ریت پر تیرتے جزیرے

’’انگریز بہادر بڑا مہربان رہا تھا تمہارے آغا جی کے دادا حضور پر اور کیوں نہ ہوتا بھئی۔ وہ بھی آڑے وقتوں میں انگریز کے بڑے کام آئے تھے۔ سن ستاون میں جب انگریز کا بوریا بستر گول ہوتا نظر آ رہا تھا تو تمہارے پڑدادا نے ان کی بڑی مدد کی۔ غدر کے موقع پر چھوٹے لاٹ صاحب کو فسادیوں سے بچا کر اپنے گھر میں پناہ دی۔ بس جب فسادات ختم ہوئے تو انہوں نے اپنی مہربانی کے عوض بخشش کی طلب کی۔ کیا بات ہے انگریز کی بھی جناب۔ بڑے دیالو لوگ تھے۔ انہوں نے کہا، یہاں سے جہاں تک تم چلے جاؤ، وہاں کی زمین بھی تمہاری راج بھی تمہارا۔‘‘

بڑی امی نے اونی ٹوپی بنتے بنتے سلائیاں چھوڑ کر خود ہی مسکراتے ہوئے ماضی میں جھانکا۔ وہ ابھی تک اپنے سسر کو لمبے لمبے ڈگ بھرتے دیکھ رہی تھیں۔

تازہ مالٹوں کا سرخ رس، چرائیتے کی طرح اس کا حلق کڑوا کر گیا۔ بےساختگی میں خوف زدہ ہوکر اس کی نگاہ سامنے لمبی دیوار پر آویزاں اس سورما پر پڑی جس کی بڑی بڑی مونچھیں، آنکھوں سے ٹپکتی خشونت اور ایک رعونت بھرا چہرہ سنہرے قیمتی فریم کے شکنجے میں قید تھا۔ صد شکر کہ اب وہ تصویر سے باہر نکل کر چل نہیں سکتے، ورنہ اس گھر میں بھی یہاں سے وہاں تک انہی کا راج ہوتا اور صد افسوس کہ وہ اس کے اس قدر مہربان باپ کے دادا رہ چکے تھے، جن کی عزت و احترام اس پر واجب تھی۔

’’یہ تاریخ جغرافیہ بھی کس قدر مذاق ہے۔ جو تاریخ بنی تھی، وہ تحریر نہیں ہوئی۔ جو جغرافیہ درکار تھا، وہ مکمل نہیں ہوا۔‘‘

سر کمال تاریخ کے لیکچر میں بڑی مہارت سے لفظوں سے کھیلنے لگتے تھے۔ تاریخ کے ساتھ وہ بہت تہذیب سے پیش آتے۔ محتاط الفاظ۔ سنبھلی ہوئی ترکیبیں۔ انہیں ہتھکڑیوں سے ڈر لگتا تھا لیکن اپنے پیشے سے دیانت کے مدّنظر وہ طالب علموں کو گمراہ کن تاریخوں میں بھی بھٹکانا نہیں چاہتے تھے۔

’’پنجاب کا جاگیردار ہمیشہ وفا شعار رہا ہے۔ اس نے ہمیشہ محبت نبھائی۔ اس نے مغلوں کی بھی پذیرائی کی، سکھوں سے بھی وفا کی اور آخری دَم تک انگریزوں کا بھی ساتھ دیا۔‘‘

بڑے ہال میں اترنے والی سیڑھیوں کے ساتھ ساتھ دیوار پر اس کے خاندان کا شجرۂ نسب زینہ زینہ نیچے اتر رہا تھا۔ ہر کوئی تصویروں کی صورت شیشوں میں قید اپنے اپنے کارناموں کے ساتھ ساتھ دفن، اپنے حصے کی تاریخ بنا گیا تھا۔ یہاں سے وہاں تک جا بہ جا مؤرخ نے اوراق بکھیر دئیے تھے۔

وقت بےوقت ایک کہانی امی بھی سنایا کرتی تھیں۔ یہ کہانی کونے والے کمرے میں دفن تھی۔ آتش دان کے اوپر رکھی تصویر میں جڑی۔ دو موٹی موٹی چوٹیاں دائیں بائیں کندھے پر جھولتیں اور اس کی سیاہ آنکھیں کیمرے کو دیکھ کر مسکراتے بھی جن میں انتظار کے دیے روشن تھے۔ آنے والے اچھے وقتوں کا انتظار۔ جب سب کے حساب چکائے جائیں گے۔

امی دراصل گھر بھر کی چھوٹی امی تھیں۔ بڑی امی زیادہ تر گاؤں والے گھر میں رہتی تھیں۔ وہ جاگیر سے۔ اپنے اور اپنی سوکن کے بچوں سے بےتحاشا پیار کرتی تھیں۔ ہر طرف ان کی چلتی تھی۔ ان کے جسم پر ہر طرف پیلا پیلا سونا لدا رہتا تھا۔ جب وہ بہت خوش ہوتیں اور کسی کے پاس واس ہونے پر کوئی انعام دینا چاہتیں تو جسم پر لدا کوئی بھاری بھرکم ٹکڑا اتار کر اس کے حوالے کر دیتیں۔ پھر بھی بھری رہتیں۔ کلائی سے کہنی تک چوڑیاں، کڑے، کنگن، ہر قسم کابازو والا زیور۔ کانوں کے سوراخ ڈھیلے ہو کر لٹک جاتے پھر وہ دوسرا سوراخ کر کے مزید تام جھام لٹکا لیتیں۔ ان کے کپڑوں سے کھٹی لسی کی بساند آتی تھی۔

وہ جب بھی گاؤں جاتی انہیں ملازم عورتوں کے جمگھٹے میں گھرا دیکھتی۔ ان کی بیٹی عابدہ بھی تھی۔ اس کی ہم زاد، اس کی بے حد گہری دوست، جس کو پڑ دادا کے زمانے میں Half Sister کہا جاتا تھا۔ لوگ سوتیلی بہن کہتے تھے لیکن فارا مصطفی کی جان، عابدہ مصطفی کے توتے میں بند تھی۔ بڑی امّی اپنے کام کیے جاتیں، کبھی گندم تلوا کر تقسیم ہو رہی ہے، کبھی کسی کو جہیز دینے کے لیے برسوں کے زنگ آلود صندوق کھل رہے ہیں اور عابدہ قلم اور رائٹنگ پیڈ ہاتھ میں لیے ان کے پیچھے پیچھے۔ اپنے سوتن کے بیٹوں کو لمبے لمبے خط لکھوانا بھی ان کا دلچسپ مشغلہ تھا۔ ان کے بچے چیف کالج سے نکل کر آکسفورڈ میں پڑھتے تھے۔ وہاں سے واپس آ کر جاگیرداری کا کام سنبھالتے تھے۔

آغا کے شہر والے گھر کا ماحول گاؤں والے گھر سے بالکل مختلف تھا۔ آغا دونوں جگہوں پر ایک سے فٹ بیٹھتے تھے۔ حویلی میں بیٹھے مزارعوں کے مسائل سنتے وہ بالکل دیہاتی لگتے تھے۔ شہر میں روشن خیالی اور فراخ دلی سے جیتے وہ بالکل ’’ماڈرن مین‘‘ نظر آتے تھے۔

بڑی امی کو چھوٹی امّی کے آنے کا ذرا بھی قلق نہیں ہوابلکہ انہوں نے فراخ دلی سے سونے کی آدھی صندوقچی حساب سے چھوٹی امّی کے حوالے کر دی۔ چھوٹی امی کو سونا جمع کرنے کا شوق تھا، پہننے کا نہیں۔ چھوٹی امی کی آغا سے شادی ہوئی تو وہ کالج میں پڑھاتی تھیں۔ ان کی کولیگز نے پہلے سے شادی شدہ اور وہ بھی جاگیردار سے شادی کرنے سے بہت خوف زدہ کیا۔ سب نے مخالفت کی۔ سوائے بڑی امّی کے۔ وہ کہتی تھیں،’’آغا بہت پڑھے لکھے ہیں۔ لائق فائق، قابل، انہیں زندگی گزارنے کے لیے کسی اپنے برابر ہی قابل آدمی کی ضرورت تھی۔ اچھا کیا انہوں نے سے شادی کر لی۔‘‘

چھوٹی امی نے کیا سوچ کر ان کے گھر آنا قبول کیا۔ یہ اس کی پیدائش سے قبل کا واقعہ ہے اور تاریخ کے صفحات یہاں بند ملتے ہیں۔ اس کا کوئی مستند راوی بھی موجود نہیں۔

