koī nahīñ pachhtāne vaalā

mar jaa.e mar jaane vaalā

mahfil meñ aa.egā kyuuñ kar

ḳhalvat meñ sharmāne vaalā

maiñ rokūñ lekin kyā rokūñ

jā.egā ghar jaane vaalā

shukr ḳhudā kā ham karte haiñ

kaam aayā kaam aane vaalā

sabr mirā bekār na jaa.e

taḌpe vo taḌpāne vaalā

apnā dil bahlāūñ kis se

hai kaun aane jaane vaalā

vo na mileñ mujh ko mil jaa.e

koī jī bahlāne vaalā

dil vo shai hai jis kā shākī

khone vaalā paane vaalā

lutf-o-karam farmātā jaa.e

lutf-o-karam farmāne vaalā

sab se mushkil baat yahī hai

zinda ho mar jaane vaalā

kyā samjhe asrār-e-mohabbat

dil de kar pachhtāne vaalā

phūloñ kā murjhānā dekhe

kaliyoñ par itrāne vaalā

jaan mirī hai jaane vaalī

dil hai un par aane vaalā

yā maiñ huuñ yā merā dil hai

roz nayā ġham paane vaalā

'nūh' mohabbat kī duniyā meñ

hai tūfān uThāne vaalā

koi nahin pachhtane wala

mar jae mar jaane wala

mahfil mein aaega kyun kar

KHalwat mein sharmane wala

main rokun lekin kya rokun

jaega ghar jaane wala

shukr KHuda ka hum karte hain

kaam aaya kaam aane wala

sabr mera bekar na jae

taDpe wo taDpane wala

apna dil bahlaun kis se

hai kaun aane jaane wala

wo na milen mujh ko mil jae

koi ji bahlane wala

dil wo shai hai jis ka shaki

khone wala pane wala

lutf-o-karam farmata jae

lutf-o-karam farmane wala

sab se mushkil baat yahi hai

zinda ho mar jaane wala

kya samjhe asrar-e-mohabbat

dil de kar pachhtane wala

phulon ka murjhana dekhe

kaliyon par itrane wala

jaan meri hai jaane wali

dil hai un par aane wala

ya main hun ya mera dil hai

roz naya gham pane wala

'nuh' mohabbat ki duniya mein

hai tufan uThane wala