husn hire ki kani ho jaise

husn hiire kī kanī ho jaise

aur mirī jaañ pe banī ho jaise

terī chitvan ke ajab tevar haiñ

sar pe talvār tanī ho jaise

reza reza hue mīnā-o-ayāġh

riñd-o-sāqī meñ Thanī ho jaise

apnī galiyoñ meñ haiñ yuuñ āvāra

ki ġharīb-ul-vatanī ho jaise

har musāfir tire kūche ko chalā

us taraf chhāñv ghanī ho jaise

terī qurbat kī ḳhūmār-āgīnī

rut sharāboñ meñ sanī ho jaise

ye kashākash kī mai-e-mard-afgan

terī palkoñ se chhanī ho jaise

husn hire ki kani ho jaise

aur meri jaan pe bani ho jaise

teri chitwan ke ajab tewar hain

sar pe talwar tani ho jaise

reza reza hue mina-o-ayagh

rind-o-saqi mein Thani ho jaise

apni galiyon mein hain yun aawara

ki gharib-ul-watani ho jaise

har musafir tere kuche ko chala

us taraf chhanw ghani ho jaise

teri qurbat ki KHumar-agini

rut sharabon mein sani ho jaise

ye kashakash ki mai-e-mard-afgan

teri palkon se chhani ho jaise