charāġh qaum kā raushan hai arsh par dil ke

use havā ke farishte bujhā nahīñ sakte

charagh qaum ka raushan hai arsh par dil ke

use hawa ke farishte bujha nahin sakte

dard-e-dil pās-e-vafā jazba-e-īmāñ honā

ādmiyat hai yahī aur yahī insāñ honā

dard-e-dil pas-e-wafa jazba-e-iman hona

aadmiyat hai yahi aur yahi insan hona

ek sāġhar bhī ināyat na huā yaad rahe

sāqiyā jaate haiñ mahfil tirī ābād rahe

ek saghar bhi inayat na hua yaad rahe

saqiya jate hain mahfil teri aabaad rahe

ḳhudā ne ilm baḳhshā hai adab ahbāb karte haiñ

yahī daulat hai merī aur yahī jāh-o-hasham merā

KHuda ne ilm baKHsha hai adab ahbab karte hain

yahi daulat hai meri aur yahi jah-o-hasham mera

nayā bismil huuñ maiñ vāqif nahīñ rasm-e-shahādat se

batā de tū hī ai zālim taḌapne kī adā kyā hai

naya bismil hun main waqif nahin rasm-e-shahadat se

bata de tu hi ai zalim taDapne ki ada kya hai