aag ho dil meñ to āñkhoñ meñ dhanak paidā ho

ruuh meñ raushnī lahje meñ chamak paidā ho

aag ho dil mein to aankhon mein dhanak paida ho

ruh mein raushni lahje mein chamak paida ho

merī āñkhoñ meñ anokhe jurm kī tajvīz thī

sirf dekhā thā use us kā badan mailā huā

meri aankhon mein anokhe jurm ki tajwiz thi

sirf dekha tha use us ka badan maila hua

muddat huī ik shaḳhs ne dil toḌ diyā thā

is vāste apnoñ se mohabbat nahīñ karte

muddat hui ek shaKHs ne dil toD diya tha

is waste apnon se mohabbat nahin karte

tere chehre pe ujāle kī saḳhāvat aisī

aur mirī ruuh meñ nādār añdherā aisā

tere chehre pe ujale ki saKHawat aisi

aur meri ruh mein nadar andhera aisa

us ke vāris nazar nahīñ aa.e

shāyad us laash ke pate haiñ bahut

us ke waris nazar nahin aae

shayad us lash ke pate hain bahut