der tak raat andhere mein jo maine dekha

der tak raat añdhere meñ jo maiñ ne dekhā

mujh se bichhḌe hue ik shaḳhs kā chehra ubhrā

qasmeñ de de ke mire hāthoñ ne mujh ko rokā

maiñ ne dīvār se kal naam jab us kā khurchā

dekh kar us ko lagā jaise kahīñ ho dekhā

yaad bilkul nahīñ aayā mujhe ghanToñ sochā

mom-battī ko galātā rahā dhīre dhīre

raat añdhere kā mire kamre meñ bahtā laavā

kitne maġhmūm ġhazāloñ kā bharam rakhtā hai

narm kapḌe se tarāshā huā kaalā burqa

qadr ab ho ki na ho zehn-e-rasā kī lekin

aa hī jaatā hai kabhī kaam ye khoTā sikka

saare din merī tarah jaltā hai aur shaam Dhale

har-bun-e-mū se lipaT jaatā hai merā saayā

apne hoñToñ pe sajā letā huuñ maiñ jhūTī hañsī

apnī palkoñ meñ chhupā letā huuñ jaltā dariyā

maan lo merī jo hai us pe qanā.at kar lo

ab nahīñ utregā is duniyā meñ mann-o-salvā

der tak raat andhere mein jo main ne dekha

mujh se bichhDe hue ek shaKHs ka chehra ubhra

qasmen de de ke mere hathon ne mujh ko roka

main ne diwar se kal nam jab us ka khurcha

dekh kar us ko laga jaise kahin ho dekha

yaad bilkul nahin aaya mujhe ghanTon socha

mom-batti ko galata raha dhire dhire

raat andhere ka mere kamre mein bahta lawa

kitne maghmum ghazalon ka bharam rakhta hai

narm kapDe se tarasha hua kala burqa

qadr ab ho ki na ho zehn-e-rasa ki lekin

aa hi jata hai kabhi kaam ye khoTa sikka

sare din meri tarah jalta hai aur sham Dhale

har-bun-e-mu se lipaT jata hai mera saya

apne honTon pe saja leta hun main jhuTi hansi

apni palkon mein chhupa leta hun jalta dariya

man lo meri jo hai us pe qanaat kar lo

ab nahin utrega is duniya mein mann-o-salwa