aao dekhen ahl-e-wafa ki hoti hai tauqir kahan

aao dekheñ ahl-e-vafā kī hotī hai tauqīr kahāñ

kis mahfil kā naam hai maqtal khiñchtī hai shamshīr kahāñ

chhūT na pāoge dil vaalo chāhat ke is zindāñ se

chāho to dil TuuT bhī jaa.eñ TūTegī zanjīr kahāñ

chashm-e-sahar meñ aas umiid kyā aañsū kī ik buuñd nahīñ

yuuñ dāman phailā.e chale haiñ rātoñ ke rahgīr kahāñ

sadiyoñ ke pahchāne ḳhvāboñ se bojhal in āñkhoñ ko

anjāne ḳhvāboñ ke shahr meñ le aa.ī ta.abīr kahāñ

ik vīrāna ek shajar kuchh saa.e do pyāsī āñkheñ

dekheñ sajegī din ke makān meñ raat kī ye tasvīr kahāñ

vaqt kā dariyā le bhī gayā vo sab jo dil-o-jāñ se thā aziiz

DhūñDh rahe ho sāhil par ab aañsū kī tahrīr kahāñ

aao dekhen ahl-e-wafa ki hoti hai tauqir kahan

kis mahfil ka nam hai maqtal khinchti hai shamshir kahan

chhuT na paoge dil walo chahat ke is zindan se

chaho to dil TuT bhi jaen TuTegi zanjir kahan

chashm-e-sahar mein aas umid kya aansu ki ek bund nahin

yun daman phailae chale hain raaton ke rahgir kahan

sadiyon ke pahchane KHwabon se bojhal in aankhon ko

anjaane KHwabon ke shahr mein le aai tabir kahan

ek virana ek shajar kuchh sae do pyasi aankhen

dekhen sajegi din ke makan mein raat ki ye taswir kahan

waqt ka dariya le bhi gaya wo sab jo dil-o-jaan se tha aziz

DhunDh rahe ho sahil par ab aansu ki tahrir kahan