حسرت پر اشعار

ہزاروں خواہشیں ایسی کہ ہر خواہش پہ دم نکلے

بہت نکلے مرے ارمان لیکن پھر بھی کم نکلے

ان حسرتوں سے کہہ دو کہیں اور جا بسیں

اتنی جگہ کہاں ہے دل داغدار میں

میں تو غزل سنا کے اکیلا کھڑا رہا

سب اپنے اپنے چاہنے والوں میں کھو گئے

انساں کی خواہشوں کی کوئی انتہا نہیں

دو گز زمیں بھی چاہیئے دو گز کفن کے بعد

آرزو ہے کہ تو یہاں آئے

اور پھر عمر بھر نہ جائے کہیں

اب دل کی تمنا ہے تو اے کاش یہی ہو

آنسو کی جگہ آنکھ سے حسرت نکل آئے

کچھ نظر آتا نہیں اس کے تصور کے سوا

حسرت دیدار نے آنکھوں کو اندھا کر دیا

سب خواہشیں پوری ہوں فرازؔ ایسا نہیں ہے

جیسے کئی اشعار مکمل نہیں ہوتے

آرزو حسرت اور امید شکایت آنسو

اک ترا ذکر تھا اور بیچ میں کیا کیا نکلا

خواب، امید، تمنائیں، تعلق، رشتے

جان لے لیتے ہیں آخر یہ سہارے سارے

کس کس طرح کی دل میں گزرتی ہیں حسرتیں

ہے وصل سے زیادہ مزا انتظار کا

کٹتی ہے آرزو کے سہارے پہ زندگی

کیسے کہوں کسی کی تمنا نہ چاہئے

آرزو وصل کی رکھتی ہے پریشاں کیا کیا

کیا بتاؤں کہ میرے دل میں ہے ارماں کیا کیا

دل میں وہ بھیڑ ہے کہ ذرا بھی نہیں جگہ

آپ آئیے مگر کوئی ارماں نکال کے

ارمان وصل کا مری نظروں سے تاڑ کے

پہلے ہی سے وہ بیٹھ گئے منہ بگاڑ کے

بعد مرنے کے بھی چھوڑی نہ رفاقت میری

میری تربت سے لگی بیٹھی ہے حسرت میری

زندگی کی ضرورتوں کا یہاں

حسرتوں میں شمار ہوتا ہے

حسرتوں کا ہو گیا ہے اس قدر دل میں ہجوم

سانس رستہ ڈھونڈھتی ہے آنے جانے کے لیے

خواہشوں نے ڈبو دیا دل کو

ورنہ یہ بحر بیکراں ہوتا

یار پہلو میں ہے تنہائی ہے کہہ دو نکلے

آج کیوں دل میں چھپی بیٹھی ہے حسرت میری

ایک بھی خواہش کے ہاتھوں میں نہ مہندی لگ سکی

میرے جذبوں میں نہ دولہا بن سکا اب تک کوئی

جینے والوں سے کہو کوئی تمنا ڈھونڈیں

ہم تو آسودۂ منزل ہیں ہمارا کیا ہے

دیکھنا حسرت دیدار اسے کہتے ہیں

پھر گیا منہ تری جانب دم مردن اپنا

میکدے کو جا کے دیکھ آؤں یہ حسرت دل میں ہے

زاہد اس مٹی کی الفت میری آب و گل میں ہے

فقط آنکھیں چراغوں کی طرح سے جل رہی ہیں

کسی کی دسترس میں ہے کہاں کوئی ستارہ

عجیب وقت ہے اب دوستوں کے چاقو کو

مرے قلم کی نہیں انگلیوں کی حسرت ہے

ڈوبتا ہوں تو مجھے ہاتھ کئی ملتے ہیں

کتنی حسرت سے کناروں کی طرف دیکھتا ہوں

کب الم اور حسرتیں اپنی کہیں اے دوستاں

رات کو بلبل ہیں ہم اور دن کو پروانے ہیں ہم

کیوں نہ دیکھوں چمن کو حسرت سے

آشیاں تھا مرا بھی یاں پرسال

چیٹیاں چلنے لگی ہیں پیٹھ میں

اب تمہارا تیر چلنا چاہئے

اپنے آنگن میں پرندے دیکھ کر

جسم کی ٹہنی سے اڑ جاتے ہیں ہم

خدا رکھے یہ پاس وضع میں تم سے بھی بڑھ کر ہے

تمہیں آ کر نکالو گے تو ارماں دل سے نکلے گا

نیند ویسے بھی نہیں آتی مگر

آنکھ میں اب بس خماری چاہیئے

حسن دل کش اسے کہتے ہیں کہ ہم ساری عمر

ان کو دیکھا کیے دیدار کی حسرت نہ گئی

اب محبت کا سبب ہے وحشت

ورنہ حسرت تو مٹا دی گئی ہے

محض خوابوں خیالوں میں ترا دیدار ہو کب تک

حقیقت میں بھی تجھ سے آشنائی چاہتے ہیں ہم

ہمارے پاؤں میں کیلیں اور آنکھوں سے لہو ٹپکے

ہماری جو بھی حالت ہو تمہارے ساتھ رہنا ہے