ہوا بہار کی آئے گی اور میں چوموں گا

وہ سارے پھول کہ جن میں تری شباہت ہے

میں زندگی کے سبھی غم بھلائے بیٹھا ہوں

تمہارے عشق سے کتنی مجھے سہولت ہے

جو وہ نہیں تھا تو میں متفق تھا لوگوں سے

وہ میرے سامنے آیا تو اختلاف کیا

وہ داستان مکمل کرے تو اچھا ہے

مجھے ملا ہے ذرا سا سرا کہانی کا

اب تو یہ شاید کسی بھی کام آ سکتا نہیں

آپ ہی لے جائیے میرے دل نادان کو

گزر گئی ہے مگر روز یاد آتی ہے

وہ ایک شام جسے بھولنے کی حسرت ہے

کتنے ہیں لوگ خود کو جو کھو کر اداس ہیں

اور کتنے اپنے آپ کو پا کر بھی خوش نہیں

آیا تھا میرے پاس وہ کچھ دیر کے لیے

سورج مگر گہن میں بہت دیر تک رہا

کوئی آ کے ہمیں ڈھونڈے گا تو کھو جائے گا

ہم نئے غم میں پرانے سے بہت آگے ہیں

بس ایک رنگ ہے دل میں کسی کے ہونے سے

اب اپنے آپ کو اس سے بھی سادہ کیا کرنا

جو ہمیں پا کے بھی کھونے سے بہت پیچھے تھا

ہم اسے کھو کے بھی پانے سے بہت آگے ہیں

کس قدر محدود کر دیتا ہے غم انسان کو

ختم کر دیتا ہے ہر امید ہر امکان کو

کھڑکی کے رستے سے لایا کرتا ہوں

میں باہر کی دنیا خالی کمرے میں