پہلا پتھر

تب شاستری اور فریسی ایک عورت کو لائے جو بدکاری میں پکڑی گئی تھی اور اس کو بیچ میں کھڑا کر کے کہا،

اے استاد! یہ عورت بدکاری کرتی ہوئی پکڑی گئی ہے۔

موسیٰ کے قانون کے مطابق ایسی عورت کو سنگسار کرنا جائز ہے۔ سو تو اس عورت کے بارے میں کیا کہتا ہے؟

جب وہ اس سے پوچھتے رہے تو اس نے سیدھے ہوکر ان سے کہا، ’’تم میں سے جس نے کوئی گناہ نہ کیا ہو۔ وہ پہلے اس کو پتھر مارے۔

(یوحنا رسول: آیت ۴۰۳، ۷۷۵)

(۱)

رندہ ہاتھ سے رکھ کر باج سنگھ نے چوکنا تیتر کی طرح گردن دروازے سے باہر نکالی اور ایک نظر شاہی اصطبل پر ڈالی۔۔۔ کوئی خاص چیز دکھائی نہیں دی۔ حالانکہ اسے شبہ یہی ہوا تھا کہ گھکی بڑے دروازے میں کھڑی کسی کو آواز دے رہی تھی۔ وہ اس خیال سے اٹھا تھا کہ اندھیرے میں گھکی کی ایک آدھ چمی لے لینا مشکل نہ ہوگا۔

’’شاہی اصطبل‘‘ در اصل اصطبل نہیں تھا بلکہ یہ سردار ودھاوا سنگھ کی شاندار حویلی تھی جسے باج سنگھ عرف باج اور اس کے چیلے چانٹے شاہی اصطبل کے نام سے پکارتے تھے۔ حویلی کی سب سے بڑی خوبی تھی اس کی کشادگی۔ یہ حویلی ایک بہت بڑے صندوق کے مانند تھی۔ چھت کاطول و عرض اتنا کہ پوری بارات کے لیے چارپائیاں بچھائی جا سکتی تھیں۔ بڑے بڑے ہال کمرے، دروازے آٹھ آٹھ فٹ اونچے۔ ان ہال کمروں میں عظیم الجثہ سردار ودھاوا سنگھ فیل پاکے باعث زخمی شیر کی طرح اینڈھ اینڈھ کر چلا کرتے تھے۔ حویلی کاایک حصہ لیبل پرنٹنگ پریس کے لیے وقف تھا۔ اس کے علاوہ حویلی کے اندر کی جانب بڑے دالان کے گوشے میں نانک فرنیچر مارٹ کے مالک بھی سردارجی ہی تھے۔ فرنیچر کا کارخانہ یہاں تھا اور شوروم حویلی کی دوسری طرف یعنی عین برلب سڑک۔

باج ہیڈمستری تھا۔ ہاتھ کی صفائی اور حرمزدگی کی ’چستی‘ کے باعث سب کارندوں کا، خواہ وہ کارخانے کے ہوں یا پریس کے، وہ استاد سمجھا جاتا تھا۔ حویلی کے بغل میں سڑک کی جانب چند دکانیں تھیں مع مکانات کے۔ یہ سب سردارجی کی ملکیت تھیں۔ آخر ان کے آبا و اجداد جالندھر شہر ہی میں رہتے آئے تھے۔ اس لیے اتنی سی جائداد کا بن جانا غیر معمولی بات نہیں تھی۔

جب ۱۹۴۷ء کے آغاز میں مغربی پنجاب کے مسلمان بھائیوں نے اپنے کراڑ اور سکھ بھائیوں کا ناکہ بند کر دیا تو رفیوجیوں کی ایک بڑی تعداد مشرقی پنجاب میں آ گئی۔ ان میں گھکّی کا باپ دیوی داس بھی تھا۔ پیشے کے اعتبار سے وہ بنیا تھا۔ چنانچہ سردارجی نے حویلی کے بالکل بغل والا دکان اور مکان ازراہِ کرم اسے کرایہ پر دے ڈالا اور وہ وہاں پنساری کی دکان کرنے لگا۔ اس کی بیوی کو مسلمان بھائیوں نے ہلاک کر دیا تھا۔ لیکن اس کا اپنی تین جوان لڑکیوں سمیت صحیح سلامت نکل آنا معجزے سے کم نہیں تھا۔ ان میں سے سب سے بڑی کانام گھکّی، اس سے چھوٹی کا نام نکی اور سب سے چھوٹی کا سانولی تھا۔ سانولی اندھی تھی۔

گھکّی خوبصورت اور بانکی لڑکی تھی۔ موقعہ پاکر سب سے پہلے باج سنگھ نے اس کی چمی لی تھی۔ بوسہ لینے کے سلسلےمیں کھل جا سم سم تو باج نے کی، لیکن اس کے بعد باقی لوگوں کا راستہ بھی صاف ہو گیا۔ اس میں امیر و غریب کی تخصیص نہیں تھی۔ سردار صاحب کے بیٹے، ان بیٹوں کے دوست اور کارندے وغیرہ سب ایک آدھ چمی کی تاک میں رہتے۔ یہ بات نہیں تھی کہ ان میں سے ہر ایک کا داؤ چل ہی جاتا ہو۔ بعض تو دور ہی سے چٹخارے لینے والوں میں سے تھے۔ کیونکہ گھکّی بقول لیبل کاٹنے والے چرن کے ’بڑی چلتی پرزی‘ تھی۔ پٹھے پر ہاتھ نہیں رکھنے دیتی تھی کسی کو اور تو اور خود باج سنگھ جو بڑا دیدہ دلیر اور گھسڑم گھساڑ قسم کا آدمی تھا، چمی سے آگے نہ بڑھ پاتا تھا، تو بھلا دوسروں کو وہ قریب کہاں پھٹکنے دیتی تھی۔

مایوس ہوکر باج سنگھ ہونٹوں پر زبان پھیرتے ہوئے کارخانے کے دروازے ہی میں کھڑا رہ گیا۔ اس کے بازو کہنیوں تک لکڑی کے برادے سے سنے ہوئے تھے۔ پینتالیس بہاریں دیکھنے کے بعد بھی اس کابدن اکہرا اور مضبوط تھا۔ صورت گھناؤنی ہونے سے بال بال بچی تھی۔ مونچھوں کے بال جھڑبیڑھی کے کانٹوں کی طرح ہوگئے تھے۔ ہونٹ موٹے۔ ایک آنکھ میں پھولا۔ اونٹ کے کوہان کی طرح ناک کے نتھنوں میں سے بال باہر نکل آیا کرتے تھے، جنہیں وہ چمٹی سے کھینچ ڈالتا۔ آج سے دس برس پہلے اس کی بیوی مر گئی۔ بیوی کے چھ مہینے بعد اس کی اکلوتی بچی بھی چل بسی۔

وہاں کھڑے کھڑے باج نے دیکھا کہ جس ہل چل کا اسے احساس ہوا تھا، وہ بالکل بے معنی نہیں تھی۔ کیونکہ حویلی کے یکے بعد دیگرے چار دروازوں سے پرے باہر والے برآمدے میں برقی روشنی ہو رہی تھی۔ لکڑی کے چھوٹے سے پھاٹک میں سے کچھ سامان اندر لایا جا رہا تھا۔ جس سے ظاہر ہوتا تھا کہ ضرور کوئی نیا مہمان آیا ہے۔ جب سے مغربی پنجاب میں گڑبڑ شروع ہوئی تھی، سردار جی کے یہاں کافی مہمان آ رہے تھے۔ کچھ عرصہ پہلے ان کے ایک ہندو دوست اپنے بال بچوں سمیت آگئے، ان کا ایک نوجوان لڑکا تھا۔ چمن۔۔۔!

