vo TūTte hue rishtoñ kā husn-e-āḳhir thā

ki chup sī lag ga.ī donoñ ko baat karte hue

wo TuTte hue rishton ka husn-e-aKHir tha

ki chup si lag gai donon ko baat karte hue

vo baat saare fasāne meñ jis kā zikr na thā

vo baat un ko bahut nā-gavār guzrī hai

wo baat sare fasane mein jis ka zikr na tha

wo baat un ko bahut na-gawar guzri hai

unheñ apne dil kī ḳhabreñ mire dil se mil rahī haiñ

maiñ jo un se ruuTh jā.ūñ to payām tak na pahuñche

unhen apne dil ki KHabren mere dil se mil rahi hain

main jo un se ruTh jaun to payam tak na pahunche

in añdheroñ se pare is shab-e-ġham se aage

ik na.ī sub.h bhī hai shām-e-alam se aage

in andheron se pare is shab-e-gham se aage

ek nai subh bhi hai sham-e-alam se aage

maiñ roz idhar se guzartā huuñ kaun dekhtā hai

maiñ jab idhar se na guzrūñgā kaun dekhegā

main roz idhar se guzarta hun kaun dekhta hai

main jab idhar se na guzrunga kaun dekhega