آتا ہے جو طوفاں آنے دے کشتی کا خدا خود حافظ ہے

ممکن ہے کہ اٹھتی لہروں میں بہتا ہوا ساحل آ جائے

عشق کا اعجاز سجدوں میں نہاں رکھتا ہوں میں

نقش پا ہوتی ہے پیشانی جہاں رکھتا ہوں میں

بہزادؔ صاف صاف میں کہتا ہوں حال دل

شرمندۂ کمال مری شاعری نہیں

میں ڈھونڈھ رہا ہوں مری وہ شمع کہاں ہے

جو بزم کی ہر چیز کو پروانہ بنا دے

ہم بھی خود کو تباہ کر لیتے

تم ادھر بھی نگاہ کر لیتے

اے دل کی خلش چل یوں ہی سہی چلتا تو ہوں ان کی محفل میں

اس وقت مجھے چونکا دینا جب رنگ پہ محفل آ جائے

زندہ ہوں اس طرح کہ غم زندگی نہیں

جلتا ہوا دیا ہوں مگر روشنی نہیں

وفاؤں کے بدلے جفا کر رہے ہیں

میں کیا کر رہا ہوں وہ کیا کر رہے ہیں

گو مدتیں ہوئی ہیں کسی سے جدا ہوئے

لیکن یہ دل کی آگ ابھی تک بجھی نہیں

اے جذبۂ دل گر میں چاہوں ہر چیز مقابل آ جائے

منزل کے لیے دو گام چلوں اور سامنے منزل آ جائے

مجھے تو ہوش نہ تھا ان کی بزم میں لیکن

خموشیوں نے میری ان سے کچھ کلام کیا