وفا کی آڑ میں کیا کیا ہوئی جفا ہم پر

جو دوستی یہی ٹھہری تو دشمنی کیا ہے

جب دل ہی نہیں ہے پہلو میں پھر عشق کا سودا کون کرے

اب ان سے محبت کون کرے اب ان کی تمنا کون کرے

کس غلط فہمی میں اپنی عمر ساری کٹ گئی

اک وفا نا آشنا کو با وفا سمجھا تھا میں

وہی صبح و مسا وہی شب و روز

زندگی ہے وبال کیا کہئے

نہ کچھ عالم سمجھتے ہیں نہ کچھ جاہل سمجھتے ہیں

محبت کی حقیقت کو بس اہل دل سمجھتے ہیں

امید وفا کے پیش نظر میں ان کی جفائیں بھول گیا

ہے مستقبل پر آنکھ مری ماضی کو بھلاتا جاتا ہوں

اسی کا نام شاید زندگی ہے

خوشی کی اک گھڑی تو اک غمی کی

کوئی سمجھے نہ سمجھے اس حقیقت کو مگر نجمیؔ

ہم اپنے درد دل کو عشق کا حاصل سمجھتے ہیں

آساں نہیں وصال تو دشوار بھی نہیں

مشکل میں ہوں یہ مشکل آساں لیے ہوئے

بچھڑا ہوا جیسے کوئی ملتے ہی لپٹ جائے

یوں تیر ترا آ کے لپٹتا ہے جگر سے

نہ دنیا باعث غفلت نہ عقبیٰ وجہ ہشیاری

رہے جو تجھ سے غافل ہم اسے غافل سمجھتے ہیں

بتا کہ یہ بھی کوئی شان بے نیازی ہے

سنی نہ ہائے کوئی تو نے گفتنی اپنی

زلف مشکیں تھی مہرباں کس کی

بو بسی ہے دماغ میں اب تک