کانٹوں پہ چلے ہیں تو کہیں پھول کھلے ہیں

پھولوں سے ملے ہیں تو بڑی چوٹ لگی ہے

غم سے احساس کا آئینہ جلا پاتا ہے

اور غم سیکھے ہے آ کر یہ سلیقہ مجھ سے

یہ تو وقت وقت کی بات ہے ہمیں ان سے کوئی گلہ نہیں

وہ ہوں آج ہم سے خفا خفا کبھو ہم سے ان کو بھی پیار تھا

درد کی آنچ بنا دیتی ہے دل کو اکسیر

درد سے دل ہے اگر درد نہیں دل بھی نہیں

آج اپنے بھی پرائے سے نظر آتے ہیں

پیار کی رسم زمانے سے اٹھی جاتی ہے

کوئی خیال کوئی یاد کوئی تو احساس

ملا دے آج ذرا آ کے ہم کو خود ہم سے

مدت سے رہی فرش تری راہ گزر میں

تب جا کے ستاروں سے کہیں آنکھ لڑی ہے

آنکھ اٹھاؤ تو حجابات کا اک عالم ہے

دل سے دیکھو تو کوئی راہ میں حائل بھی نہیں

وہ جو داغ عشق تھا خوش نما جو امانت دل زار تھا

سر بزم تھا تو چراغ تھا سر راہ تھا تو غبار تھا