میں نے لکھا ہے اسے مریم و سیتا کی طرح

جسم کو اس کے اجنتا نہیں لکھا میں نے

کوئی پوچھے گا جس دن واقعی یہ زندگی کیا ہے

زمیں سے ایک مٹھی خاک لے کر ہم اڑا دیں گے

نہ جانے کیوں ادھوری ہی مجھے تصویر جچتی ہے

میں کاغذ ہاتھ میں لےکر فقط چہرہ بناتا ہوں

سبھی کے اپنے مسائل سبھی کی اپنی انا

پکاروں کس کو جو دے ساتھ عمر بھر میرا

مسلسل دھوپ میں چلنا چراغوں کی طرح جلنا

یہ ہنگامے تو مجھ کو وقت سے پہلے تھکا دیں گے

چاہو تو مری آنکھوں کو آئینہ بنا لو

دیکھو تمہیں ایسا کوئی درپن نہ ملے گا

اب نام نہیں کام کا قائل ہے زمانہ

اب نام کسی شخص کا راون نہ ملے گا

میرا ہر شعر حقیقت کی ہے زندہ تصویر

اپنے اشعار میں قصہ نہیں لکھا میں نے

وہ جس کو پڑھتا نہیں کوئی بولتے سب ہیں

جناب میرؔ بھی کیسی زبان چھوڑ گئے