یہ گہرے سائے برستا ساون

یہ گہرے سائے برستا ساون

تمہارے قدموں کی رازداری

کہ رات گویا اتر رہی ہے

نگاہ بانوں سے بچ بچا کر

یہ آج کی صبح نے تو جیسے

ہیں بند کر رکھی اپنی آنکھیں

کہ باد مشرق کی مستقل دستکیں بھی کوئی

جواب پاتی نہیں ہیں اس کا

یہ آسماں جو ہمیشہ بیدار ہی رہا ہے

دبیز سا اس کے منہ پہ گھونگھٹ پڑا ہے

نہ جنگلوں سے سنائی دیتا ہے کوئی نغمہ

ہر ایک گھر کے دریچے دروازے بند ہیں سب

کہ غیر آباد راستوں پر

تمہی اکیلے سفر پہ نکلے

بس ایک تم ہی ہو دوست میرے

تمہی ہو محبوب سب سے اچھے

تمہاری خاطر کھلے ہوئے ہیں

تمام دروازے میرے گھر کے

یہاں سے گزرو نہ خواب بن کر