خاندان خوشیوں سے معمور تھا۔ جب روٹی پیٹ بھر ملتی ہو، زندگی کی ضرورتیں آسائشوں کی حد تک آملتی ہوں اور پوری ہو جاتی ہوں اور آپ کی تربیت بھی اس انداز میں ہوئی ہو کہ آپ کو دکھوں سے دُور رکھ کر پالا جائے تو پریشانیاں آپ کے پاس بھی نہیں پھٹکتیں۔ ہاں البتہ بچپن میں ایک حادثہ ہوا تھا اس گھر میں۔ گھر کی فضا میں کچھ عرصے کے لیے تناؤ بھی رہا۔ پھوپی فاخرہ کو سزا کے طور پر ایک کمرے میں بند کر دیا گیا تھا۔

جرم کیا تھا۔ مصنف کون تھا۔ جیلر کے فرائض کس کو سونپے گئے۔ اس واقعے کا ذکر بھی گھر میں اس طرح حرام تھا جیسے بعض لوگ حرام جانور کا نام لینے کو بھی حرام سمجھے ہیں۔ البتہ جب سزا کی میعاد ختم ہوئی اور کمرا کھولا گیا تو وہ مردہ پائی گئی تھیں۔ انہیں اپنے لیے تجویز کردہ سزا زیادہ قابل قبول تھی۔

انہوں نے ڈاکٹر گوئبلز کی طرح کلائی کی رگیں کاٹ کر باتھ روم کے ٹب میں جان دے دی تھی۔ جس کے لیے انہوں نے زندگی سے کھیلا، وہ کوئی شاعر، ادیب یا جرنلسٹ قسم کی چیز تھا۔ بڑی امی کو ٹھیک سے معلوم نہیں۔ وہ کیمبرج میں پڑھانے والے اپنے بیٹے کو بھی ماسٹر کہتی تھیں۔ ہاں یہ پتا تھا کہ وہ ہاتھ میں قلم پکڑنے والا آدمی تھا۔ اگر اس کے ہاتھ میں قلم نہ ہوتا تو کب کا اس کا سر قلم ہو چکا ہوتا۔ اس کے بعد کچھ عرصے کے لیے عورتوں کی تعلیم کا سلسلہ موقوف رہا۔

پھر آغاجی کی تاریخ شروع ہو گئی۔ زمانہ بدل گیا تھا۔ وہ بدلے خیالات کے روشن دماغ آدمی تھے۔ دوسرے وہ شروع سے آدمی ہی کچھ مختلف قسم کے تھے اور ان کی دوسری شادی بھی تعلیم کے شعبے میں ہوئی تھی۔ لہٰذا فارا مصطفی اور عابدہ وغیرہ کو ان رکاوٹوں کا سامنا نہیں کرنا پڑا جو اس خاندان کی باتی عورتوں کا مقدر رہی تھیں۔

فارا مصطفی نے گھر کے وسیع و عریض لان میں کھلنے والی ٹیرس سے جھانک کر دیکھا۔ فوارے کے اچھلتے پانی کے پاس رنگ برنگی ربڑ کی کرسیوں پر زندگی رواں دواں تھی۔ آغا ان دنوں شہر والے گھر میں تھے۔ پتا نہیں اس کی فطرت میں کس کا خمیر شامل تھاکہ وہ زندگی کی ان گہماگہمیوں سے اکتا جاتی تھی۔ اس کی ہم عمر پھوپی زاد، چچا زاد شام کے اہتمام میں خوب بن ٹھن کر لان میں آتیں اور نخوت بھرے انداز میں گردن اٹھا کر اِدھر ادھر دیکھا کرتی تھیں۔ دو تین سفید کپڑوں والے ملازم ٹرے ہاتھ میں اٹھائے ادھر سے ادھر اس طرح بھاگتے نظر آتے جیسے یہ آغا مصطفی کا گھر نہ ہو کوئی فائیو سٹار ہو جہاں روم سروس چوبیس گھنٹے موجود رہتی ہے۔ دن بھر مختلف کمروں کی گھنٹیاں باورچی خانے کے اطراف میں روشن ہوتیں اور وہاں سے مستعد اور چوکس ملازم جائے وقوع پر الٰہ دین کے جن کی طرح لپکتے جھپکتے پہنچتے رہتے۔

اس نے اپنے بکھرے بال ہاتھ سے ترتیب دئیے۔ وہ دوپہر کو دیر تک سوئی رہی تھی۔ اب اگراس سوئے سوئے حلیے میں وہ اپنی صاف شفاف بہنوں اور کزن لوگوں کے درمیان جا بیٹھےگی تو خوب ہی اپنی گت بنوائےگی۔ پھر امّی بھی وہیں پاس آغا جی کے گرد، وہ بھی اس کو خوب گھور گھور کر دیکھیں گی اور نہ گئی تو گھر کی اس روایت کو توڑنے کی پاداش میں لمبی چوڑی وضاحت کی سزاوار ہوگی، جس پر کوئی اعتبار بھی نہیں کرےگا، سوائے اس کے کہ دماغ میں خناس ہے، وہ روایتیں توڑتی ہے، بغاوتیں کرتی ہے۔ اسی لیے باغیوں کے انجام کا قصہ اسے انگریز کے زمانے سے لے کر پھوپی فاخرہ تک نہایت تفصیل سے سنایا جاتا تھا۔ اس نے الماری کھول کر ہینگر میں لٹکے کوئی سے بھی کپڑے ہاتھ بڑھا کر نکال لیے، منہ دھویا اور جب وہ شگفتہ چہرا لیے لوگوں کے درمیان آئی تو کسی کو اس سے کوئی شکایت ہونی نہیں چاہیے تھی۔

’’اوہو۔ آج تو فارا نے بھی کپڑے پہنے ہیں۔‘‘

اتنی تیاری کے باوجود فارا جھنجلا گئی، جیسے وہ ہمیشہ کپڑوں میں نہیں ہوتی تھی۔ لوگوں کے پاس لفظوں کی کس قدر کمی ہے۔ عالیہ کے ہر انداز میں طنز ہوتا تھا۔ وہ کہیں سے بھی بڑی امی کی بیٹی نہیں لگتی تھی۔ اس کی تربیت میں زیادہ عمل دخل چھوٹی امی کا ہی رہا تھا۔ وہ اپنی ماں سے زیادہ ان کو آئیڈیلائز کرتی تھی۔ وہ اس قدر اہتمام سے تیار ہونے کے باوجود سب سے پیچھے رہ گئی۔

آغا جی کی برابر والی شوخ رنگ کرسی اتفاق سے خالی تھی، ورنہ تو وہ ہر وقت دائیں بائیں ہر طرف سے گھرے ہی ملتے تھے۔ اس کے سادہ کپڑے، کرسیوں، سبزے اور پھولوں کو بہتات کے تضاد میں شامل ہو گئے۔

آغا سے پھوٹتی قیمتی کولون کی مہک فضا پرچھائی ہوئی تھی۔ کس قدر ہینڈ سم تھے اس کے بابا۔ دیکھو تو رشک آئے۔ ان کے پاس بےشمار کپڑے تھے۔ انہیں پہننے کا شوق بھی تھا اور تمیز بھی۔

’’دیر تک سوئی تھیں آج۔‘‘ آغا کی نرم مہربان مسکراہٹ نے کتنی دیر کے لیے اسے اپنے حصار میں لے لیا۔ یہ آغا ہی تھے جنہوں نے اس کی کسی بڑی سے چھوٹی بات پر کوئی اعتراض نہیں کیا۔ انہیں اس میں کوئی نقص نظر نہیں آتا تھا اور وہی تھے جن کے دم سے گھر گھر ہی لگتا تھا۔ وہ بہت دِنوں سے باہر ٹور پر گئے ہوئے تھے۔ وہ پاکستان سے باہر جاتے یا گھر سے باہر ہوتے تو ا س کے گرد پابندیوں کا حلقہ تنگ ہونے لگتا۔ وہ آ جاتے تو لگتا سر پر تنا آسمان ذرا پرے ہو گیا ہے۔

’’جواب تو دو۔‘‘ امی نے جھڑکا۔ انہیں آغا کا چمچہ بننے کا بڑا شوق تھا۔

آغا نے ایک نظر اسے سر سے پاؤں تک دیکھا۔

’’کس چیز کا جواب دے وہ۔ میں نے کوئی سوال تو نہیں کیا۔‘‘ دفاع کے لیے بھی وہی آئے تھے۔