اس کی گردن مور کی سی تھی اور آنکھیں سرمیلی۔ وہ بھی گھکّی کو دلچسپی کی نظروں سے دیکھتا تھا۔ باج کے چیلے چانٹوں کا خیال تھا کہ گھکّی بھی اس پر مرتی تھی۔ باج کے دل میں حسد پیدا نہیں ہوا۔ وہ ان چیزوں سے بالاتر تھا، کہتا، ’’ارے ہماراکیا ہے۔ ہم نے آتے ہی گھکّی کی چمیاں لے کر اسے کانی کر ڈالا۔ اب چاہے ٹنڈا لاٹ بھی اس کی چمی لیا کرے ہمارے۔۔۔ سے۔‘‘ یہ کہہ کر وہ اپنی ایک ثابت اور دوسری پھولاماری آنکھ سے سب کے چہروں کا جائزہ لیتا۔ جب چمن کے گھروالے الگ مکان لے کر رہنے لگے تو پھر بھی سردارجی کےیہاں چمن کی آمد ورفت جاری رہی۔ ادھر باج نےگھکّی سے زیادہ اس کی چھوٹی بہن نکی کو اپنی توجہ کا مرکز بنایا۔

دروازے میں کھڑے کھڑے پہلے تو باج کے دل میں آئی کہ جاکر نئے مہمانوں کو دیکھے۔ شاید کوئی ’لنڈیا‘ بھی ان میں شامل ہو لیکن آج کل کام بہت آیا ہوا تھا، جسے جلد از جلد ختم کرنا ضروری تھا۔ ’’ہٹاؤ‘‘ اس نے دل ہی دل میں کہا، ’’صبح سب کچھ سامنے آجائے گا۔‘‘

(۲)

دوسرے روز آنکھ کھلی تو باج نے جلتا پھنکتا سورج اپنی پیشانی پر چمکتا ہوا پایا۔ ادھر یہ ہڑبڑا کر اٹھا، ادھر بڑی سردارنی حسب معمول بھوری بھینس کی طرح کدو کدو بھر چھاتیاں تھلتھلاتی، سینہ زوریاں دکھلاتی آگ جلانے کے لیے برادہ لینے کے واسطے چھاج ہاتھ میں پکڑے اس کی جانب بڑھی۔ بڑی سردارنی کے جسم کا ہر عضو اپنے نقطہ عروج تک پہنچ چکا تھا۔ یعنی جو چیز جتنی موٹی، جتنی بھدی، جتنی کشادہ ہو سکتی تھی، ہوچکی تھی، چلتی تو یوں معلوم پڑتا جیسے تنور ڈھانپنے والے چاپڑ کو پاؤں لگ گئے ہوں۔

ایسی ڈبل ڈوز سردارنی بھی سردار جی کے لیے ناکافی ثابت ہوئی۔ چنانچہ انہیں ایک چھوٹی سردارنی بھی کہیں سے اڑا کر لانی پڑی۔ لیکن جب سے ان کے فوطوں میں پانی بھر آیا تھا، تب سے انہوں نے سردارنیوں سے توجہ ہٹا کر ہر روز کئی کئی گھنٹے مسلسل گوربانی کے پاٹھ پر مرکوز کردی تھی۔ موقعہ ملنے پر بڑی سردارنی ضرورت سے زیادہ دیر تک باج کے پاس کھڑی رہتی۔ کیونکہ باج نہایت مسکین بن کر کئی بار کہہ چکا تھا، ’’پروڈھی سردارنی! آپ بیالیس برس کی تو نہیں دکھائی دیتیں جی۔۔۔! جی! آپ تو مشکل سے تیس برس کی دکھائ دیتی ہیں۔‘‘

اس پر بڑی سردارنی دل ہی دل میں چہک اٹھتیں اور غین (غ) کی طرح منہ بناکر فرماتیں، ’’ہٹ وے پراں۔ کون کہتا ہے میں بیالیس برس کی ہوں۔‘‘ اس کے بعد وہ دروازے سے کندھا بھڑائے جمی کھڑی رہتیں۔ ایک ٹانگ سیدھی رکھتیں اور دوسری ٹانگ کو دھیرے دھیرے حرکت دیتی رہتیں۔ ڈھکے ہوئے پپوٹوں تلے دبی ہوئی پتلیاں باج کے چہرے پر جمائے رکھتیں۔ باج دل ہی دل میں سوچتا کہ گھکّی کی کمر تو بڑی سردارنی کی پنڈلی سے بھی پتلی ہوگی۔

بالآخر جب سردارنی ٹوٹے ہوئے جھاج میں برادہ بھر کر لوٹیں تو ان کے پچھواڑے کا نظارہ دیکھ کر باج کے منہ سے بے اختیار نکل گیا، ’’بلے بلے۔‘‘ پھر اپنے ایک نوجوان ساتھی بونگے سے مخاطب ہوکر بولا، ’’کیوں او بونگیا! اگر سردار جی پھیل بے جنجیر ہیں تو سردارنی بھی وہ چٹان ہے جو جتنی جمین سے باہر ہے، اس سے چارگنا جمین کے اندر دھنسی ہوئی ہے۔‘‘ یہ کہہ کر اس نے پھلاہ کی داتن منہ میں ڈالی تو اس کی چرمراہٹ سے اس کا بدصورت چہرہ اور زیادہ بھدا ہوگیا۔ بونگے نے جواب دیا، ’’ابے تو سردار جی کو کیا سمجھتا ہے۔ اگر سردارنی چارگنا زمین کے اندر ہے تو سردار جی دس گناجمین میں دپھن ہیں۔‘‘ باج نے بیٹھے بیٹھے مریل بونگے کو لات رسید کرتے ہوئے کہا، ’’اوئے چل اوئے مئوں دیا متراڑا۔‘‘ جو بات یاد آئی تو پھر بولا، ’’پربونگیا گھکّی کی کمر تو سردارنی کی پنڈلی سے بھی کم موٹی ہوگی۔۔۔‘‘

’’تو پھر؟‘‘

’’نا نا۔۔۔ سوچو بھلا اتنی پتلی کمر۔۔۔ بہت پتلی کمر ہے جار! اتنا ناجک لک۔‘‘

’’اوبئی!‘‘ بونگے نے مشفقانہ انداز میں کہنا شروع کیا، ’’عورت کی کمر میں بڑی طاقت ہوتی ہے۔ مرد کی ساری طاقت چھاتی میں اور عورت کی کمر میں ہوتی ہے۔‘‘

’’ہچھا!‘‘ گھاگ باج نے گال کے اندر زبان گھمائی۔ اسی اثنامیں چمن بھی ادھر آ نکلا۔ وہ ہر وقت چمکتا رہتا تھا۔ باچھوں میں سے ہنسی یوں پھوٹی پڑتی تھی جیسے وہ ریوڑیاں کھا رہا ہوں۔ چلتا تو لہرا کے۔ بات کرتا تو بل کھا کے۔ بونگے نے کہا، ’’لے بھئی! گھنیا جی تو آگئے۔‘‘

’’گوپی بھی آتی ہی ہوگی۔‘‘ باج نے چھدرے دانتوں کی نمائش کی اور منہ سے ٹپکتی ہوئی رال کو بمشکل روکا۔ بونگے نے پہلے تو چمن کو دل پھینک انداز سے دیکھا اور پھر ایک آنکھ بند کرکے دوسری آنکھ باج کی بغیر پھولے والی آنکھ سے ملائی اور گھی میں ڈوبی ہوئی آواز میں بولا، ’’جار! جیہ لونڈیا بھی گوپی سے کم نمکین نہیں ہے۔‘‘ باج نے ایک اور لات رسید کی، ’’بڑا ٹھرکی ہے بے تو۔‘‘ بونگے نے بھاؤ بنا کر گانا شروع کیا، ’’اوئے بھگت لبوب کبیر بھی تو فرما گئے ہیں کہ اوئے کچا منڈارن درگا۔۔۔‘‘

عین اس وقت چھوٹی سردارنی بھی کولہے مٹکاتی دھم دھم کرتی دروازے سے نکل کر صحن میں آن پہنچیں۔ کہنے کو تو وہ چھوٹی سردارنی تھیں لیکن ڈیل ڈول کے لحاظ سے اگر بڑی بیس تھیں تو وہ انیس۔ یوں معلوم ہوتا تھا جیسے دھنیے نےمنوں روئی دھنک کر ہوامیں اڑا دی ہو۔ البتہ نقوش تیکھے تھے۔ رنگ نکھرا ہوا تھا۔ چہرہ چکنا چپڑا۔ اگلے دو دانتوں میں سونے کی میخیں۔

مشہور تھا کہ وہ سردار جی کی بیاہتا نہیں تھیں۔ بقول باج کچھ جیر جبر معاملہ تھا۔ باوجود موٹاپے کے چھوٹی سردارنی کی بوٹی بوٹی تھرکتی تھی۔ بڑی سردارنی کو حالات نے ذرا فلسفی بنا دیا تھا اور حالات ہی نے چھوٹی سردارنی کو ’’چل چل چنبیلی باغ میں میوہ۔۔۔ الخ‘‘ بنا دیا تھا۔ یہی وجہ تھی کہ بڑی سردارنی کے سامنے لونڈے لونڈیاں آپس میں ہنسی ٹھٹھول کرنے سے کتراتی تھیں۔ لیکن چھوٹی سردارنی کے سامنے کھلے بندوں چھیڑ چھاڑ کا بازار گرم رہتا۔ گرما گرمی میں چھوٹی سردارنی کی کمر میں بھی ایک آدھ چٹکی بھرلی جاتی، جس پر وہ نوخیز لڑکی کے مانند کلبلاتی بل کھاتی اور کھل کھلاتی تھیں۔

