kuchh nahin hota shab bhar sochon ka sarmaya hota hai

kuchh nahīñ hotā shab bhar sochoñ kā sarmāyā hotā hai

ham ne sehn ke ik kone meñ diyā jalāyā hotā hai

shām-e-tarab ke lamho is ko mat āvāzeñ diyā karo

raat ne apne sar par ġham kā bojh uThāyā hotā hai

jalte haiñ to peḌ hī jalte haiñ sūraj kī hiddat se

phūloñ par to pattoñ kī ThanDak kā saayā hotā hai

maiñ ne aaj talak na dekhā pau phaTne kā manzar tak

jab bhī so kar uThtā huuñ to bādal chhāyā hotā hai

kis ne kahā hai dīvāroñ par saaya kartā hai sūraj

dīvāroñ par dīvāroñ kā apnā saayā hotā hai

un logoñ se pūchhe koī sher kā rutba aur shu.ūr

jin logoñ ne ġhazal ko apnā ḳhuun pilāyā hotā hai

shahr ke log bhī shahr ke hañgāmoñ meñ gum hote hī 'adīm'

bastī vāloñ ne bhī koī rog lagāyā hotā hai

kuchh nahin hota shab bhar sochon ka sarmaya hota hai

hum ne sehn ke ek kone mein diya jalaya hota hai

sham-e-tarab ke lamho is ko mat aawazen diya karo

raat ne apne sar par gham ka bojh uThaya hota hai

jalte hain to peD hi jalte hain suraj ki hiddat se

phulon par to patton ki ThanDak ka saya hota hai

main ne aaj talak na dekha pau phaTne ka manzar tak

jab bhi so kar uThta hun to baadal chhaya hota hai

kis ne kaha hai diwaron par saya karta hai suraj

diwaron par diwaron ka apna saya hota hai

un logon se puchhe koi sher ka rutba aur shuur

jin logon ne ghazal ko apna KHun pilaya hota hai

shahr ke log bhi shahr ke hangamon mein gum hote hi 'adim'

basti walon ne bhi koi rog lagaya hota hai