جہاں تک پاؤں میرے جا سکے ہیں

وہیں تک راستہ ٹھہرا ہوا ہے

نہ جانے کون فضاؤں میں زہر گھول گیا

ہرا بھرا سا شجر بے لباس کیسا ہے

میں بھی تنہا اس طرف ہوں وہ بھی تنہا اس طرف

میں پریشاں ہوں تو ہوں وہ بھی پریشانی میں ہے

کیوں وہ ملنے سے گریزاں اس قدر ہونے لگے

میرے ان کے درمیاں دیوار رکھ جاتا ہے کون

وہی قاتل وہی منصف بنا ہے

اسی سے فیصلہ ٹھہرا ہوا ہے

میں نے جو کچھ بھی لکھا ہے

وہ سب حرف آئندہ ہے

یہ میں ہوں خود کہ کوئی اور ہے تعاقب میں

یہ ایک سایہ پس رہ گزار کس کا ہے

اسے کھلونوں سے بڑھ کر ہے فکر روٹی کی

ہمارے دور کا بچہ جنم سے بوڑھا ہے

کچھ حقائق کے زندہ پیکر ہیں

لفظ میں کیا بیان میں کیا ہے

وقت کے دامن میں کوئی

اپنی ایک کہانی رکھ

سب کو دکھلاتا ہے وہ چھوٹا بنا کر مجھ کو

مجھ کو وہ میرے برابر نہیں ہونے دیتا

وہ بڑا تھا پھر بھی وہ اس قدر بے فیض تھا

اس گھنیرے پیڑ میں جیسے کوئی سایہ نہ تھا

جفا کے ذکر پہ وہ بد حواس کیسا ہے

ذرا سی بات تھی لیکن اداس کیسا ہے

ان کے لب پر مرا گلہ ہی سہی

یاد کرنے کا سلسلہ تو ہے

ہوائے تند کیسی چل پڑی ہے

شجر پر ایک بھی پتا نہیں ہے

کوئی کالم نہیں ہے حادثوں پر

بچا کر آج کا اخبار رکھنا

اب نشانہ اس کی اپنی ذات ہے

لڑ رہا ہے اک انوکھی جنگ وہ

مری قندیل جاں جلتی ہے شب بھر

ذرا اپنی بھی تو روداد شب لکھ

کون پتھر اٹھائے

یہ شجر بے ثمر ہے

پتے پتے سے نغمہ سرا کون ہے

اے ہوا تیرے اندر چھپا کون ہے