kisi aur ko main tere siwa nahin chahta

kisī aur ko maiñ tire sivā nahīñ chāhtā

so kisī se terā muvāzana nahīñ chāhtā

koī kund zehn qabīl se hai mire ḳhilāf

ki vo raushnī kā hī irtiqā nahīñ chāhtā

tū hasīn hai so muġhālate meñ na ḳharch ho

mire dost dil se tujhe zarā nahīñ chāhtā

tirā vasl chāhe ragoñ meñ zahr utaar de

tire hijr kā kabhī azhdahā nahīñ chāhtā

abhī dil ko maazī kī sohbatoñ kā malāl hai

na.e shahr meñ koī āshnā nahīñ chāhtā

ye parind peḌ charāġh to mire saath haiñ

mirā ḳhāndān mirī razā nahīñ chāhtā

kisi aur ko main tere siwa nahin chahta

so kisi se tera muwazana nahin chahta

koi kund zehn qabil se hai mere KHilaf

ki wo raushni ka hi irtiqa nahin chahta

tu hasin hai so mughaalate mein na KHarch ho

mere dost dil se tujhe zara nahin chahta

tera wasl chahe ragon mein zahr utar de

tere hijr ka kabhi azhdaha nahin chahta

abhi dil ko mazi ki sohbaton ka malal hai

nae shahr mein koi aashna nahin chahta

ye parind peD charagh to mere sath hain

mera KHandan meri raza nahin chahta