اس قدر پرسکون اور آئیڈیل دکھائی دئیے جانے والے گھر میں اگر کسی کا دَم الجھتا تھا تو صرف اسی کا۔ اور کسی کو کہیں کوئی گھٹن محسوس نہیں ہوتی تھی۔ ان کو ہر طرح کی آزادی تھی۔ ساری شام وہ لبرٹی کے برآمدوں میں گھومتیں۔ ایک انگلی اٹھا کر چیز پسند کرتیں اور خرید لیتیں۔ دوسری بڑی تفریح گاہ ان کے درزی تھے۔ تیسری تفریح، کلب سے متعلقہ رات کے کھانے، بوفے یا باربی کیو۔ یہاں وہ ہمیشہ چچا تایا زاد کی حفاظت میں اپنی کی گئی بےشمار خریداری سے خراج وصول کرتی تھیں۔ وہاں شہر کی Elite اکٹھی ہوتی تھی۔ مشہور و معروف معزز اور نامور لوگ اور سب کے سب آغا سے واقف۔ اسمبلی کی رکنیت کے بعد تو آغا لوگوں کے کام بھی بہت آتے تھے۔ لوگ انہیں گھیرے میں لیے رکھتے۔ کتنا اچھا لگتا تھا سب لوگوں کو اپنی ولدیت پر فخر کرنا۔

وہ جاتی تو اسٹک اور چھری سے کھیلتی رہتی۔

’’کھانا اچھا نہیں ہے؟‘‘

نعمان اس کا کزن بھی تھا اور اس بات کے امکانات بھی تھے کہ وہی اس کا منگیتر بنےگا۔ گو اس کی عادتیں بھی باقی ماندہ خاندان والوں سے مختلف نہیں تھیں۔ جیپوں میں گھومنا، راہ میں آئی چیزوں کو کچل کر گزر جانا، اپنے خاندانی نسب پر نازاں ہونا اور چچا کے عہدے سے ناجائز فائدے اٹھانا۔

وہ اس کا خیال بس فرائض منصبی میں داخل سمجھ کر ادا کرتا رہتا تھا۔ ذہنی ہم آہنگی، لگاؤ، پیار محبت، ان ساری اصطلاحات پر قہقہے مارے جاتے تھے۔ سب شاعرانہ باتیں ہیں، ان کا حقیقی زندگی سے کوئی تعلق نہیں۔

عورت کو خوب، خوب صورت ہونا چاہیے۔ سجا بنا، چاہیں تو کسی شیلف میں سجانے کے لیے رکھ چھوڑیں۔ بیوی گھر میں ہونی چاہیے۔ مرد کا کیا ہے۔ اس کی تو شان اسی میں ہے کہ وہ کہیں بھی عارضی رشتے ہموار کر لیں۔ شاعر ان عارضی ناتوں میں ساری عمر کے لیے الجھ جاتا ہے اور جاگیردار پلٹ کر گھر واپس آ جاتا ہے۔ بس یہی مرتبہ ہے بیوی کا اور بہت بڑا اعزاز ہے اس کے لیے۔

’’اس کا کوئی استاد ہے۔ پتا نہیں کیا نام بتاتی ہے اس کا۔ وہ اس کے دماغ میں خنّاس بھرتا رہتا ہے۔‘‘ امی، آغا سے شکوہ کرتیں۔ وہ بےانتہا ادق اور گنجلک کتابوں سے سر اٹھاتے۔

’’بچی ہے۔ سنبھل جائےگی۔‘‘

’’بچی ہے؟‘‘ امی جھنجلا جاتیں،’’ صرف وہی بچی ہے۔ اس کے ساتھ کے باقی تو بڑے ہو گئے ہیں۔‘‘

’’اب ہر ایک کا اپنا رنگ ہوتا ہے۔‘‘ وہ بائی فوکل ناک پر ٹکاکر اوپر سے جھانکتے،’’ میں دیکھ رہا ہوں تم اس پر بہت زیادہ تنقید کرتی ہو۔‘‘

’’اب اس کی اصلاح بھی نہ کروں؟ شتر بے مہار چھوڑ دوں۔‘‘ امی مزید جھنجلا جاتیں۔

’’کیا حرج ہے۔ گنجائش نکالا کرو۔ زور زبردستی سے تم اپنا مطلب پورا نہیں کر سکتیں۔ پڑھی لکھی عورت ہو تم، جانتی ہو دبانے کا کیا نتیجہ نکلتا ہے۔‘‘

امّی سہم کر نرم پڑ جاتیں۔ تاریخ کا بوسیدہ صفحہ پھر سے پھڑ پھڑانے لگتا۔

’’اسی بات سے تو ڈرتی ہوں۔ آپ نے دیکھا نہیں ہو بہو اسی پر گئی ہے۔‘‘

’’یہ کس قسم کا ڈر ہے کہ اسے اور بھڑکا رہی ہو۔ بہرکیف وہ بات بالکل اور تھی۔ چھوڑ دو اسے۔ وقت گزر جائے گا تو وہ بھی تمہاری طرح سوچنے لگےگی۔ مجھے یہ کتاب ختم کرنی ہے اور کافی میں اپنے کمرے میں پیوں گا۔‘‘

وہ بات نامکمل چھوڑکر اپنے کمرے کی طرف چلے گئے اور امّی اپنے کمرے کی طرف جاتے اسے برآمدے کی تاریک سیڑھیوں پر بیٹھے دیکھ کر جھنجلاتی رہیں۔

’’کون آدمی ہے یہ سرکمال؟ یونیورسٹی میں پڑھاتا ہے فارا کو۔‘‘

وہ کوئی مناسب موقع دیکھ کر اپنے دیور کا دھیان خاندان کے معاملات کی طرف الجھاتیں۔

’’معلوم نہیں۔ پتا کرتا ہوں۔ خیریت تو ہے ناں؟‘‘

’’پتا کٹواؤ اس کا۔ نکلواؤ کم بخت کو نوکری سے۔ کہیں کھڈے لائن لگاؤ۔ دماغ خراب کر رہا ہے نئی نسل کا۔‘‘ وہ سخت نفرت سے زہر اگلتیں۔

چچا ایک چھچھلتی نظر نوکروں کے بچوں سے کوکلا جمال کھیلتی اپنی بھتیجی کی طرف ڈالتے کتنی دیر کے لیے خیالوں میں گم ہو گئے۔ پرانے خاندان میں نئی روایتیں پسند نہیں کی جاتیں۔ یہ تو وہ بھی دیکھ رہے تھے کہ ان کی یہ بھتیجی بالکل بے سروپا قسم کی لڑکی ہے اور ان کی بیوی کے بقول کچھ کچھ پاگل سی بھی۔ ان کا خیال تھا، اس عمر میں خود کو نمایاں کرنے کے لیے اس طرح کے کام بھی کرتے رہتے ہیں جو اور لوگ نہ کریں۔

ان کی بیوی نے انہیں یہ بھی منع کیا تھا کہ دونوں جٹھانیاں چلتا پرزہ ہیں۔ ان کے معاملات میں کبھی غلطی سے بھی دخل نہ دینا اور کوئی باضابطہ شکایت بھی تو ہو۔ آخر وہ دخل دیں اور بھائی کو سمجھائیں بھی تو کیا۔ یا فارا کو بھی کیا سمجھائیں کہ یہ نہ کرو، وہ کرو۔ مگر وہ کچھ ہو بھی۔

وہ شکایت ادھوری چھوڑکر اپنے کسی ذاتی کام سے لندن چلے گئے۔ وہ کچھ اور ہی سمجھے تھے۔ حالاں کہ اس قصے میں تو سرے سے جان ہی نہیں تھی۔

پھر جیسے واقعی کوئی مصیبت آنے والی تھی۔ اس کا مقدمہ بڑی امّی کی عدالت میں چلا گیا۔ حالاں کہ امی کو بڑی امّی سے شدید قسم کی نفرت تھی لیکن وہ جانتی تھیں اس جہالت اور اجڈپنے کے باوجود اگر کوئی شخص آغا کو رائے تبدیل کرنے پر مجبور کر سکتا ہے تو وہ بڑی امی ہی تھیں۔ آغا کوبھی بڑی امّی، بڑی امّی ہی لگتی تھیں۔ وہ ان کا اس قدر احترام کرتے، خاندان کی عورتوں کے قضیے سلجھانے میں ان کا مرتبہ عقل کل کا تھا۔ لہٰذا آغا کو قائل کرنے کے لیے ضروری ہے کہ بڑی امّی کو قائل کیا جائے۔