وہ رنگین محفلوں کی جان تھیں۔ ان کی عمر اگر چہ پینتیس سے تجاوز کر چکی تھی، تاہم سردار جی اب بھی ان کی نگرانی کرتے تھے۔ کیونکہ چھوٹی سردارنی چلتی تو جھمکڑے کے ساتھ، بیٹھتی تو جھمکڑے کے ساتھ۔ اس کی بے تکلفانہ محفلوں میں آنکھیں لڑانے، چٹکیاں لینے اور ہائے وائے کرنے کے مواقع بڑی آسانی سے فراہم ہو جاتے تھے۔ شاذونادر وہ ایک آدھ بدتمیزی پر چیں برجبیں بھی ہو جاتیں تو سب لڑکے اور لڑکیاں انہیں منانے لگتے۔ ان کے بدن کو سہلایا جاتا۔ ان سے لپٹ لپٹ کر خوشامدیں کی جاتیں۔ آخر کار وہ من جاتیں۔

چنانچہ اب جو وہ صحن میں داخل ہوئیں تو گویا نسیم سحری کی طرح آئیں اور اپنے ہمرکاب نہ صرف بوئے چمن لائیں بلکہ اپنے اوٹ میں نرگس، نسرین اور گلاب وغیرہ بھی لائیں یعنی گھکّی، نکی اور سانولی اور دیگر لڑکیاں بھی ان کے پیچھے چھپی چھپی آ رہی تھیں۔ مقصود اس سے حاضرین کو تعجب انگیز مسرت بہم پہنچانا تھا۔ وہی بات ہوئی کہ دفعتاً ’’اوئے‘‘ کے شور سے فضا گونج اٹھی اور کچے کنوارے قہقہوں کی مسلسل موسیقی سے سارا صحن رسمسا گیا۔ ان سب سے دور، سڑک والے کمرے میں کسی جٹاجوٹ سنیاسی کی طرح پاٹھ کرتے ہوئے سردارجی کے کان بھی ان آوازوں سے تھرتھرائے، پیشانی کے خطوط گہرے ہوگئے۔ انہوں نے جلدی سے اپنے بڑے بڑے دانتوں پر ہونٹ پھسلا کر بے چینی سے پہلو بدلا وار غرا کر کہا، ’’باہگورو نام جہاز ہے، جو چڑھے سو اترے پار۔‘‘

(۳)

داتن کی آخری منزل پر پہنچ کر باج نے بڑا کنستر اٹھایا اور صحن کے پرلے گوشے میں دستی نلکے کے قریب پہنچا۔ اب فضا نسبتاً پرسکون تھی۔ کچھ لوگ تو چھوٹی سردارنی کو گھیرے تھے، باقی اپنے اپنے مشاغل میں محو تھے۔ کنستر نلکے کےنیچے رکھ کر باج نے دستی کے دوچار ہاتھ ہی چلائے ہوں گے کہ سامنے سے نکی جلد جلد قدم اٹھاتی ہوئی اس کی جانب آئی اور آتے ہی بولی، ’’کنستر اٹھاؤ تو۔۔۔‘‘ باج کی خوشی کا بھلا کیا ٹھکانا تھا۔ داتن چباتے چباتے اس کا منہ رک گیا۔ آنکھوں کے گوشے شرارت اور حرمزدگی کے باعث سمٹ گئے۔

’’نی گڑیے کی گل اے۔‘‘

’’اے دیکھ گل ول کچھ نہیں۔ کنستر ہٹا جھٹ پٹ۔‘‘

باج نے دانت پیس کر ہاتھ پھینکا۔ لیکن معلوم ہوتا ہے کہ نکی پہلے ہی سے تیار تھی۔ جھپ سے پیچھے ہٹ کر بدن چرا گئی اور نیم معشوقانہ انداز سے چلا کر بولی، ’’ہم کیا کہہ رہے ہیں کنستر ہٹانا۔‘‘

’’اری کنستر سے کیا بیر ہے۔۔۔ ہماری ہر چیز سے بدکتی ہو۔‘‘

’’پانی پیئں گے۔‘‘ باج نے کسنتر ہٹا دیا، ’’لو جانی پیو اور جیو۔ جیو اور پیو۔‘‘ نکی نے نل کے نیچے ہاتھ رکھ دیا اور قدرے انتظار کے بعد انجن کی سیٹی کی سی آواز میں چلائی، ’’اے ہے۔۔۔ دستی ہلاؤ۔‘‘ باج نے صوفیانہ رمز کے ساتھ جواب دیا، ’’تم ہی ہلاؤنا دستی۔۔۔‘‘

’’دیکھو تنگ مت کرو۔‘‘

’’اری نام نکی ہے تو اس کا یہ متبل تو نہیں کہ تو سچ مچ نکی (چھوٹی) ہے۔‘‘

’’چھوٹی نہیں تو کیا بڑی ہوں۔‘‘ نکی نے نچلا ہونٹ ڈھیلا چھوڑ کر شکایت آمیز نگاہ اس پر ڈالی۔ اب باج نے بڑی فراخ دلانہ ہنسی ہنس کر دستی ہلانا شروع کی۔ پانی پی کر نکی بھاگنے لگی تو باج نے فوراً اس کی کلائی دبوچ کر ہلکا سا مروڑا دے دیا۔

’’اوئی۔‘‘

’’کیا ہے؟‘‘

’’میری کلائی ٹوٹ جائے گی۔‘‘

’’یہاں دل جو ٹوٹا پڑا ہے۔‘‘

’’چھوڑنا! کوئی دیکھ لے گا۔‘‘

’’اری کبھی ہم سے بھی دو بات کر لیا کر۔‘‘

’’کہانا، کوئی دیکھ لے گا۔‘‘

’’تو پھرآئے گی نا ہمارے پاس۔‘‘

’’میں نہیں جانتی۔‘‘

ایک اور مروڑا۔ نکی کو واقعی سخت تکلیف ہو رہی تھی۔ جان چھڑانے کے لیے بولی، ’’اچھا آجاؤں گی۔‘‘

’’پکا وعدہ۔‘‘

’’ہاں۔‘‘

’’مار ہاتھ پر ہاتھ۔‘‘

ہاتھ پر ہاتھ مارا گیا۔

’’اچھا دیکھ! اب کلائی چھوڑے دیتا ہوں، پر ایک شرط ہے۔۔۔ تو بھاگے گی نہیں۔‘‘

’’اچھا نہیں بھاگوں گی۔ چھوڑ اب۔ کوئی دیکھ لے گا۔‘‘

’’بس دو ملٹ بات کرلے ہم سے۔ جاد رکھیو جو ہمیں دھوکا دیا تو بانس پر لٹکادوں گا۔‘‘ ہاتھ چھوٹنے پر نکی ننھی سی خوش وضع ناک چڑھائے اور ابرو پر بل ڈالے نیم رضامندی سے رکی رہی اور جب کہ باج اس نظارے سے لطف اندوز ہو رہا تھا، وہ ٹھمک کر بولی، ’’کہہ اب۔‘‘

’’بات کرتی ہو کہ ڈھیلے مارتی ہو۔‘‘

’’اب جو تم سمجھو۔ جلدی سے بات کہہ ڈالو۔ اتا بخت (وقت) نہیں ہے۔‘‘

’’بخت (وقت) نہیں ہے۔ کیا کسی جارے سے ملنے جانا ہے۔‘‘

’’دھت۔ کوئی سن لے گا۔ تم بڑے۔۔۔‘‘

’’بڑے کیا؟‘‘

’’بدماس ہو۔‘‘

’’ہائے سریپ جادی۔۔۔ کبھی کبھار بدماس سے بھی ایک آدھ بات کر لیا کر۔۔۔ اچھا نکی یہ بتا کہ تیری عمر کتی ہے۔‘‘

’’سولہ برس۔‘‘

’’کیسی میٹھی عمر ہے۔‘‘

’’ہوگی۔ بس جائیں اب۔‘‘

’’گھکّی کی بھلا کیا عمر ہوگی؟‘‘

’’مجھ سے ڈیڑھ سال بڑی ہوگی۔‘‘

’’اور سانولی۔۔۔‘‘

’’چودہ کی ہوگی۔‘‘

’’لیکن نکی تو تو چودہ کی بھی نہیں دیکھتی۔‘‘

’’دکھتی کیسے نہیں۔‘‘

’’جرا نجیک (نزدیک) آنا! دیکھوں۔‘‘

’’ہٹ۔‘‘

’’آج کل مستی جھاڑ رہی ہو۔ پہلے تو گھکّی ہی تھی۔ اب تم نے بھی پر نکال لیے ہیں۔۔۔ تم کیا اب تو سانولی بھی رنگ دکھلا رہی ہے۔‘‘

