maiñ ek ḳhāna-ba-dosh huuñ jis kā ghar hai duniyā

so apne kāñdhe pe le ke ye ghar bhaTak rahā huuñ

main ek KHana-ba-dosh hun jis ka ghar hai duniya

so apne kandhe pe le ke ye ghar bhaTak raha hun

maiñ apnī maut se ḳhalvat meñ milnā chāhtā huuñ

so merī naav meñ bas maiñ huuñ nāḳhudā nahīñ hai

main apni maut se KHalwat mein milna chahta hun

so meri naw mein bas main hun naKHuda nahin hai

makīn-e-dil ko ḳhānumā-ḳharābiyoñ se ishq thā

qayām DhūñDhtā rahā tumhārī chhat ke ba.ad bhī

makin-e-dil ko KHanuma-KHarabiyon se ishq tha

qayam DhunDhta raha tumhaari chhat ke baad bhi

maiñ tujh se milne samay se pahle pahuñch gayā thā

so tere ghar ke qarīb aa kar bhaTak rahā huuñ

main tujh se milne samay se pahle pahunch gaya tha

so tere ghar ke qarib aa kar bhaTak raha hun

vo nasha hai ke zabāñ aql se kartī hai fareb

tū mirī baat ke mafhūm pe jaatā hai kahāñ

wo nasha hai ke zaban aql se karti hai fareb

tu meri baat ke mafhum pe jata hai kahan

tamām farq mohabbat meñ ek baat ke haiñ

vo apnī zaat kā na.iiñ hai ham us kī zaat ke haiñ

tamam farq mohabbat mein ek baat ke hain

wo apni zat ka nain hai hum us ki zat ke hain

ye tai huā thā ki ḳhuub ro.eñge jab mileñge

ab us ke shāne pe sar hai to hañste jā rahe haiñ

ye tai hua tha ki KHub roenge jab milenge

ab us ke shane pe sar hai to hanste ja rahe hain

shahr-e-jāñ meñ vabāoñ kā ik daur thā

maiñ adā-e-tanaffus meñ kamzor thā

shahr-e-jaan mein wabaon ka ek daur tha

main ada-e-tanaffus mein kamzor tha

ye jism tañg hai siine meñ bhī lahū kam hai

dil ab vo phuul hai jis meñ ki rañg-o-bū kam hai

ye jism tang hai sine mein bhi lahu kam hai

dil ab wo phul hai jis mein ki rang-o-bu kam hai

āñsuoñ meñ mire kāñdhe ko Dubone vaale

pūchh to le ki mire jism kā sahrā hai kahāñ

aansuon mein mere kandhe ko Dubone wale

puchh to le ki mere jism ka sahra hai kahan

hamārā kaam to mausam kā dhyān karnā hai

aur us ke ba.ad ke sab kaam shash-jahāt ke haiñ

hamara kaam to mausam ka dhyan karna hai

aur us ke baad ke sab kaam shash-jahat ke hain

tire laboñ meñ mire yaar zā.iqa nahīñ hai

hazār bose haiñ un par pa ik duā nahīñ hai

tere labon mein mere yar zaiqa nahin hai

hazar bose hain un par pa ek dua nahin hai

tamām hosh zabt ilm maslahat ke ba.ad bhī

phir ik ḳhatā maiñ kar gayā thā ma.azarat ke ba.ad bhī

tamam hosh zabt ilm maslahat ke baad bhi

phir ek KHata main kar gaya tha mazarat ke baad bhi