انہیں گاؤں سے بلوا کر بڑے احترام سے رکھا گیا۔ چھوٹی امّی نے صحیح معنوں میں انہیں تخت پر بٹھا دیا اور ان کی خدمت میں دن رات ایک کر دئیے۔ چھوٹی امّی کی وہ اولاد تھی۔ صرف انہی کو اس کے عبرت ناک انجام سے خوف آتا تھا۔ وہ کیا دیکھ رہی ہیں، وہ کسی کو سمجھا بھی نہیں سکتی تھیں۔ ہر فرد پر لازم ہے کہ وہ اپنے ہی سسٹم میں فٹ ہو، ورنہ وہ پاگل قرار دیا جاتا ہے۔ لوگ اس پر پتھر مارتے ہیں۔ انسانی ہمدردی، محبت، نیکی سب بہت ضروری باتیں ہیں اور جب خدا نے دیا ہے توکیوں نہ مدد کریں لوگوں کی۔ لیکن جذباتی طور پر ڈوب جانا اور یہ سمجھنا کہ میں غلط جگہ پیدا ہو گئی ہوں۔ یہ کنگلے قسم کے شاعر ادیب ہوتے ہیں، جو اس قسم کی باتیں کرتے ہیں۔

شاعروں، ادیبوں سے ان کی نفرت ختم ہوکر نہیں دیتی تھی۔ بڑی امّی منہ کھولے ان کی تقریر سنتی رہیں۔ ان کے پلے ایک لفظ بھی نہیں پڑا۔

’’کیا مطلب؟‘‘ انہوں نے سادگی سے پوچھا، ’’کیا چاہتی ہو؟‘‘

’’آپا! میں ماں ہوں۔ جو میری آنکھیں دیکھ رہی ہیں آپ کی نہیں دیکھ سکتیں۔‘‘ ان کے لہجے میں تلخی آ گئی، ’’باپ نے ویسے ہی کان بند کر رکھے ہیں۔ میں چاہتی ہوں، اس کی پڑھائی ختم کروا کے اس کی شادی کر دیں۔ میں دیکھ رہی ہوں، وہ بطور خاص نعمان کو جوتی کی نوک پر بھی نہیں رکھتی۔‘‘

’’ارے بےچاری۔‘‘ انہوں نے تاسف سے کہا، ’’اس قدر تو بے زبان ہے غریب۔ گائے کی طرح۔ نہ کبھی منہ کھولا نہ شکایت کی۔‘‘

امّی چڑ گئیں۔ بڑی امّی کے سارے محاورے گائے بھینسوں کے گرد ہی گھومتے تھے۔ وہ خود بھی بے چاری کب سے کیا کر رہی تھیں۔ بھینس کے آگے بین ہی بجا رہی تھیں۔

’’شکایت کس چیز کی کرے گی۔ کیا کمی ہے؟‘‘ امی منہ پھیر کر بڑبڑانے لگیں۔

’’کیا ہوا تمہیں؟‘‘ ندا نے سیڑھیاں اترتے اس کا چہرہ لمحے بھر کے لیے دیکھا۔ وہ بہت ذہین قسم کی لڑکی تھی، اوپر اوپر بھی تیرتی تو موتی نکال لاتی تھی۔

’’پھر کوئی مسئلہ ہو گیا ہے گھر میں؟‘‘

’’ہاں۔ مسئلہ میں ہوں گھر بھر کے لیے۔‘‘ اس نے تھکے تھکے لہجے میں کہا، ’’امی کا خیال ہے میری شادی کر دینی چاہیے۔‘‘

’’شادی؟ لیکن ابھی تو تمہارا فائنل پڑا ہے۔‘‘

’’ایم اے کرنے سے کیا ہوتا ہے، یہ تو یونہی ہوتا ہے بے کار۔ ہمارے خاندان کی بیشتر لڑکیاں پڑھائی ادھوری چھوڑ کر ہی شادی کرتی ہیں۔‘‘

’’یہ بھی کوئی شرط ہے؟‘‘

’’اور میں تو ویسے بھی خراب ہو رہی ہوں۔‘‘

’’ارے تمہارے خراب نہ ہونے کا ہی تو گلِہ ہے ہم سب کو۔ اچھا آؤ، یہاں بیٹھو۔‘‘وہ گھاس پر پھسکڑا مار کر بیٹھتے ہوئے بولی، ’’کیا مسئلہ ہے تمہارے ساتھ؟ تم کسی ایک طرف کیوں نہیں ہو جاتیں؟ کیوں لٹکی ہو بیچ میں؟ جس سسٹم کا تم حصہ ہو، اس سے کٹی ہوئی ہو۔ تمہیں اپنے ڈی کلاس ہونے سے بھی ڈر لگتا ہے۔ اِس طرف یا اس طرف۔ کسی ایک طرف تو ہو جاؤ۔ تمہاری خوشیاں بھی ادھوری ہیں اور غم بھی یا مکمل طور پر خوشی حاصل کر لو یا خود کو بالکل ہی غم کے راستے پر چلا ڈالو۔ تم اصل میں ادھورا انسان ہو۔ تم جن لوگوں کے درمیان رہتی ہو، ان کی طرح سوچتی نہیں اور جن کی طرح سوچتی ہو، ان کے درمیان رہنے کی جرأت نہیں تمہارے اندر۔‘‘

ندا تاسف سے اس کو گاڑی ریورس کر کے جاتے دیکھتی رہی۔ پتا نہیں اس نے کیا سوچا ہے اور کیا کرےگی۔

’’یہ جس سوسائٹی کا حصہ ہے وہاں اسی طرح ہوتا ہے۔‘‘ سر کمال نے ندا سے سارا قصہ سن کر کہا تھا، ’’یہ لوگ اپنی بیٹیوں کو ہر طرح کی آزادی دیتے ہیں۔ عیش کریں۔ گھومیں پھریں۔ تفریحات کریں۔ گاڑیاں چلائیں اور ان کے عین ناک کے نیچے جس سے جی چاہے فلرٹ کریں۔ لیکن شادی اپنی مرضی سے نہیں کر سکتیں۔ اس کے لیے انہیں ٹائپ پر پلٹنا پڑتا ہے۔ تم افسوس نہ کرو۔ میں دیکھ رہا ہوں، ایک دن وہ بھی اپنے ٹائپ پر لوٹ جائےگی اور اپنی پڑھی لکھی ماں کی طرح وہ بھی اپنی بیٹی کی زندگی اسی طرح اجیرن کرےگی۔ ارے بھئی ان کے بچے بھی گندم کی فصل ہوتے ہیں۔ یہ نہ بوتے نہ کاٹتے ہیں۔ صرف اپنا حق جتانے آ جاتے ہیں۔‘‘

پھر گروپ میں ہلچل سی مچ گئی۔ ’’کیا واقعی فارا مصطفی ایسے کرےگی۔ غریب خود کو ہر طرح سے ڈی کلاس تو کر چکی ہے۔ کیا کرے گی بےچاری۔‘‘

اس کے دوست روزگار کی چکی میں پستے تھے۔ نوکری کے لیے جوتیاں چٹخاتے۔ ماں باپ کی امیدوں پر پورا اترنے کے لیے اپنے اپنے کمپلیکسز میں گرفتار۔ ہر شخص اپنا طبقہ چھوڑکر دوسرے طبقے میں جا ملنے کے لیے ہراسا ں تھا۔ فارا مصطفی کی مصیبتیں ان کی سمجھ میں نہیں آ رہی تھیں۔ لیکن ان کی عادت تھی، وہ بحث کرتے رہتے تھے۔ لہٰذا فارا کا مسئلہ بہ زبانی ندا ان تک پہنچا بھی، زیربحث بھی آیا اور پھر ان کو اپنی اپنی الجھنوں نے گھیر لیا اور فارا کا مسئلہ چوں کہ معمولی سی نوعیت کا تھا جن کو ان کی زبان میں پیٹی (Petty) کہا جاتا تھا لہٰذا وہ رد کر دیا گیا۔

چھوٹی امی کی چھٹی حِس اس قدر قابلِ اعتبار نہیں گردانی گئی کہ اس کو مفروضہ بنا کر فساد اٹھایا جاتا۔ کوئی قابلِ گرفت بات تھی بھی نہیں۔ پکڑ ہوتی تو کس چیز پر؟ کسی نے ان کے اندیشوں کو قابل اعتنا نہیں گردانا۔ وہ پیر پٹختی رہ گئیں۔

