ba-zahir sehat achchhi hai jo bimari ziyaada hai

ba-zāhir sehat achchhī hai jo bīmārī ziyāda hai

isī ḳhātir buḌhāpe meñ havas-kārī ziyāda hai

chale gā kis tarah se kārobār-e-shauq is sūrat

rasad kuchh bhī nahīñ hai aur talabgārī ziyāda hai

mohabbat kaam hai jis tarah kā bas dekhte jaao

rukā rahtā bhī hai aksar magar jaarī ziyāda hai

hameñ ḳhud bhī yaqīñ aatā nahīñ is kā jo ye ham par

girāñ-bārī kī nisbat se subuk-sārī ziyāda hai

surāġh is kā kahīñ andar to kuchh miltā nahīñ be-shak

ye hālat vo hai jo ham par abhī taarī ziyāda hai

uThā sakte nahīñ jab chuum kar hī chhoḌnā achchhā

mohabbat kā ye patthar is daf.a bhārī ziyāda hai

hifāzat hī hamārā mas.ala thā roz-e-avval se

so apne ird-gird ab chār-dīvārī ziyāda hai

imārat ye mukammal hone vaalī hī nahīñ lagtī

ki is ta.amīr meñ kuchh rañg-e-mismārī ziyāda hai

zarūrī ho to kar deñge 'zafar' tardīd bhī jaarī

bayān-e-ishq apnā ab ke aḳhbārī ziyāda hai

ba-zahir sehat achchhi hai jo bimari ziyaada hai

isi KHatir buDhape mein hawas-kari ziyaada hai

chale ga kis tarah se karobar-e-shauq is surat

rasad kuchh bhi nahin hai aur talabgari ziyaada hai

mohabbat kaam hai jis tarah ka bas dekhte jao

ruka rahta bhi hai aksar magar jari ziyaada hai

hamein KHud bhi yaqin aata nahin is ka jo ye hum par

giran-bari ki nisbat se subuk-sari ziyaada hai

suragh is ka kahin andar to kuchh milta nahin be-shak

ye haalat wo hai jo hum par abhi tari ziyaada hai

uTha sakte nahin jab chum kar hi chhoDna achchha

mohabbat ka ye patthar is dafa bhaari ziyaada hai

hifazat hi hamara masala tha roz-e-awwal se

so apne ird-gird ab chaar-diwari ziyaada hai

imarat ye mukammal hone wali hi nahin lagti

ki is tamir mein kuchh rang-e-mismari ziyaada hai

zaruri ho to kar denge 'zafar' tardid bhi jari

bayan-e-ishq apna ab ke aKHbari ziyaada hai