’’ارے دیکھ سانولی کو کچھ مت کہیو۔ وہ بچاری اندھی ہے۔ اس سے بری بھلی بات مت کرنا۔‘‘

’’اری نکی جوانی بن بولے بات کرتی ہے۔ اس کو اندھی کہتی ہو۔ کھد مجا اڑاتی ہو۔۔۔ لو وہ رہی سانولی۔ چپ چاپ دروجے میں بیٹھی ہے۔‘‘

صحن کے دوسرے کونے میں دروازے کی دہلیز پر اندھی سانولی الگ تھلگ چپ چاپ بیٹھی تھی۔ نکی نے ادھر دیکھا تو باج نے پوچھا، ’’سانولی جنم سے اندھی ہے کیا؟‘‘

’’نہیں۔‘‘

’’تو کیسے ہوئے اندھی۔‘‘

’’دیکھو بیکار بیکار باتیں کرتے ہو۔ ہم جاتے ہیں۔‘‘

’’ٹھہرناجرا۔ بتا تو دے۔‘‘ باج نے اصرار کیا۔ وہ قربِ یار کو طول دینے کے لیے بے معنی باتیں کیے جا رہا تھا۔

’’بھئی ہم کچھ نہیں جانتے۔ لالہ (باپ) کہتا ہے کہ وہ بچپن میں اندھی ہوگئی تھی۔ اب میں کیا جانوں۔ لو ہم چلے۔‘‘

’’ارے ہیں دروجے میں سانولی کے پاس کون کھڑا ہے؟‘‘

نکی چلتے چلتے رک گئی، ’’ہم نہیں جانتے۔‘‘ باج باچھوں کو خوب کھینچ کر ہنسا۔ ’’تجھے معلوم نہیں۔۔۔ سبھی تو تیرے جار ہیں۔‘‘

’’دیکھ ہم سے بکواس متی کر۔۔۔ ہم اسے کیا جانیں۔ رات ہی تو آیا ہے۔‘‘

’’ارے رات والا۔۔۔ اچھا اچھا یاد آیا۔ میں نے اس وقت اندر سے سر نکالا۔ سچ نکی میں سمجھا تم ہو۔۔۔ لیکن نکی تم۔۔۔‘‘ نکی نے جھنجھلا کر قدم بڑھاتے ہوئے کہا، ’’لو ہم چلے۔‘‘ اس پر باج نے زور سے ناک صاف کی اور دستی ہلانے لگا۔

(۴)

لڈو سرپٹ بھاگتا ہوا آیا اور کارخانے کے دروازے کے دونوں پٹ اس قدر دھماکے کے ساتھ کھولے کہ اندر کام کرتے ہوئے باج اور اس کے ساتھیوں کے ہاتھ رک گئے۔ وہ قدرے حیران ہو کر اس کا منہ تکنے لگے کہ لڈو لیبلوں کی گڈیاں باندھنی چھوڑ کر بے وقت یہاں کیسے آن ٹپکا۔ اندر پہنچ کر لڈو کو اس بات کا احساس ہوا کہ اس قدر دھماکے سے اپنی آمد کے جواز کے لیے جو مواد اس کے پاس ہے وہ کافی اور مناسب ہے بھی یا نہیں۔ بہر حال اس نے ہانپتے ہوئے گردن گھما کر سب کی طرف دیکھا اور بولا، ’’جارو! آج بڑی مجے کی بات دیکھنےمیں آئی۔‘‘

مزے کی بات! اس وقت گیارہ بجنے کو تھے۔ کاریگر مسلسل کام کر رہے تھے۔ اس لیے وہ مزے کی بات سننے کے موڈ میں تھے۔ ادھر باج سنگھ نے صبح باسی مٹھے سے سر دھویا تھا۔ اس کے بالوں سے ابھی سڑی لسی کی بساند دور نہیں ہوئی تھی۔ اس نے بھی موقعہ غنیمت جانا کہ مزے کی بات سننے کے ساتھ ساتھ وہ بالوں میں کنگھا کرلے گا۔ اس طرح جب اس کے بالوں کےاندر تک ہوا پہنچے گی تو بال سوکھنے کے ساتھ بساند بھی دور ہو جائے گی۔ چنانچہ اس نے اپنا پھاوڑا سا کنگھا اٹھایا اور اسے داڑھی میں اڑس کر بولا، ’’ابے لڈو ماؤں کے متراڑ، جب سے تو پیدا ہوا ہے، آج تک تونے کوئی مجے دار بات نہیں سنائی لیکن آج تو مینڈ کی کو بھی زکام والی مثال تجھ پر لاگو ہوتی ہے۔۔۔ اچھا بول بیٹے۔ بجورے۔‘‘

حالات موافق پاکر باقی کاریگر بھی پنڈے کھجاتے ہوئے لڈو کے قریب آگئے۔ ان میں مونوں (منڈے ہوئے سر والوں) نے بیڑیاں جلا کر دانتوں میں داب لیں۔ اس غیر متوقع خوش آمدید سے لڈو کی جان میں جان آئی۔ اس نے کھکھیا کر ایک بیڑی طلب کی۔۔۔ جو قدرے ناک بھوں چڑھانےکے بعد دے دی گئی۔ اب لڈو نے بڑے اہتمام کے ساتھ بیڑی کو جلایا۔ یہ توقف حاضرین کے لیے ناقابل برداشت ہوتا جا رہا تھا۔ باج نے دولتی رسید کرنے کے انداز سے پاؤں اوپر اٹھاتے ہوئے کہا، ’’اوئے بھین کے بیگن جلدی سے اگل ڈال۔ سالے ہم تیرے بے بے کے نوکر تو نہیں ہیں کہ بیٹھے منہ تکتے رہیں تیرا۔۔۔‘‘

’’جار آج بڑے مجے کی بات ہوئی۔‘‘ لڈو نے اس طرح بات شروع کی جیسے ابلتے ہوئے پانی کی کیتلی کاڈھکنا بھک سے اڑجائے۔ ’’آج صبح جب باج نکی سے۔۔۔ باج نکی سے۔۔۔‘‘ باج نے خونخوار تیور بناکر کہا، ’’اوئےتیری بہن کو چور لے جائیں۔۔۔ ہماری ہی بات ملی سنانےکو۔۔۔‘‘

’’نئیں نئیں جی۔‘‘ لڈو نے خالص پنجابی لہجے میں حلق سے گھسا کر آواز نکالی، ’’پادشاہو! آپ کی بات نہیں ہے۔ وہ تو گھکّی کی بات ہے۔‘‘ ایک کاریگر نے اشارہ کر کے ساتھیوں سے کہا، ’’یہ چونگا بھی ٹھرکی ہے اور گھکّی پر ٹھرک جھاڑنے والوں میں شامل ہے، ہاں تو برخوردار کیا بات ہے گھکّی کی۔۔۔‘‘

’’او جی جب چھوٹی سردار اکھبار میں لگی ہوئی ماسٹر تارا سنگھ کی تصویر سب کو دکھا رہی تھیں تو گھکّی اور چمن کی نجریں ملیں۔۔۔ میں دیکھ رہا تھا چپکے سے۔‘‘

’’تو تو دیکھا ہی کرتا ہے گھکّی کو، پر سالے چمن نے جتنی چمیاں لی ہیں تو نے اتی ٹھوکریں نہ کھائی ہوں گی گھکّی کی۔‘‘

اس پر لڈو نے روٹھنے کے انداز سے منہ بسورا تو کسی نے ہمدردی جتائی، ’’بھئی ایسا مت کہو بچارے کو۔ گھکّی کی ٹھوکروں میں کیا کم مجا ہے۔ کئیوں نے تو ٹھوکر بھی نہ کھائی ہوگی اس کی۔۔۔ ہال تو بول بیٹا بول۔۔۔ بول بجورے بول۔‘‘

’’بس پھر کیا تھا۔ آنکھوں ہی آنکھوں میں اشارے ہوئے، ابروہلے اور پھر گھکی بڑی مسومی کے ساتھ اٹھ کر ٹھمک ٹھمک چل دی۔‘‘

’’کہاں چھت کو۔‘‘

’’ابے نہیں۔۔۔ اس بکت تو وہ اپنے گھر کو گئی۔ تھوڑی دیر بعد چمن نے کہا کہ جرا پکھانے جاؤں گا۔ سردارے (سردارجی کا بڑا لڑکا) نے کھانس کر کہا۔ بئی جلدی آنا۔ نہ جانے پکھانے میں بند کیا کرتے ہو۔ اس پر چمن بڑی میٹھی ہنسی ہنستا ہوا پچھلے کمرے میں چلا گیا جہاں سے کہ چھت کو سیڑھیاں جاتی ہیں۔‘‘

