خوابیدہ اپنے چاہنے والوں کو دیکھ کر

ممکن ہے لوٹ جائے سحر جاگتے رہو

حسد کا رنگ پسندیدہ رنگ ہے سب کا

یہاں کسی کو کوئی اب دعا نہیں دیتا

کتنے محبوب گھروں سے گئے کس کو معلوم

واپس آئے ہیں جو اپنوں میں خبر کی صورت

دیکھو اس نے قدم قدم پر ساتھ دیا بیگانے کا

اخترؔ جس نے عہد کیا تھا تم سے ساتھ نبھانے کا

اک تیرے ہی کوچے پر موقوف نہیں ہے کچھ

ہر گام ہیں تعزیریں ہم لوگ جہاں بھی ہیں

جذبے کی کڑی دھوپ ہو تو کیا نہیں ممکن

یہ کس نے کہا سنگ پگھلتا ہی نہیں ہے

ہمیں خدا پہ بھروسہ ہے نا خدا پہ نہیں

خدا جو دیتا ہے وہ نا خدا نہیں دیتا

اسی حسرت میں کٹی راہ حیات

کوئی دو چار قدم ساتھ چلے

سونے کتنے بام ہوئے کتنے آنگن بے نور ہوئے

چاند سے چہرے یاد آتے ہیں چاند نکلتے وقت بہت

موسم گل ترے صدقے تری آمد کے نثار

دیکھ مجھ سے مرا سایہ بھی جدا ہے اب کے

مئے کہنہ نہ سہی خون تمنا ہی سہی

ایک پیمانہ مرے سامنے لایا تو گیا