jada-e-zist mein tanwir-e-sahar aane tak

jāda-e-zīst meñ tanvīr-e-sahar aane tak

ḳhvāb bunte raho tābīr nazar aane tak

lauT bhī aayā to sadiyoñ kī thakan lā.egā

sub.h kā bhūlā huā shaam ko ghar aane tak

zindagī pyaas se mānūs na ho jaa.e kahīñ

vaqt ke dasht meñ ik lamha-e-tar aane tak

zulmateñ chhīn na leñ ham se muqaddas chehre

sham-e-maslūb tire shola-ba-sar aane tak

ham gunāhoñ ke pujārī bhī to ban sakte haiñ

hāsil-e-jazba-e-taqdīs nazar aane tak

sub.h kī dhuup dhundhalkoñ meñ badal jaatī hai

shāḳh-e-iflās pe zartāb samar aane tak

chashm-e-be-ḳhvāb kī sūrat hai samundar meñ sadaf

abr-e-nīsāñ se koī shola-e-tar aane tak

jada-e-zist mein tanwir-e-sahar aane tak

KHwab bunte raho tabir nazar aane tak

lauT bhi aaya to sadiyon ki thakan laega

subh ka bhula hua sham ko ghar aane tak

zindagi pyas se manus na ho jae kahin

waqt ke dasht mein ek lamha-e-tar aane tak

zulmaten chhin na len hum se muqaddas chehre

sham-e-maslub tere shola-ba-sar aane tak

hum gunahon ke pujari bhi to ban sakte hain

hasil-e-jazba-e-taqdis nazar aane tak

subh ki dhup dhundhalkon mein badal jati hai

shaKH-e-iflas pe zartab samar aane tak

chashm-e-be-KHwab ki surat hai samundar mein sadaf

abr-e-nisan se koi shola-e-tar aane tak