ایک دو نے جماہی لےکر کہا، ’’ابے لڈو کے گھسے۔ یہ سب پرانی باتیں ہیں، روج کا قصہ ہے۔۔۔‘‘

’’ابے سن تو۔‘‘ لڈو نے سرزنش کی، ’’سب کی نجر بچا کر میں بھی گیا پیچھے اور بئی جب اوپر پہنچا تو دیکھا کہ سیڑھیوں کا دروجہ بند ہے۔ بس بئی یہ دیکھ کر میری پھونک نکل گئی۔‘‘

باج ہنسا، ’’سالے تیری پھونک تو اچھی طرح نکلنی چاہیے پھول کے گبارہ ہو رہا ہے۔‘‘ لڈو نے سنی ان سنی کرتے ہوئے سلسلہ کلام جاری رکھا، ’’پہلے تو میں سمجھا کہ دروجے کے پاس ہی کھڑے ہوں گے، مگر کوئی آواج سنائی نئیں دی۔ دراڑ میں سے جھانکا تو چھت پر بھی کوئی صورت نہیں دکھائی دی۔ پھر میں نے سوچا کہ جرور برساتی کے اندر بیٹھے ہوں گے۔‘‘

’’بڑی جسوسی دکھائی تو نے۔‘‘

لڈو نے بیڑی کا کش لیا، ’’میں نے نیچے اوپر سے ہاتھ ڈال کر چٹکنی سرکا دی۔ یہ دیکھو میری بانہ پر خون جم گیا ہے۔۔۔‘‘

’’آگے بول۔‘‘

’’چھت پر سے ہوتا ہوا میں برساتی کی طرف بڑھا۔ اینٹوں کی جالی میں سے دیکھا کہ وہ دونوں اندر چارپائی پر کچھ بیٹھے اور کچھ لیٹے ہیں۔‘‘

ایک کاریگر بولا، ’’لیکن گھکی وہاں کیسے پہنچی۔‘‘ لڈو کو اس کی حماقت پر بڑا رحم آیا، ’’جار! تم بھی بس۔۔۔ چھت سے چھت ملی ہوئی جو ہے۔‘‘

’’بئی تو بڑا عکلبند (عقلمند) ہے۔ اب آگے چل۔‘‘

’’بس آگے کیا پوچھتے ہو، بڑے مجے میں تھے دونوں۔ گھکی کا منہ تو لال بھبوکا ہو رہا تھا۔ اتی پیاری لگ رہی تھی کہ جی چاہا کہ بس جا کر لپٹ ہی جاؤں۔‘‘

’’واہ رے بجورے۔‘‘ باج بولا، ’’اب تو ایہہ بات پکی ہو گئی کہ معاملہ چمی چاٹی تک ہی نہیں ہے۔۔۔ اچھا پھر کیا ہوا؟‘‘

’’بڑے پریم کی باتیں ہو رہی تھیں۔ چمن نے گھکی کے منہ کے آگے سے بال ہٹا کر کھوب بھینچ بھینچ کر۔۔‘‘

’’ارے یہ سب تو ہوا ہی ہوگا۔ جیہہ تو بتاکہ باتیں بھی ہو رہی تھیں کچھ؟ جیہہ تو مالوم ہو کیا ارادے ہیں ان کے۔‘‘

’’پھر گھکی نے بڑے پیار سے اس کے گلے میں باہیں ڈال کر پوچھا، چمن تم سچ مچ مجھی سے پیار کرتے ہو۔۔۔ چمن نے مور کی طرح گردن ہلائی اور بولا، سچ مچ۔‘‘

’’مجھے اکین نہیں آتا۔‘‘

’’جالم۔ جالم۔ اری ہم تو جان پھدا کرتے ہیں۔‘‘

گھکی نے یہ سن کر سر نیچا کر لیا اور گہری سوچ میں ڈوب گئی۔ اس پر چمن نے پھر اسے سمیٹ کر اپنی گود میں لے لیا اور کہنے لگا، ’’کہو تو آسمان سے تارے توڑ لاؤں، کہو تو اپنی چھاتی چیرکر۔۔۔ گھکی نے اس کے ہونٹوں پر انگلی رکھ دی اور پھر ایسے بولی جیسے سفنے میں بول رہی ہو، ’’تم تارے مت توڑو۔ اپنی چھاتی مت چیرو۔۔۔ مجھے۔۔۔ مجھے اپنی داسی بنا لو۔‘‘

’’داسی! داسی؟ ارے تم رانی ہو رانی۔ داس تو ہم ہیں تمہارے۔‘‘

’’گھکی کچھ دیر چپ رہی۔ پھر بولی، تم میرا متبل نہیں سمجھے۔ مجھ سے سادی کر لونا۔‘‘

’’جیہہ سن کر چمن بدک گیا۔ جیسے گھکی کھوب صورت لڑکی نہیں، ناگن ہو اور وہ اسے بڑی عجیب نجروں سے دیکھنے لگا۔ اس بخت گھکی کا سر جھکا ہوا تھا۔ سالی اپنے کھیال میں مگن بولی، میں گریب کی لڑکی ہوں۔ ہر کوئی مجھے بھوکی نجروں سے دیکھتا ہے۔ ہر کوئی مجھے کھانا چاہتا ہے۔۔۔ گھر سے باہر پاؤں رکھنا مسکل ہو گیا ہے۔ پھر بھی میں نے اجت بچا کر رکھی ہے۔ مگر تمہارے آگے میرا کوئی بس نہیں چلا۔ سوچو اگر مجھے کچھ ہو گیا تو؟‘‘

’’جیہہ کہہ کر اس کی آنکھوں سے آنسو ٹپ ٹپ گرنے لگے۔ اس پر چمن نے اس کا ہاتھ تھام لیا۔۔۔ اری واہ روتی کاہے کو ہے۔ بے پھکر رہو، تمہیں کچھ نئیں ہوگا۔ پریم میں ایسی باتیں دن رات ہوتی رہتی ہیں۔ تم بڑی وہمن ہو۔‘‘

’’مگر میں تمہاری ہو چکی ہوں۔ سدا کے لیے تمہاری۔ جیہہ کہہ کر اس نے اپنے پیلے رنگ کے کرتے سے آنکھیں پونچھیں لیکن آنسو نہیں تھمتے تھے۔ ہچکیاں بھرتی ہوئی بولی، چمن! میں عمر بھر تمہارے پاؤں دھو دھو کر پیوں گی۔ تمہاری نوکر رہوں گی۔ تمہارے اشارے پر ناچوں گی۔ لالہ کو میری بڑی پھکر لگی ہے۔ ماں ہے نہیں۔ میں ہی سب میں بڑی ہوں۔ مجھے چھوٹی بہنوں کابھی کھیال کرنا ہے۔ میں تمہاری منت کرتی ہوں۔ مجھے چھوڑنا نہیں۔‘‘

’’اے ہے ہے، تمہیں کون چھوڑتا ہے۔ پگلی ہوئی ہو کیا؟‘‘

’’اس پر گھکی نے بھیگی آنکھوں سے چمن کی طرف دیکھا اور بولی، نئیں تم وادا کرو کہ مجھ سے سادی کر لوگے۔۔۔ میں بڑی منہ پھٹ ہوں۔ بے سرمی ماپھ کرو۔ مجھے اپنی بنالو۔ میں خوب پڑھ لکھ لوں گی اور جیسا تم کہوگے ویسا ہی کروں گی۔‘‘

’’جیہ کہتے کہتے گھکی کا سر جھک گیا اور اس نے مدھم آواج میں پوچھا، ’’کہو مجھی سے سادی کروگے؟‘‘ اور جب اس نے پھر چمن کی طرپھ دیکھنے کو سر اٹھایا تو چمن نے جھٹ سے اس کا سر دبا کر چھاتی سے لگا لیا، ’’ہاں ہاں بھئی۔ تجھی سے سادی رچاؤں گا۔ اری تم میں کمی کس بات کی ہے۔ تم سندر ہو۔ ہجاروں میں ایک ہو۔۔۔ لو اب چلیں تم بھی گھر کو جاؤ۔ نہیں تو نیچے والے سک کریں گے۔۔۔‘‘

’’جیہہ سن کر میں بگٹٹ بھاگا وہاں سے۔‘‘

(۵)

