laḌā.ī hai to achchhā rāt-bhar yuuñ hī basar kar lo

ham apnā muñh idhar kar leñ tum apnā muñh udhar kar lo

laDai hai to achchha raat-bhar yun hi basar kar lo

hum apna munh idhar kar len tum apna munh udhar kar lo

na kisī kī aañkh kā nuur huuñ na kisī ke dil kā qarār huuñ

jo kisī ke kaam na aa sake maiñ vo ek musht-e-ġhubār huuñ

na kisi ki aankh ka nur hun na kisi ke dil ka qarar hun

jo kisi ke kaam na aa sake main wo ek musht-e-ghubar hun

un kā ik patlā sā ḳhanjar un kā ik nāzuk sā haath

vo to ye kahiye mirī gardan ḳhushī meñ kaT ga.ī

un ka ek patla sa KHanjar un ka ek nazuk sa hath

wo to ye kahiye meri gardan KHushi mein kaT gai

musībat aur lambī zindagānī

buzurgoñ kī duā ne maar Daalā

musibat aur lambi zindagani

buzurgon ki dua ne mar Dala

jo pūchhā muñh dikhāne aap kab chilman se nikleñge

to bole aap jis din hashr meñ madfan se nikleñge

jo puchha munh dikhane aap kab chilman se niklenge

to bole aap jis din hashr mein madfan se niklenge

tasavvur meñ tirā dar apne sar tak khīñch letā huuñ

sitamgar maiñ nahīñ chaltā tirī dīvār chaltī hai

tasawwur mein tera dar apne sar tak khinch leta hun

sitamgar main nahin chalta teri diwar chalti hai

vo shāyad ham se ab tark-e-ta.alluq karne vaale haiñ

hamāre dil pe kuchh afsurdagī sī chhā.ī jaatī hai

wo shayad hum se ab tark-e-talluq karne wale hain

hamare dil pe kuchh afsurdagi si chhai jati hai

burā huuñ maiñ jo kisī kī burā.iyoñ meñ nahīñ

bhale ho tum jo kisī kā bhalā nahīñ karte

bura hun main jo kisi ki buraiyon mein nahin

bhale ho tum jo kisi ka bhala nahin karte

agar taqdīr sīdhī hai to ḳhud ho jāoge sīdhe

ḳhafā baiThe raho tum ko manāne kaun aatā hai

agar taqdir sidhi hai to KHud ho jaoge sidhe

KHafa baiThe raho tum ko manane kaun aata hai

ik ham haiñ ki ham ne tumheñ ma.ashūq banāyā

ik tum ho ki tum ne hameñ rakkhā na kahīñ kā

ek hum hain ki hum ne tumhein mashuq banaya

ek tum ho ki tum ne hamein rakkha na kahin ka

vaqt do mujh par kaThin guzre haiñ saarī umr meñ

ik tire aane se pahle ik tire jaane ke ba.ad

waqt do mujh par kaThin guzre hain sari umr mein

ek tere aane se pahle ek tere jaane ke baad

un ko aatī thī niiñd aur mujh ko

apnā qissa tamām karnā thā

un ko aati thi nind aur mujh ko

apna qissa tamam karna tha

asīr-e-panja-e-ahd-e-shabāb kar ke mujhe

kahāñ gayā mirā bachpan ḳharāb kar ke mujhe

asir-e-panja-e-ahd-e-shabab kar ke mujhe

kahan gaya mera bachpan KHarab kar ke mujhe

mohabbat meñ kisī ne sar paTakne kā sabab pūchhā

to kah dūñgā ki apnī mushkileñ āsān kartā huuñ

mohabbat mein kisi ne sar paTakne ka sabab puchha

to kah dunga ki apni mushkilen aasan karta hun

ikaTThe kar ke terī dūsrī tasvīr khīñchūñgā

vo sab jalve jo chhan chhan kar tirī chilman se nikleñge

ikaTThe kar ke teri dusri taswir khinchunga

wo sab jalwe jo chhan chhan kar teri chilman se niklenge

āñkheñ na churāo dil meñ rah kar

chorī na karo ḳhudā ke ghar meñ

aankhen na churao dil mein rah kar

chori na karo KHuda ke ghar mein

hamāre ek dil ko un kī do zulfoñ ne gherā hai

ye kahtī hai ki merā hai vo kahtī hai ki merā hai

hamare ek dil ko un ki do zulfon ne ghera hai

ye kahti hai ki mera hai wo kahti hai ki mera hai

ilāj-e-dard-e-dil tum se masīhā ho nahīñ saktā

tum achchhā kar nahīñ sakte maiñ achchhā ho nahīñ saktā

ilaj-e-dard-e-dil tum se masiha ho nahin sakta

tum achchha kar nahin sakte main achchha ho nahin sakta

ai ishq kahīñ le chal ye dair-o-haram chhūTeñ

in donoñ makānoñ meñ jhagḌā nazar aatā hai

ai ishq kahin le chal ye dair-o-haram chhuTen

in donon makanon mein jhagDa nazar aata hai