عشرت قادری کی شاعری

عشرت قادری کے اشعار

دریافت کر کے خود کو زمانے سے دور ہوں

ہر شخص با شعور ہے میں بے شعور ہوں

اک سایہ شرماتا لجاتا راہ میں تنہا چھوڑ گیا

میں پرچھائیں ڈھونڈ رہا ہوں ٹوٹی ہوئی دیواروں پر

یوں زندگی گزر رہی ہے میری

جو ان کی ہے وہی خوشی ہے میری

ظاہری شکل میری زندہ ہے

اور اندر سے مر گیا ہوں میں

کون دیکھے گا مجھ میں اب چہرہ

آئینہ تھا بکھر گیا ہوں میں

ان اندھیروں سے پرے اس شب غم سے آگے

اک نئی صبح بھی ہے شام الم سے آگے

وہ تیرے بچھڑنے کا سماں یاد جب آیا

بیتے ہوئے لمحوں کو سسکتے ہوئے دیکھا