دوپہر کے وقت گرمی کی وہ شدت ہوتی تھی کہ کیا کارخانے اور کیا پریس کے کاریگر سبھی کام چھوڑ کر الگ بیٹھ جاتے۔ دن کا یہ حصہ سب سے زیادہ دلچسپ ہوتا تھا۔ فرصت کا سماں ہوتا تھا۔ حویلی جی بھر کر کشادہ تھی۔ چھوٹے بڑے متعدد کمرے، ان میں اونچی اونچی الماریاں، کرسیاں، میزیں، پلنگ، صندوق۔۔۔ غرض آنکھ مچولی کھیلنے کا پورا سامان میسر تھا۔ باج سنگھ تنور سے روٹی کھا کر تو سیدھا حویلی کے اندر داخل ہو گیا۔ بڑے سردار جی کے سوا حسب معمول سبھی لوگ موجود تھے لیکن بڑی سردارنی سب سے الگ تھلگ پہلے بڑے کمرے میں براجمان تھیں۔ دوسرے کمرے میں ہنسی ٹھٹھول اور خوش گپیوں کی آوازیں آ رہی تھیں۔

آج تنور پر روٹی کھانے کا باج کو کچھ مزا نہیں آیا تھا۔ دال میں کنکر، راشن کے آٹے میں ریت۔ تنور والوں کی ایسی تیسی کر کے پیٹ بھرے بغیر ہی وہ لوٹ آیا تھا۔ جب وہ حویلی میں داخل ہوا تو قدرتی طور پر سب سے پہلے اس کی نگاہ سردارنی پر پڑی۔ تعجب! آج وہ پان چبا رہی تھی۔ چوٹی سردارنی تو خیر ہر کھانے کے بعد ایک عدد پان کلے میں دبا لیتیں۔ نہ جانے کہاں سے لت لگی تھی انہیں۔ بڑی سردارنی کو پان چباتے ہوئے اس نے پہلی بار دیکھا تھا۔ ان کی باچھوں اور ہونٹوں پر گہرے سرخ رنگ کی تہہ جمی ہوئی تھی۔ نظریں چار ہوتے ہی بڑی سردارنی اس قدر بے دریغ انداز میں مسکرائیں کہ ایک بار تو باج بدک گیا لیکن پھر سنبھل کر وہیں اینٹوں کے فرش پر بیٹھ گیا اور اپنے ٹخنوں اور پنڈلیوں پر سے لکڑی کا برادہ جھاڑنے لگا۔

بڑی سردارنی نے اس کی جانب چوکی دھکیلتے ہوئے کہا، ’’ہاؤ ہائے! جمین پر کاہے بیٹھتے ہو، چوکی پر بیٹھو۔‘‘

’’نہیں بڑی سردارنی! اینٹیں ٹھنڈی لگ رہی ہیں، مجا آ رہا ہے۔ اچھا کریں ہیں آپ جو دوپہر کو پھرش پر پانی پھکرا دے ہیں۔ سچ بڑی سردارنی دور کی سوجھے ہے آپ کو۔۔۔ سچ۔‘‘ یہ سن کر سردارنی نے چاہا کہ مارے خوشی کے پھولی نہ سمائے لیکن اب اور پھولنے کی گنجائش ہی کہاں تھی۔ چنانچہ اس نے پہلے تو کمال انکسار سے سر جھکا دیا۔ پھر قدرے بھونڈے مستانہ پن سے نظریں اٹھائیں۔ باج کو کوئی بات سوجھ نہیں رہی تھی۔ اس لیے اس نے پگڑی کے اندر دو انگلیاں داخل کر کے سر کھجانا شروع کر دیا۔ سردارنی محققانہ انداز میں بولی، ’’روٹی کھا کر آ رہے ہو؟‘‘

’’جہر مار کر کے آ رہے ہیں۔‘‘

باج کو برہم پا کر سردارنی بڑے مبالغے کے ساتھ پریشان ہوئیں، ’’آکھر ماجرا کیا ہے؟‘‘ باج نے ماجرا سنایا اور نتیجہ یہ برآمد کیا کہ ’’روٹی! ہائے روٹی! تو بڑی سردارنی آپ کی ہوتی ہے۔ مکھن سسرا روٹی کی نس نس میں رچ جاتا ہے۔ نوالہ منہ میں رکتا ہی نہیں۔ بتاشے کی طرح گھلا اور چل اندر۔‘‘ بڑی سردارنی کو تعریف و توصیف کے یہ فقرے ہضم کرنے میں خاصا پرانا یام DEEP BREATHING کرنا پڑا۔ جب دم میں دم آیا تو ایک خاس سر تال میں بولیں، ’’کبھی ہمارے یہاں کھاتے بھی ہو۔‘‘

’’کبھی کھلاتی بھی ہیں آپ۔‘‘ چالاک باج نے اسی سرتال میں برجستہ جواب دیا۔ اس پر جلال میں آ کر جو بڑی سردارنی اٹھیں تو باج کو یوں محسوس ہوا جیسے زمین سے آسمان تک اودی گھٹا چھا گئی ہو۔ روٹی کھاتے کھاتے باج نے پوچھا، ’’کیوں جی! آج بڑے سردار جی بیٹھک میں کس سے بات چیت کر رہے ہیں؟‘‘ سردرانی نے جھالر دار پنکھا جھلتے ہوئے جواب دیا، ’’معلوم نہیں۔‘‘

گھر میں ایک ہی ٹیبل فین تھا بجلی کا اور وہ جدھر بڑے سردارجی جاتے، ان کا پیچھا کرتا۔ باج نے نمک حلال کر ڈالنے کے خیال سے کہا، ’’کیوں مجاخ کرتی ہو سردارنی! بھلا یہ کبھی ہو سکتا ہے کہ ادھر بات چیت ہو رہی ہو اور آپ کو کھبر نہ ہو۔‘‘ سردارنی نے بڑے بڑے کی طرح منہ کھولا، لیکن دفعتاً اس کا دہانہ تنگ کر کے بولیں، ’’جسوس چھوڑ رکھے ہیں، ابھی معلوم ہو جائےگا سب۔‘‘

اسی اثنا میں چھوٹی سردارنی بغل والے کمرے سے نکل کر ان کے کمرے میں داخل ہوئیں۔ بتیسی نکلی پڑتی تھی۔ سنہری کیلیں چمک رہی تھیں۔ حسب معمول لڑکیاں ان کے ساتھ تھیں۔ جب لڑکیاں ساتھ تھیں تو قدرتی طور پر لڑکے بھی ساتھ تھے۔۔۔ بڑی سردارنی کو چھوٹی سردارنی کے یہ لچھن پسند نہیں تھے اور پھر اس موقعہ پر؟ چنانچہ اس نے چپکے سے ناک بھوں چڑھا کر ہاتھ کو ذرا SLOW MOTION سے گھماکر ناپسندیدگی کا اظہار کیا۔ اسے یقین تھا کہ باج بھی اس معاملہ میں اس سے متفق ہے۔ لیکن باج نے بڑی دیدہ دلیری سے اپنے بے ڈول دانتوں کی نمائش کی اور تر مال اپنے سامنے پا کر اس نے دل ہی دل میں نعرہ لگایا، ’’جو بولے سو نہال۔‘‘

چھوٹی سردارنی معہ کم سن پریوں کے اور جنات کے دھوم دھڑاک سے آگے بڑھیں۔ ان کے پہلو بہ پہلوان کا ہاتھ جھلاتی گھکی چہکی، پھدکتی چلی آ رہی تھی۔ گھکی محض بانکی نہیں تھی بلکہ اسے اپنے بانکپن کا احساس بھی تھا۔ ہر نگاہ جو اس کے چہرے یا جسم پر پڑتی تھی، اس کا رد عمل اس کی ابروؤں کی لرزش، ہونٹوں کی پھڑکن یا جسم کی کسی نہ کسی حرکت سے ظاہر ہو جاتا۔ اس کے بعد نکی۔۔۔ گھکی نوک پلک اور چہرے کے خد و خال کے لحاظ سے غضب تھی تو نکی بدن کے اعضا کی متناسب بناوٹ، تناؤ اور تڑپ کے اعتبار سے قیامت تھی۔ اس کی نظریں بڑی بہن کی طرح دور تک نہیں پہنچتی تھیں۔ وہ اس انسان کے مانند دکھائی دیتی تھی جو ویرانے میں بھٹکتا بھٹکتا دفعتاً میلےمیں آ نکلے۔۔۔

نکی کی چندری کا دامن اندھی سانولی کے ہاتھ میں تھا۔ اس کا چہرہ اوپر کو اٹھا رہتا۔ وہ بڑی دونوں بہنوں سے کم گوری تھی۔ خد و خال گورا لیکن چہرہ بحیثیت مجموعی پرکشش تھا۔ اسے اس بات کا مطلقاً احساس نہیں تھا کہ مرلی والا اس کے بدن میں عمر کے ساتھ ساتھ کیا کیا تبدیلیاں کر رہا ہے۔ کیونکہ اس معمے کا احساس تو لڑکی کو آنکھیں چار ہونے پر ہی ہو سکتا ہے۔ وہاں ایک بھی دیکھنے والی آنکھ نہیں تھی۔ اس لیے آنکھیں چار ہونے کا وچار ہی پیدا نہیں ہوتا تھا۔۔۔