کیا کر رہی تھی وہ؟ ایک خاص ماحول میں ایک عام زندگی گزار رہی تھی۔ اپنی اچھی اچھی کزنز اور پیاری پیاری بہنیں چھوڑ کر نوکروں کے بچوں سے بہناپا جوڑتی۔ شام میں جس وقت ان کا لان ہر طرح کی چہکار سے گونج رہا ہوتا۔ وہ نوکروں کے کوارٹروں کے پیچھے ان کے بچوں کو پڑھانے چلی جاتی۔ اس کی آمد سے لوگ سہم جاتے۔ وہ اپنا مقام بھول گئی تھی لیکن انہیں اپنی اوقات یاد رکھنے کی عادت تھی۔ وہ جتنی دیران کی طرف رہتی، بچوں کی مائیں خوف زدہ سی سہمی سہمی اس کے جانے کی دعائیں مانگتی رہتیں۔ جیسے کوئی خون آشام بلا، شام پڑے ہر روز ان کی بستی میں خون پینے آ جاتی ہو۔

البتہ بچے ان تفکرات سے آزاد تھے۔ انہیں اس کی آمد دہشت زدہ کرنے کی بجائے سرشار کر دیا کرتی تھی۔ پھر اس کے سبق بھی بہت عجیب تھے۔ وہ آتے ہی سنگی بنچ پر بیٹھ جاتی۔ بچے اس کے سامنے گھاس پر چوکڑی مار کر کاپیاں کتابیں کھول لیتے۔ اردو کی کتابوں میں لکھے نصیحت آموز سبق وہ گھول گھول کر پلا ڈالتی۔

’’سب انسان برابر ہیں۔ کسی کو کسی پر برتری حاصل نہیں۔‘‘

’’حق کا بول بالا ہوتا ہے۔‘‘

’’فتح ہمیشہ سچ کی ہوتی ہے۔‘‘

’’خدمت میں عظمت ہے۔‘‘

’’تقویٰ کیا ہوتا ہے باجی۔ برابری کیسے کی جاتی ہے؟ برتری کس کو حاصل ہوتی ہے؟ کیا سچا آدمی ہمیشہ جیت جاتا ہے؟‘‘ ایک، دو، تین، وہ سب سوالوں کے اپنی بساط اور ان کی سمجھ کے مطابق جواب دیتی جاتی۔

اس دن اچانک اس نے محسوس کیا کہ نزدیکی کیاریوں میں کام کرتے کرتے مالی نے کھرپی روک دی تھی۔ وہ دور دوزانو بیٹھا بڑی دلچسپی سے اس کا سبق سن رہا تھا۔ اسے خیال آیا کہ پچھلے دو تین روز سے اسی طرح ہو رہا تھا۔ وہ جب بھی پڑھانے آتی، وہ اس کے آس پاس ہی کہیں کام کرتا ملتا۔ کبھی کام چھوڑکر وہ اپنا سارا دھیان اس کے سبق پر لگا دیتا۔ کبھی اس کی توجہ اس طرف بے دھیانی میں پڑتی تو جلدی جلدی مٹی کھودنے لگتا۔ لیکن اس کے کان جیسے اس طرف ہی لگے رہتے تھے۔

’’کیا بات ہے مالی؟‘‘ اس نے کتاب بند کرکے اسے ٹوکا۔

’’کوئی بات نہیں جی!‘‘ اس نے گڑبڑاکر سر پودوں میں دے لیا۔

’’پڑھنا چاہتے ہو؟‘‘

’’نہیں جی، نہیں۔‘‘ وہ جلدی جلدی تردید کرنے لگا۔

’’پڑھنا کوئی بری بات تو نہیں ہے۔ اگر پڑھنا ہے تو ان کے ساتھ آکر بیٹھ جاؤ اور نہیں پڑھنا تو دھیان سے اپنا کام کرو۔ دو طرف توجہ دینے سے کام ایک بھی نہیں ہوتا۔‘‘

وہ شوق سے کھرپی پھینک کر بچوں کے درمیان آبیٹھا۔

’’چلو ماجد۔ تم اپنا قاعدہ مالی بھائی کو دے دو۔ کیا نام ہے مالی تمہارا؟‘‘

’’ولی جی۔ عبدالولی۔‘‘

’’شوق ہے تمہیں پڑھنے کا، عبدالولی؟‘‘

’’بےحد جی۔‘‘

’’ٹھیک ہے۔ اس وقت میں ان سب بچوں کو پڑھاتی ہوں۔ تم بھی آجایا کرو۔‘‘

’’کیوں؟‘‘ اس نے ہنستے بچوں کو زور سے جھڑکا، ’’پڑھائی لکھائی ہنسنے کی بات ہے کیا؟ تھوڑا بہت پڑھنا آتا ہے تمہیں عبدالولی؟‘‘ اب وہ مالی کی طرف متوجہ تھی۔

’’جی، میں نے میٹرک کیا ہے۔‘‘

وہ ٹھٹک سی گئی۔

’’پھر آگے کیوں نہیں پڑھا، جب تمہیں شوق بھی تھا؟‘‘

’’میرے ابا کہتے تھے، پڑھائی بےکار ہے۔ دماغ خراب کر دیتی ہے۔‘‘

’’دماغ تمہارے ابا کا خراب ہے۔ پڑھائی نے بھی کبھی کسی کو خراب کیا ہے۔‘‘

’’وہ کہتے تھے ایف اے کروگے، بی اے کرو گے، پھر کلرک لگ جاؤگے۔ آپ کے علم میں نہیں ہے شاید، لیکن کلرک کی تنخواہ آپ کے مالی سے آدھی ہوتی ہے۔‘‘

’’تمہارے خیال میں تنخواہ ہی سب کچھ ہوتی ہے۔ ذہنی شعور۔ عقل۔ فہم و فراست۔‘‘

’’ان سب کی آپ کو ضرورت ہے بی بی! ہمیں تو تنخواہ چاہیے۔ روٹی کھانے کے لیے۔‘‘

باوجود آزاد خیالی کے ایک سرد لہر اس کی ریڑھ کی ہڈی کو یخ کرتی گزر گئی۔ غنیمت ہوا کہ اطراف میں اس کے ماحول کا کوئی آدمی نہیں تھا۔ ورنہ مالکوں کی لڑکی سے اس گستاخی سے بولنے پر اس کا کیا انجام ہوتا۔ وہ کانپ کر رہ گئی۔

’’بات سنو۔‘‘ اس نے دھیمے لہجے میں کہا، ’’یہ بچے بہت چھوٹے ہیں اور ابھی ابتدائی جماعتوں میں پڑھ رہے ہیں۔ میں انہیں چھے بجے تک پڑھاتی ہوں۔ تم اس کے بعد میرے پاس آجایا کرو۔ گھڑی ہے تمہارے پاس۔‘‘

’’آپ کے گھر میں چپے چپے پر گھڑیاں لگی ہیں۔ کہیں بھی وقت دیکھ لوں گا۔‘‘

’’اب تم وقت دیکھنے کے لیے کمروں میں بھاگتے پھروگے۔‘‘ اس نے استاد انہ اختیارات سنبھالتے ہی اسے جھڑکا۔

’’یہ لو۔‘‘ اس نے اپنی کلائی سے گھڑی اتارتے ہوئے کہا، ’’ہے تو یہ عورتوں والی۔‘‘

’’کوئی بات نہیں بی بی! مردوں کو بھی یہ وہی وقت بتائےگی جو عورتوں کو بتاتی ہے۔‘‘

وہ اس کی گھڑی تھام کر کپڑے جھاڑتا اس کو ہکا بکا چھوڑ کر اٹھ کھڑا ہوا۔

’’اور ہاں۔‘‘ اس نے جاتے جاتے اسے ٹوکا، ’’آج سے نہیں کل سے۔ چھے بجے۔‘‘

کل تک اس کو وقت درکار تھا، اپنی ذہنی جھاڑ پونچھ کے لیے۔ اس کے حالات تلخ رہے تھے غالباً اور تلخی کا یہ زہر اس کی زبان بھی بار بار اگلتی تھی۔ اسے خود پر قابو پانا سکھانے کی ضرورت ہے۔ اگر اس تلخی کے معمولی چھینٹے بھی اس کی بجائے کسی اور پر جا گرے، تو اس کا انجام اچھا نہیں ہوگا۔ یہ سب لوگ ان کے نوکر ہیں اور ان کے باپ دادا، آقاؤں کے باپ دادا کے نوکر رہے تھے۔ کون کہتا ہے، دور غلامی ختم ہو گیا۔

