ایک کاٹا رام نے سیتا کے ساتھ

دوسرا بن باس میرے نام پر

تجھ سے ملی نگاہ تو دیکھا کہ درمیاں

چاندی کے آبشار تھے سونے کی راہ تھی

یاد آئے تو مجھ کو بہت جب شب کٹے جب پو پھٹے

جب وادیوں میں دور تک کہرا دکھے بے انت سا

ہجرتوں میں حضوریوں کے جتن

پاؤں کو دوریوں نے گھیرا ہے

پستکوں میں پرانوں میں ارضوں میں آسمانوں میں

ایک نام کی بھگتی ایک قول کا کلمہ

کھلے دھان کھلکھلا کر پڑے ندیوں میں ناکے

گھنی خوشبوؤں سے مہکے مرے دیس کے علاقے

چوکھٹا دل کا یہاں ہے ہو بہ ہو تجھ سا کوئی

ہونٹ بھی آنکھیں بھی چھب ڈھب بھی تجھی سا فیس بھی

جنہیں ترے نام کی چاہ ہے یہ زمین ان کی گواہ ہے

وہیں کربلا کا وہ دشت ہے وہیں قصر کوفہ و شام ہے

پاٹی ہیں ہم نے بپھری چنابیں ترے لئے

ہم لے گئے ہیں تجھ کو سوئمبر سے جیت کے

تو شرافتوں کا مقام ہے تو صداقتوں کا دوام ہے

جہاں فرق شاہ و گدا نہیں ترے دین کا وہ نظام ہے

اخروٹ کھائیں تاپیں انگیٹھی پہ آگ آ

رستے تمام گاؤں کے کہرے سے اٹ گئے

ہم وہ لوگ ہیں جو چاہت میں

جی نہ سکیں تو مر رہتے ہیں

دینا مرا سندیش سکھی پھر

پہلے چھونا اس کے پاؤں

تجھ سے بچھڑے گاؤں چھوٹا شہر میں آ کر بسے

تج دیئے سب سنگی ساتھی تیاگ ڈالا دیس بھی

دریا پہ ٹیکری سے پرے خانقاہ تھی

تب تیرے میرے پیار کی دنیا گواہ تھی

مجمع نہیں مجلہ ہے اشعار کی جگہ

بھر اور کوئی سوانگ جو ہونا ہی ہوٹ ہے

قائم ہے آبرو تو غنیمت یہی سمجھ

میلے سے ہیں جو کپڑے پھٹا سا جو بوٹ ہے

کچھ گریزاں بھی رہے ہم خود سے

کچھ کہانی بھی المناک ہوئی

تجھے پچھاڑ نہ دیں روشنی میں تیرے رفیق

دیا بجھے نہ بجھے تو بھی پھونک مار تو لے

اک خطہ خوں میں کہیں دریا کے کنارے

دیوار زمانہ سے گرا دھیان پھسل کر

پھر مجھے مل ندی کنارے کہیں

پھر بڑھا مان آ کے راہوں کا

نیا باندھو ندی کنارے سکھی

چاند بیراگ رات تیاگ لگے

عمروں کے بجھتے معمورے میں

میں نے ہر لمحہ تجھ کو سوچا

سنگت دلوں کی جیونوں مرنوں کا ارتباط

پھر ڈر پڑا تھا کیا تجھے گرد و نواح کا

نین نچنت ہیں دیکھ کے تجھ کو

دل ہے ازل سے ہکا بکا

پھر یوں ہوا کہ مجھ سے وہ یوں ہی بچھڑ گیا

پھر یوں ہوا کہ زیست کے دن یوں ہی کٹ گئے

پاؤں کے نیچے سرکتی ہوئی ریت

سر میں مسند کی ہوا باقی ہے

سانس میں ساجنا ہوا کی طرح

سانس کا سلسلہ ہوا سے ہے

جب کہ تجھ بن نہیں موجود کوئی

اپنے ہونے کا یقیں کیسے کروں

شاہ بلوط کے اوپر دیکھ

چاند دھرا ہے تھالی پر

تلے تیغ کے وہ عبادتیں تری شان کی وہ شہادتیں

وہ حکایتیں وہ روایتیں ترے سارے گھر پہ سلام ہے

دیکھا قد گناہ پہ جب اس کو ملتفت

بڑھ کر حد نگاہ لگی اس کو ڈھانپنے