دی۔ پھر اپنے سکول بیگ میں سے ہی اس نے دو چمکدار کاغذوالے رنگین رسالے نکالے۔

’’یہ لے۔ دیکھ۔ بیٹھ جا۔‘‘

میں نے بیٹھنا کیا تھا، ان عجیب و غریب رسالوں کو دیکھتے ہی میری آنکھیں خوف اور حیرت سے باہر نکل آئی تھیں۔وہیں کھڑے کھڑے میں نے تھوک نگلی اور ان کے صفحے پلٹنے لگا۔ ننگے لوگ۔ اتنے بہت سے اور اس قدر ننگے لوگ؟ آدمی اورعورتیں۔ اس طرح کیوں ان ننگے لوگوں نے اپنی تصویریں کھینچوائی تھیں؟ اور پھر رسالوں میں چھپوا بھی دیں؟ یہ کیسے لوگ ہوں گے؟ ان کے گھر والے انھیں کچھ نہیں کہتے ہوں گے؟ جس جس طرح کی وہ تصویریں تھی اور جو جو وہ ننگے لوگ ان میں کر کے ساری دنیا کو دکھا رہے تھے اس سے میں بےحد حیران اور خوفزدہ تھا۔ یہ ایسا کیوں کر رہے ہیں؟ اس بات کی کیا ممکنہ وجہ ہو سکتی ہے؟ اگر یہ بور ہو رہے تھے، یا ان کے پاس کرنے کو کوئی کام نہیں تھا تو یہ تفریح کے لیے کسی باغ کی سیر کو جا سکتے تھے یا ہاکی کھیل سکتے تھے اور ان میں جو لڑکیاں تھیں وہ سلائی کڑھائی میں اپنا دل لگا سکتی تھیں۔ خاص یہی مشغلہ اختیار کرنے کی کیا ضرورت تھی؟ میں سوچوں میں گم صفحے پلٹتا رہا۔ اس قدر لا تعداد ننگے لوگ؟

مجھے خیال ہی نہ رہا کہ فیلیئر بھی کمرے میں موجود ہے۔ اس نے میرے کندھے پہ ہاتھ رکھا اور کہا’’ بیٹھ جا، بیٹھ کے آرام سے دیکھ نا۔‘‘

’’تجھے پتہ ہے’’ سیکسی ’’کا کیا مطلب ہوتا ہے؟‘‘ اس نے پوچھا۔

’’کس کا؟۔ ‘‘

’’سیکسی کا۔ ‘‘

میں نے یہ لفظ پہلے بھی سنا ہوا تھا اور اب سے کافی پہلے جب ایک بار اسے سنا تھا تو نوید بھائی سے پوچھا بھی تھا کہ اس کا کیا مطلب ہوتا ہے۔ انھوں نے کہا تھا کہ اس کا کوئی خاص مطلب نہیں ہوتا اور یہ ایک مہمل سی بات ہے۔ جب غصہ آئے، یا کوئی کام ٹھیک سے نہ ہو تو جیسے ’’اوہو’’ کہہ سکتے ہیں، ویسے ہی یہ لفظ کہہ دیتے ہیں۔ لیکن کہنا نہیں چاہیے۔ مگر اب، اس وقت فیلیئر کیوں مجھ سے اس کے معنی پوچھ رہا تھا؟

’’اوہو۔‘‘ میں نے کہا اور اپنی دانست میں فیلیئر کو اس لفظ کے معنی بتائے۔ مگر فیلیئر کو کچھ سمجھ نہ آئی۔ شاید اس کو بھی صحیح طرح سے نہیں پتہ تھا۔

’’یہ دیکھ۔۔۔ یہ۔۔۔ یہ لوگ جو کر رہے ہیں نا، یہ سیکسی ہوتا ہے۔‘‘ اس نے کہا۔ ‘‘یہ سارے سیکسی کام کر رہے ہیں۔‘‘ میں نے حیرت سے اس کی طرف دیکھا۔ وہ بکواس کر رہا تھا یا نوید بھائی کو اس لفظ کے معنی نہیں پتہ تھے؟ اس خیال سے میں ملول ہوا کہ اس چیز کا امکان پیدا ہوا تھا کہ کوئی بات ایسی بھی ہے جس کا نوید بھائی کو صحیح طرح علم نہیں ہے۔

