maiñ to thā maujūd kitāb ke lafzoñ meñ

vo hī shāyad mujh ko paḌhnā bhuul gayā

main to tha maujud kitab ke lafzon mein

wo hi shayad mujh ko paDhna bhul gaya

maiñ vahm huuñ ki haqīqat ye haal dekhne ko

giraft hotā huuñ apnā visāl dekhne ko

main wahm hun ki haqiqat ye haal dekhne ko

giraft hota hun apna visal dekhne ko

safar na ho to ye lutf-e-safar hai be-ma.anī

badan na ho to bhalā kyā qabā meñ rakkhā hai

safar na ho to ye lutf-e-safar hai be-mani

badan na ho to bhala kya qaba mein rakkha hai

us ko khonā asl meñ us ko paanā hai

hāsil kā hī partav hai lā-hāsil meñ

us ko khona asl mein us ko pana hai

hasil ka hi partaw hai la-hasil mein

band paḌe haiñ shahar ke saare darvāze

ye kaisā aaseb ab ghar ghar lagtā hai

band paDe hain shahar ke sare darwaze

ye kaisa aaseb ab ghar ghar lagta hai