جب بگڑتے ہیں بات بات پہ وہ

وصل کے دن قریب ہوتے ہیں

ہم کو اغیار کا گلا کیا ہے

زخم کھائیں ہیں ہم نے یاروں سے

کون کہتا ہے محبت کی زباں ہوتی ہے

یہ حقیقت تو نگاہوں سے بیاں ہوتی ہے

پھر کسی بے وفا کی یاد آئی

پھر کسی نے لیا وفا کا نام

تم نہ توبہ کرو جفاؤں سے

ہم وفاؤں سے توبہ کرتے ہیں

آخر تڑپ تڑپ کے یہ خاموش ہو گیا

دل کو سکون مل ہی گیا اضطراب میں

ہم قریب آ کر اور دور ہوئے

اپنے اپنے نصیب ہوتے ہیں

اب تو احساس تمنا بھی نہیں

قافلہ دل کا لٹا ہو جیسے

ہوئی تھی خواب میں خوشبو سی محسوس

تم آئے خواب کی تعبیر دیکھی

وہ اور ہوں گے پی کے جو سرشار ہو گئے

ہر جام سے ہمیں تو نئی تشنگی ملی

دل وہ صحرا ہے کہ جس میں رات دن

پھول کھلتے ہیں بہار آتی نہیں

اہل کشتی نے خود کشی کی تھی

ہوا بدنام ناخدا کا نام

اپنی اپنی ذات میں گم ہیں اہل دل بھی اہل نظر بھی

محفل میں دل کیوں کر بہلے محفل میں تنہائی بہت ہے