zarre meñ gum hazār sahrā

qatre meñ muhīt laakh qulzum

zarre mein gum hazar sahra

qatre mein muhit lakh qulzum

ā.īna jab bhī rū-ba-rū aayā

apnā chehra chhupā liyā ham ne

aaina jab bhi ru-ba-ru aaya

apna chehra chhupa liya hum ne

abhī haiñ qurb ke kuchh aur marhale baaqī

ki tujh ko pā ke hameñ phir tirī tamannā hai

abhi hain qurb ke kuchh aur marhale baqi

ki tujh ko pa ke hamein phir teri tamanna hai

shāhoñ kī bandagī meñ sar bhī nahīñ jhukāyā

tere liye sarāpā ādāb ho ga.e ham

shahon ki bandagi mein sar bhi nahin jhukaya

tere liye sarapa aadab ho gae hum

chhoTī paḌtī hai anā kī chādar

paañv Dhaktā huuñ to sar khultā hai

chhoTi paDti hai ana ki chadar

panw Dhakta hun to sar khulta hai