KHushbu ki tarah shab ko machalta tha gul-badan

ḳhushbū kī tarah shab ko machaltā thā gul-badan

bistar se chun rahā huuñ maiñ TuuTe hue baTan

ḳhāk-e-shifā ke naam se miTTī ko bech kar

kyā mauj kar rahe haiñ imāmān-e-fikr-o-fan

dekhūñgā maiñ bhī chakh ke zarā zahr kā mazā

tū apne saath saath mirā bhī to kar jatan

varna phir un ko chain se jiine na deñge log

shorafā ke vāste bhī hai lāzim kamīna-pan

ab jins meñ nahīñ rahī taḳhsīs rañg kī

donoñ taraf hī siiTī bajāte haiñ pairahan

lab par lachak rahī hai lipstick ḳhulūs kī

make-up ke bojh se hai pareshān husn-e-zan

lobān ke dhueñ meñ tasavvuf ke zikr par

paudoñ kī tarah hilte rahe ahl-e-anjuman

is shān-e-ehtiyāt ke qurbān jā.iye

koshish ye kar rahe haiñ ki mailā na ho kafan

KHushbu ki tarah shab ko machalta tha gul-badan

bistar se chun raha hun main TuTe hue baTan

KHak-e-shifa ke nam se miTTi ko bech kar

kya mauj kar rahe hain imaman-e-fikr-o-fan

dekhunga main bhi chakh ke zara zahr ka maza

tu apne sath sath mera bhi to kar jatan

warna phir un ko chain se jine na denge log

shorafa ke waste bhi hai lazim kamina-pan

ab jins mein nahin rahi taKHsis rang ki

donon taraf hi siTi bajate hain pairahan

lab par lachak rahi hai lipstick KHulus ki

make-up ke bojh se hai pareshan husn-e-zan

loban ke dhuen mein tasawwuf ke zikr par

paudon ki tarah hilte rahe ahl-e-anjuman

is shan-e-ehtiyat ke qurban jaiye

koshish ye kar rahe hain ki maila na ho kafan