’’بلے بلے۔‘‘ باج کو اپنے کان میں آواز سنائی دی۔ دیکھا کہ بونگا بھی اسے کارخانے میں نہ پا کر وہاں آن پہنچا تھا اور پھر رال ٹپکاتے ہوئے بولا، ’’جار! گھکی کی کمر تو دیکھو۔ کیسی پتلی۔ کیسی لچک دار ہے۔ آنکھ نہیں ٹکتی اس پر۔۔۔‘‘

’’اوئے میں جٹی پنجاب دی

میرا ریشم برگالک۔۔۔‘‘

معاً باج نے بونگے کو کہنی کا ٹھوکا دیتے ہوئے کہا، ’’دیکھ اوئے جل ککڑ!‘‘

جل ککڑ پریس میں لیبل پرنٹ کیا کرتا تھا۔ اس کی عمر چونتیس برس کے لگ بھگ ہوگی۔ دوبچے بھی تھے۔ تعجب! وہ بھی سینگ کٹاکر بچھڑوں میں شامل ہو گیا تھا۔ یہ راز باج کی سمجھ میں اب تک نہ آیا تھا۔ لیکن آج اس نے دیکھا کہ کیسے جل ککڑ نے دیدہ دانستہ نکی کو دھکا دیا اور کیسے نکی نے معشوقانہ ادا کے ساتھ اس کی اس حرکت کو برداشت کیا لیکن آخر جل ککڑ میں رکھا ہی کیا تھا۔ اس کی مضحکہ خیز صورت کی وجہ سے ہی تو یاروں نے اس کا نام جل ککڑ تجویز کیا تھا۔۔۔ مگر عورت کے دل کو کون پا سکتا ہے۔۔۔ بونگے نے کہا، ’’جاریہ تو دورمار توپ نکلا۔ کیسا مشکین بنتا تھا۔‘‘ آج کل جل ککڑ زیادہ تر رنگین بشرٹ پہنے رہتا تھا۔ جس کے کپڑے پر چینی طرز کے اژدہا ناچتے دکھائی دیتے تھے۔

سردار جی کے لڑکے بھی ’’چل کبڈی تارا۔ سلطان بیگ مارا۔‘‘ کہتے ہوئے ساتھ ساتھ چلے آ رہے تھے اور ان کے پیچھے وہ نوجوان تھا۔ جو وہاں کوئی امتحان دینے کے لیے نیا نیا آیا تھا۔ اسے دیکھتے ہی باج نے پوچھا، ’’اوے ماں دیا متر اڑا ایہہ کون ہے۔‘‘

’’اوئے جیہہ بھی اپنا منڈا ہے۔ نواں داکھل ہویا اے۔ عسک دے مدرسے دے بچ۔‘‘

’’ہچھا ہچھا۔۔۔ ایہہ تاں پرسوں ہی آیا ہے۔‘‘

’’آہو جی لونڈوں کی باتیں چھوڑو۔ اب ناریوں کی باتیں کرو۔‘‘

پریوں کے اس قافلے نے زمین پر ڈیرے ڈال دیے اور اس کی خوش نوائیوں میں بڑی سردارنی اپنے آپ کو تنہا محسوس کرنے لگی۔

’’اوئے پر جی چمن کہا ہے؟‘‘

ایک چھوٹا لڑکا (غالباً بڑی سردارنی کا جاسوس) جو بیٹھک سے اسی وقت وہاں آیا تھا بولا، ’’چمن ادھر بیٹھک میں بیٹھا ہے۔‘‘

باج کو حیرت ہو رہی تھی۔ یہ کیا؟ گل ادھر اور بلبل ادھر؟ پھر اسی جذبے کے تحت اس نے گھکی کی جانب دیکھا۔ وہ نظروں ہی نظروں میں سب کچھ سمجھ گئی۔ اس کے ابرو لرزے، پلکیں جھپکیں، کمر لچکی اور پھر وہ ساکت ہو گئی۔ باج نے دل پھینک تیور بنا کر آنکھوں ہی آنکھوں میں سمجھایا کہ لو ہم تفتیش کرتے ہیں اور حسن کے چور کو حسن کے حضور میں حاضر کرتے ہیں۔ چنانچہ اس نے بلند آواز میں پوچھا، ’’لیکن بئی وہ وہاں کیا کر رہا ہے؟‘‘

’’ادھر ایک جرنیل صاحب بیٹھے ہیں۔‘‘ باج نے سوچا کوئی فوجی افسر ہوگا۔ یہ لونڈے ہر ایسے افسر کو ایک دم جرنیل بنا دیتے ہیں۔ پھر بولا، ’’پربائی! چمن کا وہاں کیا کام؟‘‘

’’چمن کے بابو جی بھی بیٹھے ہیں۔‘‘

اس سے مراد یہ کہ چمن کو باپ کی وجہ سے مجبوراً وہاں بیٹھنا پڑ رہا ہے۔ ’’اچھا تو بچو چمن کو انہوں نے وہاں کس لیے پھانس رکھا ہے۔‘‘ باج نے جرح کی۔

’’وہ پھوج میں بھرتی ہو رہا ہے۔‘‘ لڑکے نے ٹیں سے جواب دیا۔ اب باج نے ایک نظر بڑی سردارنی پر ڈالنا ضروری سمجھا اور پھر منہ ٹیڑھا کر کے اس کے ایک کونے میں سے سانپ کی پھنکار کی سی آواز نکالتے ہوئے بولا، ’’اے جی آپ کا جسوس تو بڑا ہسیار نکلا۔‘‘ داد پاکر سردارنی ہاتھی کی طرح جھومنے لگیں اور عرصہ تک جھومتی رہیں۔ جب جسوس لونڈے کو محسوس ہوا کہ وہ ایسی باتیں کہہ رہا ہے جن سے سب کو بڑی دلچسپی محسوس ہو رہی ہے تو اس نے مزید معلومات بہم پہنچانے کے لیے کہا، ’’چمن ماہاؤ جا رہا ہے۔‘‘

’’اوئے ماہاؤ کون جگہ کا نام ہے۔ وہاں تیری ماؤں (ماں) رہتی ہے کیا؟‘‘ بونگے نے دبی زبان میں کہا تاکہ صرف باج سن سکے۔

سردار نے کہا، ’’اوئے ماہاؤ نہیں مہو کہو مہو۔‘‘

’’کیا چمن مہو جا رہا ہے؟‘‘ سردار جی کے چھوٹے لڑکے نے سوال کیا اور ساتھ ہی پہلے تو مصنوعی تعجب کے مارے دونوں ٹانگیں خوب پھیلا کر اور پاؤں فرش پر جما کر بالکل بےحس و حرکت کھڑا رہا اور پھر سمٹ کر جو کودا تو کمرے سے باہر اور بیٹھک کے اندر۔

’’اوئے چمن ہم کو چھوڑکر مہو جا رہا ہے اور ہم کو خبر تک نہیں دی۔‘‘ لفظ ’’ہم‘‘سے اس کا اشارہ گھکی کی طرف تھا۔ یہ الفاظ اس نے کھڑے ہوکر کہے۔ اس وقت اس کی میلی کچھ کا اور بھی زیادہ میلا ازاربند اس کے دونوں گھٹنوں کے بیچ میں جھول رہا تھا اور اس نے پرمعنی انداز میں کنکھیوں سے گھکی کی جانب دیکھا۔ بھلا گھکی کو اس کی بات کا مطلب پالینے میں کیا مشکل پیش آ سکتی تھی۔ اس کے دل میں ایسی گدگدی پیدا ہوئی کہ وہ اٹھ کر رقصاں و شاداں چھوٹی سردارنی کے ایک بازو سے اٹھ کر اس کے دوسرے پہلو میں جا بیٹھی اور بےحد سریلی آواز میں بولی، ’’ہمیں پہلے ہی سے معلوم تھا۔‘‘

گھکی نے یہ بات زیادہ زور سے نہیں کہی لیکن یہ اتنی بلند ضرور تھی کہ باج اسے آسانی سے سن سکے۔ اس پر باج ٹھنڈا ہوکر ٹھنڈے فرش پر اس طرح بیٹھ گیا جیسے غبارے میں سے دفعتاً ساری ہوا نکل جائے اور پھر اس نے ابرو ہلاکر اور مونچھیں پھڑکا کر بونگے کے کان میں کہا، ’’جار! سچ مچ یہ لونڈیا بڑی چلتی پرجی ہے۔‘‘

(۶)

