یوسف جمال کی شاعری

یوسف جمال کے اشعار

قاتل تو سینہ تان کے چلتے رہے یہاں

جو بے گنہ تھے ان سے حوالات بھر گئے

جب میں کچا پھل تھا تو محفوظ تھا میں

اب جو پکا تو مجھ پہ نشانہ لگتا ہے

وقت کی محرومیوں نے چھین لی میری زبان

ورنہ اک مدت تلک میں لا جوابوں میں رہا

پوچھے جو زندگی کی حقیقت کوئی جمالؔ

تو چٹکیوں میں ریت اڑا کر اسے دکھا

بونا تھا وہ ضرور مگر اس کے باوجود

کردار کے لحاظ سے قد کا بلند تھا

ڈھونڈتے ہو کیوں جلی تحریر کے اسباق میں

میں تو کہرے کی طرح دھندلے نصابوں میں رہا