kabhi jo aankhon ke aa gaya aaftab aage

kabhī jo āñkhoñ ke aa gayā āftāb aage

tire tasavvur meñ ham ne kar lī kitāb aage

vo ba.ad-e-muddat milā to rone kī aarzū meñ

nikal ke āñkhoñ se gir paḌe chand ḳhvāb aage

dil-o-nazar meñ hī apne ḳheme lagā liye haiñ

hameñ ḳhabar hai ki rāsta hai ḳharāb aage

nazar ke hairat-kade meñ kab kā khaḌā huā huuñ

ik aa.ine meñ khilā huā hai gulāb aage

guzarne vaalā thā rah-guzār-e-hayāt se maiñ

vo ek lamha ki aa ga.e phir janāb aage

'hasan' jo maazī kā saf.ha ulTā to aa ga.e haiñ

khajūr ke peḌ Tiile aur māhtāb aage

kabhi jo aankhon ke aa gaya aaftab aage

tere tasawwur mein hum ne kar li kitab aage

wo baad-e-muddat mila to rone ki aarzu mein

nikal ke aankhon se gir paDe chand KHwab aage

dil-o-nazar mein hi apne KHeme laga liye hain

hamein KHabar hai ki rasta hai KHarab aage

nazar ke hairat-kade mein kab ka khaDa hua hun

ek aaine mein khila hua hai gulab aage

guzarne wala tha rah-guzar-e-hayat se main

wo ek lamha ki aa gae phir janab aage

'hasan' jo mazi ka safha ulTa to aa gae hain

khajur ke peD Tile aur mahtab aage