KHala ki ruh kis liye ho mere iKHtiyar mein

ḳhalā kī ruuh kis liye ho mere iḳhtiyār meñ

uḌaan kā to zikr tak na thā mire farār meñ

kabhī to manzaroñ ke is tilism se ubhar sakūñ

khaḌā huuñ dil kī sat.h par ḳhud apne intizār meñ

ye sā.atoñ kī bhiiḌ ne use gañvā diyā na ho

rakhā thā maiñ ne ek lams vaqt kī darār meñ

safar meñ marhaloñ kī rasm bhī hai ab bujhī bujhī

vahī purānī gard hai har ik na.e ġhubār meñ

abad kī sarhadoñ ke paar bhī hadoñ kā shor thā

thī paikaroñ kī dāstāñ ḳhalā ke shāhkār meñ

ye jism kyuuñ ye ruuh kyuuñ hayāt kyuuñ 'riyāz' kyuuñ

sifar sifar kī guuñj hai talāsh ke mazār meñ

KHala ki ruh kis liye ho mere iKHtiyar mein

uDan ka to zikr tak na tha mere farar mein

kabhi to manzaron ke is tilism se ubhar sakun

khaDa hun dil ki sath par KHud apne intizar mein

ye saaton ki bhiD ne use ganwa diya na ho

rakha tha main ne ek lams waqt ki darar mein

safar mein marhalon ki rasm bhi hai ab bujhi bujhi

wahi purani gard hai har ek nae ghubar mein

abad ki sarhadon ke par bhi hadon ka shor tha

thi paikaron ki dastan KHala ke shahkar mein

ye jism kyun ye ruh kyun hayat kyun 'riyaz' kyun

sifar sifar ki gunj hai talash ke mazar mein