آرزو پر شاعری

آج تک دل کی آرزو ہے وہی

پھول مرجھا گیا ہے بو ہے وہی

آرزو ہے کہ تو یہاں آئے

اور پھر عمر بھر نہ جائے کہیں

آرزو حسرت اور امید شکایت آنسو

اک ترا ذکر تھا اور بیچ میں کیا کیا نکلا

آرزو تیری برقرار رہے

دل کا کیا ہے رہا رہا نہ رہا

آرزو وصل کی رکھتی ہے پریشاں کیا کیا

کیا بتاؤں کہ میرے دل میں ہے ارماں کیا کیا

ارمان وصل کا مری نظروں سے تاڑ کے

پہلے ہی سے وہ بیٹھ گئے منہ بگاڑ کے

بعد مرنے کے بھی چھوڑی نہ رفاقت میری

میری تربت سے لگی بیٹھی ہے حسرت میری

بعد ترک آرزو بیٹھا ہوں کیسا مطمئن

ہو گئی آساں ہر اک مشکل بہ آسانی مری

بڑی آرزو تھی ہم کو نئے خواب دیکھنے کی

سو اب اپنی زندگی میں نئے خواب بھر رہے ہیں

بہانے اور بھی ہوتے جو زندگی کے لیے

ہم ایک بار تری آرزو بھی کھو دیتے

بہت عزیز تھی یہ زندگی مگر ہم لوگ

کبھی کبھی تو کسی آرزو میں مر بھی گئے

ڈرتا ہوں دیکھ کر دل بے آرزو کو میں

سنسان گھر یہ کیوں نہ ہو مہمان تو گیا

دل میں وہ بھیڑ ہے کہ ذرا بھی نہیں جگہ

آپ آئیے مگر کوئی ارماں نکال کے

دل ویراں کو دیکھتے کیا ہو

یہ وہی آرزو کی بستی ہے

ایک بھی خواہش کے ہاتھوں میں نہ مہندی لگ سکی

میرے جذبوں میں نہ دولہا بن سکا اب تک کوئی

اک وہ کہ آرزؤں پہ جیتے ہیں عمر بھر

اک ہم کہ ہیں ابھی سے پشیمان آرزو!

غم زمانہ نے مجبور کر دیا ورنہ

یہ آرزو تھی کہ بس تیری آرزو کرتے

ہے حصول آرزو کا راز ترک آرزو

میں نے دنیا چھوڑ دی تو مل گئی دنیا مجھے

ہمیں بھی دیکھ کہ ہم آرزو کے صحرا میں

کھلے ہوئے ہیں کسی زخم آرزو کی طرح

ہزاروں خواہشیں ایسی کہ ہر خواہش پہ دم نکلے

بہت نکلے مرے ارمان لیکن پھر بھی کم نکلے

حکایت عشق سے بھی دل کا علاج ممکن نہیں کہ اب بھی

فراق کی تلخیاں وہی ہیں وصال کی آرزو وہی ہے

ہوتی کہاں ہے دل سے جدا دل کی آرزو

جاتا کہاں ہے شمع کو پروانہ چھوڑ کر

ہم کیا کریں اگر نہ تری آرزو کریں

دنیا میں اور بھی کوئی تیرے سوا ہے کیا

انساں کی خواہشوں کی کوئی انتہا نہیں

دو گز زمیں بھی چاہیئے دو گز کفن کے بعد

اس لئے آرزو چھپائی ہے

منہ سے نکلی ہوئی پرائی ہے

جان لیوا تھیں خواہشیں ورنہ

وصل سے انتظار اچھا تھا

جب کوئی نوجوان مرتا ہے

آرزو کا جہان مرتا ہے

جینے والوں سے کہو کوئی تمنا ڈھونڈیں

ہم تو آسودۂ منزل ہیں ہمارا کیا ہے

کبھی موج خواب میں کھو گیا کبھی تھک کے ریت پہ سو گیا

یوں ہی عمر ساری گزار دی فقط آرزوئے وصال میں

کٹتی ہے آرزو کے سہارے پہ زندگی

کیسے کہوں کسی کی تمنا نہ چاہئے

خراب دہر نہ میں خود ہوا نہ تو نے کیا

جو کچھ کیا ترے ملنے کی آرزو نے کیا

کھل گیا ان کی آرزو میں یہ راز

زیست اپنی نہیں پرائی ہے

خواب، امید، تمنائیں، تعلق، رشتے

جان لے لیتے ہیں آخر یہ سہارے سارے

خواہشوں نے ڈبو دیا دل کو

ورنہ یہ بحر بیکراں ہوتا

کسی کی تمنا نکلتی رہی

مری آرزو ہاتھ ملتی رہی

کسی سے شکوۂ محرومئی نیاز نہ کر

یہ دیکھ لے کہ تری آرزو تو خام نہیں

کتاب آرزو کے گم شدہ کچھ باب رکھے ہیں

ترے تکیے کے نیچے بھی ہمارے خواب رکھے ہیں

کیا وہ خواہش کہ جسے دل بھی سمجھتا ہو حقیر

آرزو وہ ہے جو سینہ میں رہے ناز کے ساتھ

لہو ٹپکا کسی کی آرزو سے

ہماری آرزو ٹپکی لہو سے

لطف دونا ہو جو دونوں گھر مرے آباد ہوں

تو رہے پہلو میں تیری آرزو دل میں رہے

میں اور اس غنچہ دہن کی آرزو

آرزو کی سادگی تھی میں نہ تھا

مرتے ہیں آرزو میں مرنے کی

موت آتی ہے پر نہیں آتی

موت آ جائے قید میں صیاد

آرزو ہو اگر رہائی کی

مری اپنی اور اس کی آرزو میں فرق یہ تھا

مجھے بس وہ اسے سارا زمانہ چاہئے تھا

میری یہ آرزو ہے وقت مرگ

اس کی آواز کان میں آوے

ملو ملو نہ ملو اختیار ہے تم کو

اس آرزو کے سوا اور آرزو کیا ہے

مدعا دور تک گیا لیکن

آرزو لوٹ کر نہیں آئی

مدت سے آرزو ہے خدا وہ گھڑی کرے

ہم تم پئیں جو مل کے کہیں ایک جا شراب

مجھے یہ ڈر ہے تری آرزو نہ مٹ جائے

بہت دنوں سے طبیعت مری اداس نہیں

مجھ کو یہ آرزو وہ اٹھائیں نقاب خود

ان کو یہ انتظار تقاضا کرے کوئی