meri hasti mein meri zist mein shamil hona

merī hastī meñ mirī ziist meñ shāmil honā

tujh ko ai husn mubārak ho mirā dil honā

ḳhushk ho jaa.eñ jo āñkheñ to ġham-e-furqat kyā

chāhiye aur bhī tar dīda-e-bismil honā

us pe mushkil koī paḌ jaa.e to āsāñ ho jaa.e

hausla baḳhshe jise kaam kā mushkil honā

lā mirā jaam uThā apnī surāhī saaqī

aaj hai gardish-e-daurāñ ke muqābil honā

ab kahe jaao fasāne mirī ġharqābī ke

mauj-e-tūfāñ ko mire haq meñ thā sāhil honā

qais lailā kī nazar se hī banā thā majnūñ

us kā achchhā hai pas-parda-e-mahmil honā

mast ulfat hoñ mirā naam hai dīvāna-e-husn

kaam hai hosh meñ aanā kabhī ġhāfil honā

kitnī ummīd se baḌhte haiñ musāfir ke qadam

qudratī hai ġham-e-nākāmī-e-manzil honā

aaj ke daur meñ kam baat nahīñ hai ye 'falak'

ek fan meñ kisī insān kā kāmil honā

meri hasti mein meri zist mein shamil hona

tujh ko ai husn mubarak ho mera dil hona

KHushk ho jaen jo aankhen to gham-e-furqat kya

chahiye aur bhi tar dida-e-bismil hona

us pe mushkil koi paD jae to aasan ho jae

hausla baKHshe jise kaam ka mushkil hona

la mera jam uTha apni surahi saqi

aaj hai gardish-e-dauran ke muqabil hona

ab kahe jao fasane meri gharqabi ke

mauj-e-tufan ko mere haq mein tha sahil hona

qais laila ki nazar se hi bana tha majnun

us ka achchha hai pas-parda-e-mahmil hona

mast ulfat hon mera nam hai diwana-e-husn

kaam hai hosh mein aana kabhi ghafil hona

kitni ummid se baDhte hain musafir ke qadam

qudrati hai gham-e-nakaami-e-manzil hona

aaj ke daur mein kam baat nahin hai ye 'falak'

ek fan mein kisi insan ka kaamil hona