خود سے فرار اتنا آسان بھی نہیں ہے

سائے کریں گے پیچھا کوئی کہیں سے نکلے

تجھے شناخت نہیں ہے مرے لہو کی کیا

میں روز صبح کے اخبار سے نکلتا ہوں

میاں بازار کو شرمندہ کرنا کیا ضروری ہے

کہیں اس دور میں تہذیب کے زیور بدلتے ہیں

اتنا نور کہاں سے لاؤں تاریکی کے اس جنگل میں

دو جگنو ہی پاس تھے اپنے جن کو ستارہ کر رکھا ہے

تمہارے خواب لوٹانے پہ شرمندہ تو ہیں لیکن

کہاں تک اتنے خوابوں کی نگہبانی کریں گے ہم

مری تلاش میں اس پار لوگ جاتے ہیں

مگر میں ڈوب کے اس پار سے نکلتا ہوں

یہ ایک سایہ غنیمت ہے روک لو ورنہ

یہ روشنی کے بدن سے لپٹنے والا ہے

کیا ختم نہ ہوگی کبھی صحرا کی حکومت

رستے میں کہیں تو در و دیوار بھی آئے

کدھر ڈبو کے کہاں پر ابھارتا ہے تو

یہ کیسا رنگ ہے دریا تری روانی کا

مری تلاش میں وہ بھی ضرور آئے گا

سو میں بھی چشم خریدار سے نکلتا ہوں