بھٹک نہ جاتا اگر ذات کے بیاباں میں

تو میرا نقش قدم میرا راہبر ہوتا

کانچ کے الفاظ کاغذ پر نہ رکھ

سنگ معنی بن کے ٹکراؤں گا میں

میں ہوں مضطرؔ بدن کی نگری میں

میرے حصے میں لا مکاں لکھنا

قدروں کی حدیں توڑ نئی طرح نکال

دم تجھ میں اگر ہے تو باغی ہو جا

حصار خوف و ہراس میں ہے بتان وھم و گماں کی بستی

مجھے خبر ہی نہیں کہ اب میں جنوب میں یا شمال میں ہوں

سنا ہے لوگ وہاں مجھ سے خار کھاتے ہیں

فسانہ عام جہاں میری بے بسی کا ہے

ستارے بوتی رہیں نیند سے تہی آنکھیں

ادھر یہ حال کہ دامن بھی تر نہیں ہوتا

جب کوئی نوجوان مرتا ہے

آرزو کا جہان مرتا ہے

جنوں آثار موسم کا پتہ کوئی نہیں دے گا

تجھے اے دشت تنہائی صدا کوئی نہیں دے گا

بہکی ہوئی روحوں کو تسلی دے کر

کھوئے ہوئے اجسام کی جنت ہو جا

تو خدا ہے تو بجا مجھ کو ڈراتا کیوں ہے

جا مبارک ہو تجھے تیرے کرم کا سایہ

مجھ سے کیا پوچھتے ہو نام پتہ

میں تو بس آپ کا ہی سایہ ہوں

سنگ پرستوں کی بستی میں شیشہ گروں کی خیر نہیں ہے

جن کی آنکھیں نور سے خالی ان کے دل ہیں آہن آہن

آپ کی تصویر تھی اخبار میں

کیا سبب ہے آپ گھر جاتے نہیں

اب فقیری میں کوئی بات نہیں

حشمت و جاہ و کرّ و فر دے دے