سر کمال کہا کرتے تھے، راستہ مل جائے تو بھولا بھٹکا منزل تک پہنچ جاتا ہے۔ لیکن ان بھول بھلیوں میں راستوں کی تلاش ہی تو اصل بکھیڑا ہے۔ کہاں ہے درست سمت۔ کتنی مدت بعد اسے سبجیکٹ ملا تھا اور تاریخ میں اپنا نام لکھوانے کا سنہری موقع۔ وہ خود بھی تو راستوں کی تلاش میں تھی۔ منزل نہ سہی کوئی نشان تو ملے۔

پھر اگلی شام گاؤں سے عابدہ اور بڑی امی آ گئے۔ عابدہ کی شادی کے دن قریب تھے۔ وہ عموماً اپنے کزن کم منگیتر کے ساتھ ہی خریداری کرتی پھرتی تھی اور شہر آنا بھی کسی ضروری خریداری کے سلسلے میں ہوتا تھا۔ لیکن فاراکو اس کی آمد شاد آباد کر دیتی۔ اس نے ساری زندگی فارا سے نہیں کہا تھا، ’’یہ تم نے غلط کیا ہے۔ تم نے ایسے کیوں کیا؟‘‘

اسے کسی کیوں کی ضرورت نہیں پڑتی تھی۔ اسے فارا پر عجیب و غریب قسم کا اعتبار تھا۔ جس بات کو ساری دنیا نے مل کر رَد کر دیا ہو، اگر فارا کو قبول ہے تو پھر وہ بات غلط ہو ہی نہیں سکتی۔ اس زمانے میں بھی جب حویلی کا ہر بچہ ہم جولیوں کو مار کر گھر آتا تھا۔ وہ ان کے ساتھ قابلِ احترام طریقے سے کھیلا کرتی تھی۔ کسی کو اجازت نہیں تھی دوڑ میں حویلی کے بچوں سے آگے نکلے یا ان کی مار کے جواب میں ہاتھ اٹھانا تو درکنار حرف شکایت بھی زبان پر لائیں۔ اس مصنوعی ماحول سے نکل کر جب وہ شہر میں آتے تو انہیں مقابلے کی آگ میں جھلسنا پڑتا تھا۔ اسی لیے وہ گھر میں بند ہو کر رہ جاتے۔ ان کی شہروں میں دوستیاں کم کم ہی ہوتی تھیں۔ عابدہ خود چھڑی اٹھا کر مارتی رہی لیکن اس نے فارا کو کبھی مجبور نہیں کیا تھا کہ وہ بھی مارے۔ اس میں فارا کے لیے ممتا سی پائی جاتی تھی۔

عابدہ بہت خوش تھی۔ ضیا بھائی بھی بہت اچھلتے پھر رہے تھے۔ ممانی نے ضیا بھائی سے کہا تھا، ’’اس کو اس کی مرضی کی خریداری کروا لاؤ۔‘‘ اور وہ اپنی مرضی چلاتے پھر رہے تھے۔

’’ساڑھیاں مت خریدو۔ بہت بری لگتی ہیں۔ آخر کس قدر غرارے خریدوگی؟‘‘

وہ بہت خوش تھے، اس لیے تھوڑا بہت اِترانے کا حق تو انہیں بھی تھا۔ وہ باقی چیزیں خریدنے دوبارہ باہر نکلے تو رات ہو چکی تھی۔ وہ مکتب پہنچی تو سات بج رہے تھے۔ بچے تو اس کی آمد سے مایوس ہوکر جا چکے تھے۔ لیکن نیم ملگجے اندھیرے میں وہ سر جھکائے جیسے ابھی تک اس کی آمد سے مایوس نہیں ہوا تھا۔ زنانہ سنہری ڈائل کی نازک سی گھڑی باندھے وہ بنچ کے ایک کونے میں بیٹھا کس قدر مسخرہ سا لگ رہا تھا۔

’’مہمان آ گئے تھے۔ دیر ہو گئی، سوری۔‘‘ پہل اس نے ہی کی۔

’’اور میں سوچ رہا تھا گھڑی تو آپ نے مجھے دے دی۔ شاید وقت نہیں دیکھ سکیں۔‘‘

اس نے چونک کر اس کی طرف دیکھا۔ وہ سر جھکائے سنہرے ڈائل کی ننھی منی گھڑی سے کھیل رہا تھا۔ اس کا سر اس قدر نیچے تھا کہ اسے پتا ہی نہیں چل سکا، وہ تمسخر فرما رہا تھا یا حسب عادت تلخ کلامی کے موڈ میں تھا۔

’’اندھیرا ہو گیا۔ اب کیسے پڑھیں گے؟‘‘ فارا نے خاموشی سے ہتھیار پھینک دئیے۔

’’پڑھیں گے کیا، ابھی تو یہ بھی معلوم نہیں۔‘‘

’’معلوم کیوں نہیں۔ اس سال تمہیں ایف اے کا امتحان دینا ہے۔‘‘ اس نے حتمی لہجے میں کہا۔

’’اس سے اگلے سال بی اے کا۔ پھر اس سے اگلے سال ایم اے کا۔ میں دو ہی سالوں میں آپ کے برابر آجاؤں گا۔ یقین کیجئے میں بہت ذہین آدمی ہوں۔‘‘

’’ایم اے، بی اے اس طرح نہیں ہوتے سال کے سال۔ پڑھائی کرنے میں اور مٹی کھودنے میں بہت فرق ہے۔‘‘

وہ بلا وجہ ہی اس کی برابری پر اتری تھی۔ کبھی کبھی جاگیردارانہ بیک گراؤنڈ اس پر حاوی ہو جاتی تھی، وہ شرمندہ بھی ہوئی۔ دراصل اسے ا س کی بےلگام زبان سے خوف آنے لگا تھا۔ لیکن وہ تو بےساختہ ہی مسکرا دیا۔

اس کا خیال تھا، وہ گزشتہ روز کی طرح دولت کے بارے میں عجیب و غریب خیالات کا اظہار کرےگا۔ لیکن اس کی کھلتی ہوئی مسکراہٹ نے جیسے اس کے چاروں طرف اجالے بکھیر دئیے۔

’’دراصل آپ چاہتی نہیں ہیں کہ آپ کے برابر آ جاؤں۔ حالاں کہ اس کی ابتدا میں نے کر دی ہے، آپ کے برابر اس بنچ پر بیٹھ کر۔ آپ حکم دیں تو نیچے بیٹھ جاؤں۔‘‘

اس کا جی تو چاہا اسے حکم دینے کو۔ لیکن پھر اسے لگا ا س کی تربیت سے زیادہ اس کو خود اپنی تربیت کی ضرورت تھی۔

’’اس سے کوئی فرق نہیں پڑتا۔ تم بچے تو نہیں ہو جو نیچے بیٹھوگے۔‘‘ وہ خجل ہونے لگی تھی۔

’’اور ہاں کل سے تم ایف اے کی کتابیں لے آؤ۔ پڑھائی شروع کر دو۔ یہ ذہانت کے مظاہرے مجھ پر آزمانے کی بجائے کورس پر آزماؤ۔ میٹرک میں تمہارے پاس کیا تھا، سائنس کہ آرٹس؟‘‘

’’ہمارے سکول میں صرف آرٹس ہی پڑھایا جاتا تھا۔ ‘‘فارا نے لمحہ بھر کے لیے اس کی طرف دیکھا حالاں کہ اس لمبے فقرے کی بجائے لفظ ’’آرٹس‘‘ بھی اس قدر مکمل جواب تھا لیکن وہ باتونی آدمی ہر سیدھی اور آسان بات کو کس قدر گھما کر بیان کرتا تھا۔

’’ٹھیک ہے۔‘‘ اس نے استادانہ سختی اختیار کرتے کہا، ’’میں بھی تمہیں صرف آرٹس ہی پڑھا سکتی ہوں۔ ہسٹری میرا اپنا مضمون ہے۔ باقی دو بھی سیدھے سادے مضمون رکھ ڈالو۔ باقاعدہ ٹائم ٹیبل بناکر پڑھائی شروع کرنی ہے۔ کوئی ناغہ نہیں۔ کوئی کام چوری نہیں۔ میں تمہیں کامیاب انسان دیکھنا چاہتی ہوں۔‘‘

