ḳhud tarāshnā patthar aur ḳhudā banā lenā

aadmī ko aatā hai kyā se kyā banā lenā

KHud tarashna patthar aur KHuda bana lena

aadmi ko aata hai kya se kya bana lena

tumheñ ai kaash koī raaz ye samjhā gayā hotā

agar sunte to kahne kā salīqa aa gayā hotā

tumhein ai kash koi raaz ye samjha gaya hota

agar sunte to kahne ka saliqa aa gaya hota

rakho tum band be-shak apnī ghaḌiyāñ

samay to raat din chaltā rahegā

rakho tum band be-shak apni ghaDiyan

samay to raat din chalta rahega

rakhnā hamesha yaad ye merā kahā huā

aatā nahīñ hai luuT ke paanī bahā huā

rakhna hamesha yaad ye mera kaha hua

aata nahin hai luT ke pani baha hua

ai ḳhudā maiñ sun rahā huuñ āhaTeñ us vaqt kī

jab tirī duniyā kā har bandā ḳhudā ho jā.egā

ai KHuda main sun raha hun aahaTen us waqt ki

jab teri duniya ka har banda KHuda ho jaega

ḳhushī ham se kinārā kar rahī hai

hameñ ġham ko bhī apnānā paḌegā

KHushi hum se kinara kar rahi hai

hamein gham ko bhi apnana paDega

aaj bār-e-gosh hai merī sadā us ko magar

mere sheroñ ko zamāna der tak dohrā.egā

aaj bar-e-gosh hai meri sada us ko magar

mere sheron ko zamana der tak dohraega

mas.ale hal karte karte aadmī kā zehan bhī

be-tarah uljhā huā ik mas.ala ho jā.egā

masale hal karte karte aadmi ka zehan bhi

be-tarah uljha hua ek masala ho jaega

hamārā dil to ġham meñ bhī ḳhushī mahsūs kartā hai

vahī mushkil meñ rahte haiñ jo ġham ko ġham samajhte haiñ

hamara dil to gham mein bhi KHushi mahsus karta hai

wahi mushkil mein rahte hain jo gham ko gham samajhte hain

tumhārī raah meñ āñkheñ bichhā.e baiThā huuñ

tumhāre aane kī hālāñki koī aas nahīñ

tumhaari rah mein aankhen bichhae baiTha hun

tumhaare aane ki haalanki koi aas nahin

har shaḳhs yahāñ sāhib-e-idrāk nahīñ hai

har shaḳhs ko tum sāhib-e-idrāk na kahnā

har shaKHs yahan sahib-e-idrak nahin hai

har shaKHs ko tum sahib-e-idrak na kahna

har ik kī hai pasand apnī har ik kā hai mizāj apnā

vafā mujh ko pasand aa.ī pasand aa.ī jafā us ko

har ek ki hai pasand apni har ek ka hai mizaj apna

wafa mujh ko pasand aai pasand aai jafa us ko

ham ne duniyā se sulūk aisā kiyā hai 'rānā'

ham na hoñge to bahut yaad karegī duniyā

hum ne duniya se suluk aisa kiya hai 'rana'

hum na honge to bahut yaad karegi duniya

rahe ḳhayāl hiqārat se dekhne vaalo

haqīr log baḌe aadmī nikalte haiñ

rahe KHayal hiqarat se dekhne walo

haqir log baDe aadmi nikalte hain

ab mujhe thoḌī sī ġhaflat se bhī Dar lagtā hai

aañkh lagtī hai ki dīvār se sar lagtā hai

ab mujhe thoDi si ghaflat se bhi Dar lagta hai

aankh lagti hai ki diwar se sar lagta hai

zindagī kā bhī kiyā bharosā hai

zindagī kī qasam bhī kyā khā.ūñ

zindagi ka bhi kiya bharosa hai

zindagi ki qasam bhi kya khaun