dekh kar us ko lagā jaise kahīñ ho dekhā

yaad bilkul nahīñ aayā mujhe ghanToñ sochā

dekh kar us ko laga jaise kahin ho dekha

yaad bilkul nahin aaya mujhe ghanTon socha

tūfān kī zad meñ the ḳhayāloñ ke safīne

maiñ ulTā samundar kī taraf bhaag rahā thā

tufan ki zad mein the KHayalon ke safine

main ulTa samundar ki taraf bhag raha tha

sabhī haiñ apne magar ajnabī se lagte haiñ

ye zindagī hai ki hotel meñ shab guzārī hai

sabhi hain apne magar ajnabi se lagte hain

ye zindagi hai ki hotel mein shab guzari hai

jo saath laa.e the ghar se vo kho gayā hai kahīñ

irāda varna hamārā bhī vāpsī kā thā

jo sath lae the ghar se wo kho gaya hai kahin

irada warna hamara bhi wapsi ka tha

raah takte jism kī majlis meñ sadiyāñ ho ga.iiñ

jhāñk kar andhe kuñ.eñ meñ ab to koī bol de

rah takte jism ki majlis mein sadiyan ho gain

jhank kar andhe kunen mein ab to koi bol de

naam apnā hī maiñ sab se khaḌā pūchh rahā thā

kuchh merī samajh meñ nahīñ aayā ki ye kyā thā

nam apna hi main sab se khaDa puchh raha tha

kuchh meri samajh mein nahin aaya ki ye kya tha

jo dil meñ hai vahī bāhar dikhā.ī detā hai

ab ār-pār ye patthar dikhā.ī detā hai

jo dil mein hai wahi bahar dikhai deta hai

ab aar-par ye patthar dikhai deta hai

maiñ jañgaloñ meñ darindoñ ke saath rahtā rahā

ye ḳhauf hai ki ab insāñ na aa ke khā le koī

main jangalon mein darindon ke sath rahta raha

ye KHauf hai ki ab insan na aa ke kha le koi