’’تجھے نہیں پتہ تھا نا؟؟‘‘ فیلیئر نے پوچھا۔

’’نہیں۔‘‘ میں نے تھوک نگل کے کہا۔

’’میری گرل فرینڈ بھی ہے۔‘‘ اس نے فخر سے کہا۔‘‘ فون گرل فرینڈ۔ فون پہ باتیں کرتی ہے۔‘‘

کچھ لمحے فیلیئرخاموشی سے مجھے رسالوں میں منہمک دیکھتا رہا اور خوف سے زرد ہوتے میرے چہرے کے رنگ سے شاید لطف اٹھاتا رہا۔

’’نہانا ہے؟‘‘ وہ بولا۔ ’’شاور میں؟ میرے باتھ روم میں شاور ہے۔‘‘

’’نہانا؟ کیوں؟‘‘ میں نے حیرت سے پوچھا۔

’’ویسے ہی۔ شاور میں؟ چل دونوں نہاتے ہیں۔‘‘

اسی وقت دروازے پہ دستک ہوئی اور میں بری طرح ہڑبڑا اٹھا۔ اس کی پیش کش سے بھی اور دروازے کی دستک سے بھی اور میں نے رسالے جلدی سے پلنگ کے نیچے پھینک دیے۔

’’صاحب کھانا۔‘‘ باہر سے آواز آئی۔

’’اوہو‘‘ فیلیئرنے افسوس سے کہا اور میری طرف دیکھا۔

’’میں جاؤں؟‘‘ میں نے پوچھا۔

’’ٹھہر جا۔ کھانا پڑا رہےگا۔‘‘ اس نے کہا۔’’ چل نہاتے ہیں۔‘‘

مگر میں ایسا گھبرا چکا تھا کہ اب مزید وہاں ٹھہرنانہ چاہتا تھا۔ ابھی مجھے اس حیرت انگیز اور خوفناک معاملے کو ہضم کرنے کے لیے کچھ وقت درکار تھا۔ ان بلا وجہ ننگے لوگوں کو، اس لفظ سیکسی کے نئے معنی کو اور فیلیئر کی اس شاورمیں غیر ضروری طور پر نہانے کی دعوت کو۔ میں نے کہا کہ نہیں مجھے جانا چاہیے کیونکہ امی کھانے پر میرا نتظار کریں گی اور یہ نہ ہو کہ اتنی دیر ہو جائے کے وہ غضبناک ہو جائیں۔

’’میری سائیکل لے جا۔ کل سکول لے آنا۔ ‘‘ اس نے کہا۔

لیکن میں اس کی سائیکل نہیں لے جا نا چاہتا تھا۔ مجھے یقین نہیں تھا کہ وہ کیسا لڑکا ہے۔ یعنی سکول کے اس پہلے روز اسنے جو کیا تھا اور پھر آج جو چیزیں اس نے مجھے اپنے گھر لے جاکے دکھائی تھیں اور جس جس طرح کی باتیں کی تھیں، وہ کیسے لڑکے کر تے ہیں؟ اچھے؟ برے؟ یابڑے ہی بدمعاش اور خراب؟ یا نہ اچھے نہ برے، بس لڑکے جو عمر میں بڑے ہونے لگتے ہیں؟ اور یہ بھی تھا کہ میں کسی اور لڑکے کی سائیکل لے کے گھر نہیں جا نا چاہتا تھا۔ امی اس پہ کچھ زیادہ خوش نہ ہوتیں اور بہت سوال جواب کرتیں۔ میں نے فیلیئر سے کہا کہ میرا گھر قریب ہی ہے اور میں بہت آرام سے پیدل جا سکتا ہوں، اس لیے سائیکل کی ضرورت نہیں ہے۔

۔۔۔۔۔۔

یہ فیلیئر کے گھر جانے کے بہت عرصہ بعد کی بات نہیں ہے کہ ایک دن جب میں، طلعت، سائمو، قمر اورعاقب، مظہر کے گھر جمع تھے، مظہر نے اعلان کیا کہ طلعت کو ایک نہایت خطرناک بیماری ہو چکی ہے جس کا نام پلیگ ہے۔