Dagmagate kabhi qadmon ko sambhalte dekha

Dagmagāte kabhī qadmoñ ko sambhalte dekhā

rāh-e-ulfat pe magar logoñ ko chalte dekhā

nafrateñ mil ga.iiñ mā'sūm diloñ meñ aksar

chāhatoñ ko dil-e-saffāk meñ palte dekhā

hausla thā koī maqsad yā salīqa, us ko

vaqt ke tund thapeḌoñ meñ sambhalte dekhā

jin ko paalā thā bahāroñ ne jahāñ bhar kii, unheñ

āzmā.ish kī kaḌī dhuup meñ jalte dekhā

be-jhijhak chal na sakā dasht-e-vafā meñ ab tak

rukte dekhā kabhī us shoḳh ko chalte dekhā

sabza-o-gul pe havā rakhtī hai shabnam lekin

phir havā ko un hī qatroñ ko kuchalte dekhā

shahr yā shahr se bāhar nahīñ, apne ghar meñ

ham ne aqdār-e-zamāna ko badalte dekhā

āzmā.ish hai, ijāzat hai ki majbūrī hai

zulm ko ham ne yahāñ phūlte-phalte dekhā

ātish-e-ishq se bachiye ki yahāñ ham ne bhī

mom kī tarah se patthar ko pighalte dekhā

apne jazbāt to mash.hūr the lekin ham ne

the jo hushyār bahut un ko ubalte dekhā

Daal dī pairoñ meñ us shaḳhs ke zanjīr yahāñ

vaqt ne jis ko zamāne meñ uchhalte dekhā

bazla-sanjī pe bahut naaz thā jin ko apnī

ham ne un ko bhī yahāñ zahr ugalte dekhā

roz ye mashriq-o-maġhrib kā tamāsha kyuuñ hai

ugte dekhā hai jise us ko hī Dhalte dekhā

aa gayā yaad vo bachpan kā zamāna 'ḳhālid'

jab kahīñ phuul se bachchoñ ko uchhalte dekhā

Dagmagate kabhi qadmon ko sambhalte dekha

rah-e-ulfat pe magar logon ko chalte dekha

nafraten mil gain ma'sum dilon mein aksar

chahaton ko dil-e-saffak mein palte dekha

hausla tha koi maqsad ya saliqa, us ko

waqt ke tund thapeDon mein sambhalte dekha

jin ko pala tha bahaaron ne jahan bhar ki, unhen

aazmaish ki kaDi dhup mein jalte dekha

be-jhijhak chal na saka dasht-e-wafa mein ab tak

rukte dekha kabhi us shoKH ko chalte dekha

sabza-o-gul pe hawa rakhti hai shabnam lekin

phir hawa ko un hi qatron ko kuchalte dekha

shahr ya shahr se bahar nahin, apne ghar mein

hum ne aqdar-e-zamana ko badalte dekha

aazmaish hai, ijazat hai ki majburi hai

zulm ko hum ne yahan phulte-phalte dekha

aatish-e-ishq se bachiye ki yahan hum ne bhi

mom ki tarah se patthar ko pighalte dekha

apne jazbaat to mashhur the lekin hum ne

the jo hushyar bahut un ko ubalte dekha

Dal di pairon mein us shaKHs ke zanjir yahan

waqt ne jis ko zamane mein uchhalte dekha

bazla-sanji pe bahut naz tha jin ko apni

hum ne un ko bhi yahan zahr ugalte dekha

roz ye mashriq-o-maghrib ka tamasha kyun hai

ugte dekha hai jise us ko hi Dhalte dekha

aa gaya yaad wo bachpan ka zamana 'KHalid'

jab kahin phul se bachchon ko uchhalte dekha