دیکھ کر اس کو لگا جیسے کہیں ہو دیکھا

یاد بالکل نہیں آیا مجھے گھنٹوں سوچا

طوفان کی زد میں تھے خیالوں کے سفینے

میں الٹا سمندر کی طرف بھاگ رہا تھا

جو ساتھ لائے تھے گھر سے وہ کھو گیا ہے کہیں

ارادہ ورنہ ہمارا بھی واپسی کا تھا

سبھی ہیں اپنے مگر اجنبی سے لگتے ہیں

یہ زندگی ہے کہ ہوٹل میں شب گزاری ہے

میں جنگلوں میں درندوں کے ساتھ رہتا رہا

یہ خوف ہے کہ اب انساں نہ آ کے کھا لے کوئی

جو دل میں ہے وہی باہر دکھائی دیتا ہے

اب آر پار یہ پتھر دکھائی دیتا ہے

راہ تکتے جسم کی مجلس میں صدیاں ہو گئیں

جھانک کر اندھے کنوئیں میں اب تو کوئی بول دے

نام اپنا ہی میں سب سے کھڑا پوچھ رہا تھا

کچھ میری سمجھ میں نہیں آیا کہ یہ کیا تھا