ایت وار! آج سردار جی کے دونوں لڑکے دس بجے کا انگریزی شو دیکھنے جا رہے تھے۔ بڑے زور شور کے ساتھ تیاریاں ہو رہی تھیں۔ نہ جانے کب کی پرانی نکٹائیاں برآمد کی گئیں۔ ایک مسہری لگانے کے بانس کے سرے پر بندھی تھی اور دوسری بڑے ٹرنک کے پیچھے سے گیند کی طرح گول مول کی ہوئی نکلی۔

چونکہ اس وقت چھوٹی سردارنی غسل کر رہی تھیں اس لیے ان کی چیلیاں بے جان سی ہو کر ادھر ادھر لٹک رہی تھیں۔ نکی بڑی سردارنی کے ساتھ باورچی خانے کے اندر بیٹھی تھی۔ سانولی پرے نل کے پاس بیٹھی ایڑیوں کو رگڑ رگڑ کر دھو رہی تھی۔ دستی ہلانے والا نیا نوجوان تھا۔ گھکّی حویلی کے بڑے دروازے کے آگے بنی ہوئی چند پختہ سیڑھیوں کے بیچ والے حصے پر بیٹھی تھی۔ اس کی دونوں کہنیاں اس کے گھٹنوں پر ٹکی تھیں اور دونوں ہتھیلیوں کے بیچ میں اس کا چہرہ پھنسا ہوا تھا۔ اس کی آنکھیں اداس تھیں۔ چمن کو گئے پچیس دن گزر گئے تھے۔ لیکن گھکّی کو اس کا ایک خط تک نہ آیا تھا۔ حالانکہ دوسروں کو اس کی چٹھیاں آ چکی تھیں۔۔۔

اتوار کی وجہ سے چھٹی تھی۔ اس لیے کاریگروں کی گہما گہمی نہیں تھی۔ البتہ باج اور بونگا موجود تھے۔ کیونکہ وہ مستقل طور سے وہیں پر مقیم تھے۔ دیواروں کی سفیدی کرنے کے کام میں آنے والے پانچ فٹ اونچے اسٹول پر پاؤں کے بل بیٹھا باج داتن چبا رہا تھا۔ اسٹول کے ساتھ سٹ کر زمین پر بیٹھا ہوا بونگا آئینے میں دیکھ دیکھ کر چمٹی سے ناک کے بال نوچ نوچ کر پھینک رہا تھا۔ دور بیٹھک کی طرف سے ایک بڑے سنکھ کی سی آواز میں سردار جی پاٹھ کر رہے تھے۔ سردار جی کا پاٹھ اور باج کی داتن دونوں مشہور چیزیں تھیں۔ ادھر سردار جی مسلسل کئی کئی گھنٹے پاٹھ کرنے میں جٹے رہتے۔ ادھر اتوار کو فرصت پا کر باج علی الصبح ہی منہ میں یہ لمبی داتن اڑس کر بیٹھ جاتا۔ پہلے اسے چباتا پھر دانتوں پر گھساتا۔ پھر چباتا اور دانتوں پر گھساتا۔ یہاں تک کہ داتن ختم ہو جاتی۔

بونگے نے اپنے کام سے فرصت پاکر اطمینان سے ٹانگیں زمین پر پھیلا دیں۔ بلند نشین باج نے اپنے تیزی ہلتے ہوئے منہ کو لمحہ بھر کے لیے روکا اور بونگے سے مخاطب ہوکر دبی زبان میں پھنکار کر بولا، ’’بونگیا! آج گھکی کچھ اداس ہے۔ شاید چھوٹی سردارنی کا انتجار ہو رہا ہے۔‘‘ اس طرح بولنے سے باج کی مونچھوں میں پھنسے ہوئے تھوک کے قطرے اڑکر بونگے کے چیچک مارے چہرے پر پڑے اور اس نے بھڑک کر اسٹول کو ذرا سا ہلا دیا اور چھوٹی چھوٹی آنکھیں لال چنگاری بناکر کہا، ’’اوئے ابھی ہلا دوں تو راج سنگھاسن سے سر کے بل نیچے گر پڑے۔ ہم پر تھوکتا ہے؟‘‘ اسٹول کے قدرے ہل جانے پر باج نے گدھ کے مانند بازو پھڑپھڑائے اور اس کی طرف دھیان دیے بغیر بولا، ’’کیوں یہی بات ہے نا! ملکاں (چھوٹی سردارنی) کا انتجار ہو رہا ہے۔‘‘

’’اوئے نئیں۔‘‘ بونگے نے نتھنے پھلا کر عالمانہ انداز میں جواب دیا، ’’ہیر کو رانجھے کا۔ سسی کوپنو کا۔ گوپی کو کنہیا کا انتجار ہے، سمجھے؟‘‘

’’سمجھا۔‘‘ باج سے بھلا کیا بات چھپی تھی۔ اس نے بونگ کو محض گرمانے اور پھر اس کی کسی حرکت بازی کا لطف اٹھانے کے لیے انجان پن کا ثبوت پیش کیا تھا۔ اب بونگے نے احتیاطاً ادھر ادھر دیکھا اور کسی کو قریب نہ پاکر ہلکا سا نعرہ بلند کیا۔ ’’ہائے۔‘‘ روئے سخن گھکّی کی جانب۔

’’کیا ہے؟‘‘ باج نے پوچھا اور سمجھ گیا کہ بونگے کو خرمستی سوجھ رہی ہے۔

’’درد۔‘‘ بونگے نے جواب دیا۔

’’کہاں؟‘‘

’’جیہہ تو میں مرجاواں تاں بھی نہ دساں۔‘‘ بونگے نے خاص زنانہ آواز میں جواب دیا اور پھر قدرے سکوت کے بعد گانے لگا،

’’چھوڑ گئے بالم!‘‘

’’اکیلی مجھ نوں چھوڑ گئے۔‘‘

فضا بونگے کی ٹرٹراتی آواز سے گونج اٹھی۔

اب دونوں چھوٹے سردار تیار ہو کر اندر سے نکلے تو اس شان سے کہ پہلے تو بڑے بھائی نے اندر سے چھلانگ لگائی تو گھکی کے اوپر سے کود کر صحن میں۔ وہ سمجھنے بھی نہ پائی تھی کہ دوسرا بھائی صاف کود گیا اوپر سے۔ گھکی ہڑبڑاکر اٹھ کھڑی ہوئی۔ اس کا چہرہ لال بھبھوکا ہو گیا۔ چمک کر بولی، ’’ہمیں نہیں اچھا لگتا ایسا مجاخ، اگر ہماری گردن ٹوٹ جاتی تو؟‘‘ اس پر چھوٹے بھائی نے پنجاب کے مشہور لوک ناچ بھنگڑا کے انداز میں چند چک پھیریاں لیں اور گلے کی گہرائیوں میں سے نہایت گھگیائی ہوئی آواز نکال کر گیت کا بول دہرایا، ’’چھوڑ گئے بالم!‘‘

ادھر بونگا بھی بس تیار ہی بیٹھا تھا۔ فی الفور چھاتی پر دو ہتڑ مار کر بین سر میں گا اٹھا، ’’اکیلی مجھ کو چھوڑ گئے۔‘‘

اس پر باج نے جو قہقہے لگائے تو وہ سیدھے آسمان کے اس پار پہنچے۔ بڑی سردارنی معہ نکی کے باورچی خانے کے دروازے میں آن کھڑی ہوئیں۔ چھوٹی سردارنی بھی غسل سے فارغ ہو کر نکل آئیں۔ سانولی سمجھی ضرور کوئی مزے دار بات ہو رہی ہے۔ چنانچہ وہ نل کے پاس بیٹھی زور زور سے ہنسنے لگی۔ چلتے چلتے چھوٹا سردار وہی بول دہراتا گیا اور بونگا بھی گرمی کھا کر سینے پر دوہتڑ مار مار جواب دیتا گیا۔ صحن میں قیامت کا شور سن کر بڑے سردار جی اندر سے ہی کڑکے۔۔۔ تو چھوٹے سردار جی بگٹٹ بھاگے۔ باج اسٹول سے کودا اور بونگے سمیت کارخانے میں جا گھسا۔ بڑی سردارنی اور نکی نے اندر سے باورچی خانے کا دروازہ بھیڑ دیا۔ گھکی اچھلی اور چھوٹی سردارنی نے اسے بغل میں دابا اور ایک بار پھر غسل خانے کے اندر۔۔۔

(۷)

دیوی داس کے مکان اور دکان کے آگے سڑک کے آر پار کاغذ کی رنگ برنگی جھنڈیا لہرا رہی تھیں۔ باجے بج رہے تھے۔ گھر کے اندر کسی تاریک گوشے میں چند عورتیں بطخوں کی قیں قیں کی سی آواز میں ٹوٹے پھوٹے گیت گا رہی تھیں۔