بعد نفرت پھر محبت کو زباں درکار ہے

پھر عزیز جاں وہی اردو زباں ہونے لگی

ہر نیا رستہ نکلتا ہے جو منزل کے لیے

ہم سے کہتا ہے پرانی رہ گزر کچھ بھی نہیں

مجھے بھی خود نہ تھا احساس اپنے ہونے کا

تری نگاہ میں اپنا مقام کھونے تک

نہ سمجھے اشک فشانی کو کوئی مایوسی

ہے دل میں آگ اگر آنکھ میں بھی پانی ہے

سچ کہیو کہ واقف ہو مرے حال سے عامرؔ

دنیا ہے خفا مجھ سے کہ دنیا سے خفا میں

سر کے نیچے اینٹ رکھ کر عمر بھر سویا ہے تو

آخری بستر بھی عامرؔ تیرا فرش خاک تھا

بزم میں یوں تو سبھی تھے پھر بھی عامرؔ دیر تک

تیرے جانے سے رہی اک خامشی چاروں طرف

دھیرے دھیرے سر میں آ کر بھر گیا برسوں کا شور

رفتہ رفتہ آرزوئے دل دھواں ہونے لگی

چین ہی کب لینے دیتا تھا کسی کا غم ہمیں

یہ نہ دیکھا عمر بھر اپنا بھی دامن چاک تھا

میں آج کل کے تصور سے شاد کام تو ہوں

یہ اور بات کہ دو پل کی زندگانی ہے

چند گھنٹے شور و غل کی زندگی چاروں طرف

اور پھر تنہائی کی ہمسائیگی چاروں طرف