وہ دفعتاً اٹھ کر اندر چلی گئی۔ آسمان سے اندھیرا برسنے لگا تھا۔ کتابیں موجود بھی ہوتیں تو پڑھانا مشکل تھا اور یوں بھی غالباً اس کو پڑھانا ایک مشکل کڑی ثابت ہوگی۔

زاہدہ کی منگنی ہوئی تھی۔ اس نے سب دوستوں کو کیتھے میں سوپ کی دعوت دی۔ باہر بارش چھم چھم برس رہی تھی۔ فارا کے دل میں بےسبب اداسی اتر آئی۔ اس نے شیشے کے نزدیک ہونے کی و جہ سے باہر کے ماحول پر آنکھیں جما دیں۔ بچے بارش میں شور مچاتے پھر رہے تھے۔ اچھے اچھے صاف کپڑوں والے پیدل چلتے لوگ گاڑی کے چھینٹوں سے خود کو کتنی مشکل سے بچاتے اپنے اپنے راستوں پر اپنی اپنی منزل کی سمت دوڑ رہے تھے۔

اندر کسی بات پر زور سے قہقہہ پڑا۔ اسے پہلی مرتبہ احساس ہوا، وہ کبھی کسی بات پر جی بھر کر خوش نہیں ہو سکتی۔ اس کے آس پاس کہیں کوئی بے ساختہ مسکراہٹ اور کھلے دل موہ لینے والے قہقہے نہیں ہیں۔ پھر اس کی ذہنی رَوبھٹکی۔ جیسے کسی خیال سے کوئی دوسرا خیال بے ساختہ ذہن میں آتا ہے۔

’’فارا غائب دماغی سے بیٹھی ہے۔ اس پر پھر دورہ پڑا ہے۔‘‘ لوگ ہنس رہے تھے۔

’’میں آتی ہوں۔‘‘ وہ دفعتاً اٹھی اور دو قدم دور کتابوں کی سب سے شان دار دکان میں گھس گئی۔

نصاب کے ریک میں رکھی ایف اے کی کتابیں وہ ترتیب سے جمع کرتی رہی۔ جتنی ممکنہ چیزیں اس کے ذہن میں آ سکتی تھیں۔ اس نے سب خرید ڈالیں۔ بہت ساری پینسلیں، بال پین، قلم، کاغذ، کاپیاں۔ پھر ایک لفافہ خرید کر اس میں کچھ پیسے ڈالے اور تھیلا ہاتھ میں اٹھائے وہ ہنستی مسکراتی اپنے مجمعے میں واپس آ ملی۔

ہنگامہ ابھی زندہ تھا۔ لوگ اس ہنگامے سے خوش ہوکر بھی جی لیتے ہیں، جس کی عمر عارضی اور مدت مختصر ہو اور جو موجودہ لمحے میں آپ کے سامنے سے گزر رہا ہو، اسے خوش رہنے کے لیے ٹھوس حقیقت کی ضرورت ہوتی تھی۔ اسی ترازو کو ہاتھ میں پکڑے وہ محرومی سے دونوں پاٹوں کی طرف دیکھتی رہ جاتی۔ کبھی جنس کم رہ جاتی کبھی وزن۔ اسی لیے وہ ان خوشیوں سے قطعی محروم تھی، جو ان سب کو سوپ کے ایک پیالے کے عوض حاصل تھیں اور وہ سب کے سب اس پر بھاری بھرکم اصطلاحات کا بوجھ لادے ڈال رہے تھے۔

’’تمہیں زندگی کے سامنے ہتھیار ڈال دینے چاہئیں۔ تمہیں اپنی شکست قبول کر لینی چاہیے۔ فرار اختیار کرنے سے مسائل کے حل نہیں ملتے۔ حقیقت کا سامنا کرو۔‘‘

گویا ان کے ہاتھ ایک تجربہ گاہ آ گئی تھی۔ بودے خیالات اور کمزور سوچوں والے لوگ اپنی تمام علمیت اس پر الٹ کر ہی سرشاری محسوس کرتے تھے۔ بڑا اچھا لگتا ہے کسی کو اس بری طرح تنقید کا نشانہ بنانا، جب وہ اپنی الجھنوں میں ڈوبا خاموشی سے آپ کو سنتا بھی رہتا ہو۔ حقیقتیں کسی کو خوشیاں نہیں دے سکتیں۔ اس وقت کی سب سے بڑی حقیقت یہ گدلے مٹیالے رنگ کا رقیق سیال ہی رہ گیا تھا۔

’’چلو بھئی، جس جس کو جہاں جہاں جانا ہے۔‘‘

اپنی ذاتی ذمےداری سمجھتے ہوئے اس نے کار اور چابی دونوں سنبھال لیں۔ ایک ایک کو ان کے گھر اتارتی، وہ ان سب سے کامیاب زندگی گزارنے کے گر سیکھتی چلی آ رہی تھی۔ ہم کتنی آسانی سے لوگوں کو کچھ نہ کچھ سکھاتے رہتے ہیں۔

’’سنو مراد۔‘‘ اس نے برآمدے میں اپنے چھوٹے بھائی کو پکڑ لیا، ’’یہاں ایک مالی کام کرتا ہے عبدالولی۔ وہ عموماً بیک یارڈ میں ہوتا ہے نوکروں والے کوارٹر کی طرف۔ یہ کتابیں اس کو دے دینا۔‘‘

’’اوہو۔‘‘ عالیہ کو بےسبب ہنسی کا دورہ پڑ گیا،’’ اب تم نے تعلیم بالغاں بھی شروع کر دی۔‘‘

’’میری بیٹی کا دل بہت بڑا ہے۔ وہ ہمیشہ بانٹ کر کھاتی ہے۔‘‘ بڑی امّی نے کھٹی لسی والے سینے میں اسے چھپا لیا۔

’’اور اپنی پڑھائی۔ اپنی پڑھائی کی کوئی فکر ہے، چاہے فیل ہو جائے۔‘‘ چھوٹی امی بڑبڑائیں۔

وہ چھے بجنے سے پہلے اپنا بستہ لے کر آموجود ہوا۔ جب تک بچے پڑھتے رہے، وہ اچھے بچوں کی طرح خاموش بیٹھا اپنی باری کا انتظار کرتا رہا۔ بچے چلے گئے تو اس نے اپنا پولی تھین کا وہ لفافہ کھول لیا جو آج ہی اسے موصول ہوا تھا۔ اس میں اس کی نئی کتابیں تھیں۔ نئی کتابوں کی خوشی اس کے چہرے پر پہلی جماعت میں پاس ہونے والے بچے کی طرح بکھری ہوئی تھی۔ اس میں ہی وہ لفافہ بھی پڑا تھا جس میں اس نے چپکے سے پیسے ڈال کر گوند سے بند کر دیا تھا۔ اس نے دیکھا لفافہ کھول لیا گیا تھا۔ اس نے غور سے نہیں دیکھا۔ لفافے میں پیسے تھے یا نہیں۔ اسے اس کی یہ خودداری بہ یک وقت اچھی بھی لگی اور بری بھی۔ جیسے ان سب چیزوں پر اس کا حق تھا۔ اس نے بغیر شکریہ ادا کیے ہر چیز اپنے اختیار میں کر لی تھی۔

کتاب ہاتھ سے لیتے ہوئے اس کی نگاہ بےاختیار اس کے ہاتھوں کی طرف گئی۔ اس کے کپڑے اپنے باقی ماندہ قبیل کے لوگوں کی طرح کیچڑ مٹی میں اٹے ہوئے تھے لیکن ہاتھ بالکل صاف ستھرے تھے۔ ناخن صاف ستھرے ترشے ہوئے اور ان کے کونوں میں مٹی کیچڑ یا میل بھی پھنسی ہوئی نہیں تھی۔ صرف ہاتھ ہی دیکھو تو لگتا تھا کسی بڑے گھر میں پیدا ہوتا تو خوب نام کماتا۔

’’کیا کرتے ہیں تمہارے ابا؟‘‘ وہ اسی طرح اچانک سوال اچھال دیا کرتی تھی۔ سب کچھ دل میں سوچ کر کہیں درمیان سے فقرہ بول دیتی۔

’’سکول ٹیچر ہیں۔‘‘

’’تب بھی کہتے ہیں، پڑھائی بےکار ہے۔‘‘

’’تبھی تو کہتے ہیں۔‘‘ اس نے ذرا سے توقف سے سر اٹھایا۔

’’ان کے پڑھائے ہوئے بدشوق طالب علم کہاں سے کہاں پہنچ گئے۔ وہ وہی ہیں، ماسٹر کے ماسٹر بلکہ اگلے سال تو وہ ریٹائر بھی ہو رہے ہیں، اسی پوسٹ سے جہاں سے انہوں نے نوکری شروع کی تھی۔‘‘

