idhar se jitnī yagāngat kī udhar se utnī huī judā.ī

baḌhā.ī thoḌī sī jab idhar se bahut sī tum ne udhar ghaTā.ī

idhar se jitni yagangat ki udhar se utni hui judai

baDhai thoDi si jab idhar se bahut si tum ne udhar ghaTai

yaad ne un tañg kūchoñ kī fazā sahrā kī dekh

har qadam par jaan maarī hai dil-e-nākām kī

yaad ne un tang kuchon ki faza sahra ki dekh

har qadam par jaan mari hai dil-e-nakaam ki

huā āvāra hindostāñ se 'lutf' aage ḳhudā jaane

deccan ke sāñvloñ ne maarā yā inglan ke goroñ ne

hua aawara hindostan se 'lutf' aage KHuda jaane

deccan ke sanwlon ne mara ya inglan ke goron ne

ham aur farhād bahr-e-ishq meñ bāham hī kuude the

jo us ke sar se guzrā aab merī tā-kamar aayā

hum aur farhad bahr-e-ishq mein baham hi kude the

jo us ke sar se guzra aab meri ta-kamar aaya

aaj kyā jaane vo kyuuñ ārām-e-jāñ aayā nahīñ

harf-e-ranjish kal to koī darmiyāñ aayā nahīñ

aaj kya jaane wo kyun aaram-e-jaan aaya nahin

harf-e-ranjish kal to koi darmiyan aaya nahin

baiTh kar masjid meñ rindoñ se na itnā bigaḌiye

shaiḳh-jī aate ho maiḳhāne ke bhī akasr taraf

baiTh kar masjid mein rindon se na itna bigaDiye

shaiKH-ji aate ho maiKHane ke bhi akasr taraf

khul gayā ab ye ki vasl us kā ḳhayāl-e-ḳhām hai

aaj ummīdoñ kā dil hī dil meñ qatl-e-ām hai

khul gaya ab ye ki wasl us ka KHayal-e-KHam hai

aaj ummidon ka dil hi dil mein qatl-e-am hai

na kar ai 'lutf' nāhaq rahravān-e-dair se hujjat

yahī rasta to khā kar pher hai ka.abe ko jā niklā

na kar ai 'lutf' nahaq rahrawan-e-dair se hujjat

yahi rasta to kha kar pher hai kabe ko ja nikla

nahīñ vo ham ki kahne se tire har but ke bande hoñ

kare paidā bhī gar nāseh tū us ġhārat-gar-e-dīñ sā

nahin wo hum ki kahne se tere har but ke bande hon

kare paida bhi gar naseh tu us ghaarat-gar-e-din sa

der tak zabt-e-suḳhan kal us meñ aur ham meñ rahā

bol uThe ghabrā ke jab āḳhir ke ta.iiñ dam ruk ga.e

der tak zabt-e-suKHan kal us mein aur hum mein raha

bol uThe ghabra ke jab aaKHir ke tain dam ruk gae

kyā sabab batlā.eñ hañste hañste bāham ruk ga.e

ḳhud-baḳhud kuchh vo khīñche īdhar udhar ham ruk ga.e

kya sabab batlaen hanste hanste baham ruk gae

KHud-baKHud kuchh wo khinche idhar udhar hum ruk gae

pākī-e-dāmān-e-gul kī khā na ai bulbul qasam

raat bhar sarshār-e-kaifiyyat maiñ shabnam se rahā

paki-e-daman-e-gul ki kha na ai bulbul qasam

raat bhar sarshaar-e-kaifiyyat main shabnam se raha

kis ko bahlāte ho shīshe kā gulū TuuT gayā

ḳhum mire muñh se lagā do jo subū TuuT gayā

kis ko bahlate ho shishe ka gulu TuT gaya

KHum mere munh se laga do jo subu TuT gaya

yahī to kufr hai yārān-e-be-ḳhudī ke huzūr

jo kufr-o-dīñ kā mire yaar imtiyāz rahā

yahi to kufr hai yaran-e-be-KHudi ke huzur

jo kufr-o-din ka mere yar imtiyaz raha

begānoñ ne kabhī na vo kānoñ sunā.ī baat

afsos āshnā ne jo āñkhoñ dikhā.ī baat

beganon ne kabhi na wo kanon sunai baat

afsos aashna ne jo aankhon dikhai baat