barā.e-nām sahī koī mehrbān to hai

hamāre sar pe bhī hone ko āsmān to hai

barae-nam sahi koi mehrban to hai

hamare sar pe bhi hone ko aasman to hai

zindagī jis ke tasavvur meñ basar kī ham ne

haa.e vo shaḳhs haqīqat meñ kahānī niklā

zindagi jis ke tasawwur mein basar ki hum ne

hae wo shaKHs haqiqat mein kahani nikla

ye aur baat ki vo ab yahāñ nahīñ rahtā

magar ye us kā basāyā huā makān to hai

ye aur baat ki wo ab yahan nahin rahta

magar ye us ka basaya hua makan to hai

mujhe kisī ne sunā hī nahīñ tavajjoh se

maiñ bad-zabān sadā-e-karaḳht huuñ shāyad

mujhe kisi ne suna hi nahin tawajjoh se

main bad-zaban sada-e-karaKHt hun shayad

zindagī mujh ko mirī nazroñ meñ sharminda na kar

mar chukā hai jo bahut pahle use zinda na kar

zindagi mujh ko meri nazron mein sharminda na kar

mar chuka hai jo bahut pahle use zinda na kar

ik kāñTe se dūsrā maiñ ne liyā nikāl

phūloñ kā is des meñ kaisā paḌā akaal

ek kanTe se dusra main ne liya nikal

phulon ka is des mein kaisa paDa akal

chādar mailī ho ga.ī ab kaise lauTā.ūñ

apne piyā ke sāmne jaate hue sharmā.ūñ

chadar maili ho gai ab kaise lauTaun

apne piya ke samne jate hue sharmaun

jaise shabd meñ arth hai jaise aañkh meñ niir

aise tujh meñ basā huā vo mahfil kā miir

jaise shabd mein arth hai jaise aankh mein nir

aise tujh mein basa hua wo mahfil ka mir