اسے پہلی دفعہ اندازہ ہوا، دل پر گھونسا کیسے مارا جاتا ہے۔

’’بہرکیف۔‘‘ اس نے لمحہ بھر کے لیے دنیا کی بے رحمیوں سے آنکھیں بند رکھنا چاہیں، ’’اس کا مطلب یہ نہیں ہے کہ پڑھائی بند کرا دی جائے۔ کیا عمر ہے تمہاری؟‘‘

’’پتا نہیں۔ میرا قومی شناختی کارڈ آپ کے والد کی تحویل میں ہے۔‘‘

’’کیوں؟‘‘

’’پتا نہیں کیوں؟ وہ کسی پر بھی یقین نہیں کرتے، اسی لیے سب کے کارڈ ضبط کر لیتے ہیں۔ میں تو خیر نیا آدمی ہوں جن کے باپ دادا بھی یہاں غلام رہے ہیں، وہ ان کے کارڈ بھی اپنے پاس رکھتے ہیں۔ شاید ان کو ڈر ہے ہم لوگ کچھ چراکر بھاگ نہ جائیں حالاں کہ جو چور ہوتے ہیں، وہ سینہ زور بھی ہوتے ہیں۔ خیر آپ تو اطمینان رکھیے اور پڑھائیے۔‘‘

’’میرا پوچھنے سے مطلب تھا، تمہیں میٹرک کیے کتنے سال ہو گئے ہوں گے؟‘‘

’’دس بارہ سال۔ اب خدا کے واسطے یہ مت کہہ دیجئے گا کہ تم پڑھ نہیں سکتے۔‘‘

’’تم پڑھ نہیں سکتے، کیوں کہ تم بک بک بہت کرتے ہو۔‘‘

’’نہیں نہیں پلیز۔ آپ پڑھانا نہ چھوڑئیےگا۔ میں بک بک کرنا بند کر دیتا ہوں۔‘‘

’’اچھا۔ کل ایک مضمون لکھ کر لانا، ’’تعلیم کی اہمیت‘‘۔ چاہے حق میں لکھو چاہے خلاف۔ مضمون مکمل ہو اور مدلل۔‘‘

’’مجھے انگریزی نہیں آتی۔‘‘ اس نے بے پروائی سے کہا۔

’’اردو میں لکھ لینا۔‘‘

’’میری تحریر دیکھ کر آپ پریشان ہو جائیں گی۔‘‘

’’نخرے مت کرو۔‘‘ اس نے جھڑکا، ’’پڑھنے آئے ہو یا ادائیں دکھانے آئے ہو۔‘‘

فارا نے دیکھا وہ فرشتے والی کہانی کی طرح جب مسکراتا تھا چاروں طرف اجالے بکھیر دیتا تھا۔ حالاں کہ کم کم ہی مسکراتا تھا۔

بڑی بےساختگی ہی میں وہ اس کی آنکھوں میں دیکھ کر ہنس دیتا۔ پھر جب مسکراہٹ ضبط بھی کر لیتا تو اس کی احتراماً جھکی ہوئیں آنکھیں دیر تک اس فقرے کا لطف لیتی رہتیں۔

انہی دنوں میں رضا بھائی کی شادی کی تاریخ رکھی گئی تھی۔ ان کی منگیتر گاؤں میں تھی۔ بی اے کرنے کے بعد مزید ڈگریاں حاصل کرنے کا شوق نہ ہونے کی وجہ سے وہ بڑی امی کی تحویل میں چلی گئی تھی۔ اسے شو بزنس سے بے حد دلچسپی تھی اور ہیروئن بننے کی بچپن سے خواہش تھی لیکن باوجود ہر طرح کی آزاد خیالی کے بڑی امی نے ابھی تک اس شوق سے کمپرومائز نہیں کیا۔ گو وہ ہر روز کا ڈراما بڑے اہتمام سے دیکھتیں، ہر کام کرنے والی فنکارہ کا نام بھی ان کو زبانی یاد ہوتا تھا لیکن بینا کو ایک آدھ ڈرامے میں چھوٹا موٹا شوقیہ رول کرنے کے بعدقطعی اجازت نہیں ملی۔ حالاں کہ اس نے ایکٹنگ بھی کوئی خاص نہیں کی اور اس کا رول بھی قطعی غیر اہم سا تھا، اس کے باوجود اسے کس قدر ملال رہا کہ چھوٹی سکرین نے ایک گنج ہائے گراں مایہ ضائع کر دیا۔

اس خاندان میں مردوں کو ڈگریاں اکٹھی کرنے کا بےحد شوق تھا۔ جیسے خواتین سونا جمع کرتی تھیں، لڑکے دنیا کے چپے چپے سے ڈگریاں لے کر آ رہے تھے۔ لہٰذا رضا بھائی بھی جب تک خاندانی رسومات کو مدنظر رکھتے ڈگریاں لیتے رہے، بینا مختلف کورسز کرتی رہی۔ شارٹ ہینڈ کورس، فرنچ سیکھنے اور انٹیرئیر ڈیکوریشن میں مہارت حاصل کرنے کے بعد وہ ہاتھ پر ہاتھ رکھ کر اپنی شادی کا انتظار کرنے لگی۔ لہٰذا رضا بھائی جب لاء کی ممکنہ ڈگریاں لے کر واپس آئے تو خاندان کے باقی ماندہ افراد کی طرح یہ ڈگریاں بھی کافور کے صندوق میں بند کر کے رکھ دی گئیں اور اپنی جاگیر پر وہ اسی ٹھسے سے آ بیٹھے۔

فارا نے دیکھا ان کی آنکھوں میں ایسی ہی پر غرور رعونت تھی جو ان کے پڑدادا سے انہیں ورثے میں ملی تھی۔ وہ بڑی سہولت سے انسانوں کو ٹھوکر مار کر بات کرتے۔ کسی بھی معمولی قصور پر یا بالکل ہی بے قصور وہ اپنے نوکروں کو بند کروا دیتے اور بہ ظاہر بڑی حساس نظر آنے والی بینا، ناخنوں پر لگی پالش پھونکیں مار مارکر سکھاتی رہتی، جیسے کچھ ہوا ہی نہیں تھا۔

خاندان کی لڑکیوں کو عموماً گھر میں رکھے فرنیچر اور دیوار پر لٹکی تصویروں سے ذرا ہی زیادہ اہمیت دی جاتی تھی۔ بس ان کا خیال رکھا جائے۔ یہ خراب نہ ہو جائیں۔ دل میں کیسے دراڑیں پڑتی ہیں اور شیشہ کیسے چکناچور ہوتا ہے، ان کو جاننے کی ضرورت نہ تھی۔ ان کی ذاتی رائے، ذہنی آزادی اور اس قسم کی دیگر بکواس تو بالکل بےمعنی اور لغو بات تھی۔ عورتوں کو ان کے منصب سے گمراہ کر کے بغاوت کے راستے پر لے جانے کی کوشش۔

انہیں اپنی بیوی اور فارا کے مراسم پسند نہیں تھے لیکن ابا کا خاندان میں اہم مقام ہونے کی وجہ سے ان کے اعتراضات بےمعنی سے تھے۔ خود رضا بھائی ہمہ صفت موصوف تھے۔ آغا جی کو پسند بھی بہت تھے۔ اس قدر exotic accent کے ساتھ منہ ٹیڑھا کر کے انگریزی بولتے۔ وہ بہترین ٹوسٹ تجویز کر سکتے تھے۔ ایک سے ایک اعلیٰ کاک ٹیل پہچان لیتے اور کھیتوں میں چلتے مزارعوں کو پنجابی میں منہ بھر بھر کر گالیاں بھی دے ڈالتے۔

ان میں تو خیر تھیں ہی بے شمار خوبیاں۔ وہ بہت سال بعد آئے تھے مگر فارا انہیں ایک آنکھ نہیں بھاتی۔ پتا نہیں کس نے اجازت دی تھی اسے اس قدر منہ زوری دکھانے کی اور من مانیاں کرنے کی۔ وہ شادی میں شریک ہونے آئی تھی، مہمان تھی۔ اس کے ساتھ کی عابدہ خوف زدہ ہو کے گھر بیٹھی رہتی۔ وہ ہر اصول پر قانون کی نفی کرتی، لوگوں کی لاشوں سے دندناتی گزر جاتی۔