روز یہ خواب ڈراتا ہے مجھے

کوئی سایہ لیے جاتا ہے مجھے

ایک کرن پھر مجھ کو واپس کھینچ گئی

میں بس جسم سے باہر آنے والا تھا

پجاری ہیں ازل سے میرؔ جی کے

وہی ہم ہیں وہی قشقہ ہمارا

زندگی کی ہنسی اڑاتی ہوئی

خواہش مرگ سر اٹھاتی ہوئی

سبھی کو راستہ بتا دیا گیا

یوں منزلوں کا قد گھٹا دیا گیا

اسے چھوا ہی نہیں جو مری کتاب میں تھا

وہی پڑھایا گیا مجھ کو جو نصاب میں تھا

میں تو کسی جلوس میں گیا نہیں

مرا مکان کیوں جلا دیا گیا

کوئی اس کے برابر ہو گیا ہے

یہ سنتے ہی وہ پتھر ہو گیا ہے

ہوا کے وار پر اب وار کرنے والا ہے

چراغ بجھنے سے انکار کرنے والا ہے

میں عدم کی پناہ گاہ میں ہوں

چھو بھی سکتی نہیں حیات مجھے

رفتہ رفتہ قبول ہوں گے اسے

روشنی کے لیے نئے ہیں ہم

مری عروج کی لکھی تھی داستاں جس میں

مرے زوال کا قصہ بھی اس کتاب میں تھا

میں تو کسی جلوس میں گیا نہیں

مرا مکان کیوں جلا دیا گیا

بچھڑنے کا ہمیں امکان تو تھا

مگر اب دن مقرر ہو گیا ہے

جسے دیکھو غزل پہنے ہوئے ہے

بہت سستا یہ زیور گیا ہے

ایسی پیاس اور ایسا صبر

دریا پانی پانی ہے

جن کا سوجھا نہ کچھ جواب ہمیں

ان سوالوں پہ ہنس دیئے ہم لوگ

بلا کا حبس تھا پر نیند ٹوٹتی ہی نہ تھی

نہ کوئی در نہ دریچہ فصیل خواب میں تھا

میری کوشش تو یہی ہے کہ یہ معصوم رہے

اور دل ہے کہ سمجھ دار ہوا جاتا ہے

گھر میں وہی پیلی تنہائی رہتی ہے

دیواروں کے رنگ بدلتے رہتے ہیں

تنہا ہوتا ہوں تو مر جاتا ہوں میں

میرے اندر تو زندہ ہو جاتا ہے

محبت کے آداب سیکھو ذرا

اسے جان کہہ کر پکارا کرو

فقط زنجیر بدلی جا رہی تھی

میں سمجھا تھا رہائی ہو گئی ہے

کون تحلیل ہوا ہے مجھ میں

منتشر کیوں ہیں عناصر میرے

زمین بیچ کے خوش ہو رہے ہو تم جس کو

وہ سارے گاؤں کو بازار کرنے والا ہے

یہاں تک کر لیا مصروف خود کو

اکیلی ہو گئی تنہائی میری

دشت کی خاک بھی چھانی ہے

گھر سی کہاں ویرانی ہے

دیکھنا چاہتا ہوں گم ہو کر

کیا کوئی ڈھونڈ کے لاتا ہے مجھے

مجھ کو اکثر اداس کرتی ہے

ایک تصویر مسکراتی ہوئی

گھر سے نکلا تھا خودکشی کرنے

ریل کے ڈبے گن رہا ہوں میں

میری کوشش تو یہی ہے کہ یہ معصوم رہے

اور دل ہے کہ سمجھ دار ہوا جاتا ہے

مدتیں ہو گئیں حساب کئے

کیا پتا کتنے رہ گئے ہیں ہم

ارادہ تو نہیں ہے خودکشی کا

مگر میں زندگی سے خوش نہیں ہوں

ذرا سا دھیان کیا بھٹکا ہمارا

ہمیں پر آ گرا ملبہ ہمارا

تو بھی ناراض بہت ہے مجھ سے

زندگی تجھ سے خفا ہوں میں بھی

ہمارے درمیاں جو اٹھ رہی تھی

وہ اک دیوار پوری ہو گئی ہے

عشق بینائی بڑھا دیتا ہے

جانے کیا کیا نظر آتا ہے مجھے

یہ صدا کاش اسی نے دی ہو

اس طرح وہ ہی بلاتا ہے مجھے

ایک برس اور بیت گیا

کب تک خاک اڑانی ہے

اثر ہے یہ ہماری دستکوں کا

جہاں دیوار تھی در ہو گیا ہے

لفظ کی قید و رہائی کا ہنر

کام آ ہی گیا آخر میرے