tū june kī garmī se na ghabrā ki jahāñ meñ

ye lū to hamesha na rahī hai na rahegī

tu june ki garmi se na ghabra ki jahan mein

ye lu to hamesha na rahi hai na rahegi

tavīl raat bhī āḳhir ko ḳhatm hotī hai

'sharīf' ham na añdheroñ se maat khā.eñge

tawil raat bhi aaKHir ko KHatm hoti hai

'sharif' hum na andheron se mat khaenge

bastiyāñ tū ne ḳhalāoñ meñ basā.īñ bhī to kyā

dil ke vīrānoñ ko dekh in ko bhī kuchh ābād kar

bastiyan tu ne KHalaon mein basain bhi to kya

dil ke viranon ko dekh in ko bhi kuchh aabaad kar

ġhunūda rāhoñ ko tak tak ke sogvār na ho

tire qadam hī musāfir inheñ jagā.eñge

ghunuda rahon ko tak tak ke sogwar na ho

tere qadam hi musafir inhen jagaenge

gulzār meñ vo rut bhī kabhī aa ke rahegī

jab koī kalī jaur ḳhizāñ ke na sahegī

gulzar mein wo rut bhi kabhi aa ke rahegi

jab koi kali jaur KHizan ke na sahegi

ḳhanda-e-mauj mirī tishna-labī ne jaanā

ret kā taptā huā dekh ke zarra koī

KHanda-e-mauj meri tishna-labi ne jaana

ret ka tapta hua dekh ke zarra koi