sar-phire log

ho saktā hai ham sar-phire logoñ kā ek giroh hoñ

lekin ham shā'iroñ ke badan hī lohār kā vo lohā haiñ

jis par paḌne vaalī zarboñ se

ek na.ī aur taaza manzil-e-avām sūrat-pazīr hogī

ham apnī jaan de kar ek na.ī aur sachchī manzil hāsil kareñge

aur na sirf ajnabī hākimiyyat kī zanjīreñ

apne vujūd kā balīdān de kar toḌeñge balki apnī zaḳhmī aur darīda

uñgliyoñ se raushnī aur insānī huqūq ke liye āḳhir dam tak jidd-o-jahd karte raheñge

ḳhudā mujhe sachchā.ī par chalne ke liye tāqat jur.at aur himmat de

bahāduroñ kī rūhoñ

jo 'ilm sachchā.ī aur āzādī kī ḳhātir jaan se guzre haiñ

aur ġhulām aabā kī rūhoñ

jo āzādī kī talḳh aur girāñ qīmat se āgāh the

mujhe hausla aur quvvat do

mujhe bhī pake hue aur zaḳhmī phal kī tarah banā do

ho sakta hai hum sar-phire logon ka ek giroh hon

lekin hum sha'iron ke badan hi lohaar ka wo loha hain

jis par paDne wali zarbon se

ek nai aur taza manzil-e-awam surat-pazir hogi

hum apni jaan de kar ek nai aur sachchi manzil hasil karenge

aur na sirf ajnabi hakimiyyat ki zanjiren

apne wujud ka balidan de kar toDenge balki apni zaKHmi aur darida

ungliyon se raushni aur insani huquq ke liye aaKHir dam tak jidd-o-jahd karte rahenge

KHuda mujhe sachchai par chalne ke liye taqat jurat aur himmat de

bahaduron ki ruhon

jo 'ilm sachchai aur aazadi ki KHatir jaan se guzre hain

aur ghulam aaba ki ruhon

jo aazadi ki talKH aur giran qimat se aagah the

mujhe hausla aur quwwat do

mujhe bhi pake hue aur zaKHmi phal ki tarah bana do