parinde lauT ke jab ghar ko jaane lagte hain

parinde lauT ke jab ghar ko jaane lagte haiñ

hameñ bhī yaad dar-o-bām aane lagte haiñ

fasīl-e-sarhad-e-māzī dhaḌakne lagtī hai

jo ḳhvāb niiñd kā dar khaTkhaTāne lagte haiñ

hubāb dhuup kī bārish meñ phūTte bante

sabāt-e-zāt kā matlab batāne lagte haiñ

sar-e-mahāz tire aate hī harīf mire

ye mere haath mujhe āzmāne lagte haiñ

tire ḳhayāl kī mahfil jo sajne lagtī hai

qarīb-e-hāl guzishta zamāne lagte haiñ

jo āsmān ko zid hai to kam nahīñ ham bhī

ki bād-e-barq na.e ghar banāne lagte haiñ

jo sunte haiñ ki tire shahr meñ dashrā hai

ham apne ghar meñ divālī sajāne lagte haiñ

sunī-sunā.ī sī har ik kahānī lagtī hai

na.e haiñ lafz ma.ānī purāne lagte haiñ

parinde lauT ke jab ghar ko jaane lagte hain

hamein bhi yaad dar-o-baam aane lagte hain

fasil-e-sarhad-e-mazi dhaDakne lagti hai

jo KHwab nind ka dar khaTkhaTane lagte hain

hubab dhup ki barish mein phuTte bante

sabaat-e-zat ka matlab batane lagte hain

sar-e-mahaz tere aate hi harif mere

ye mere hath mujhe aazmane lagte hain

tere KHayal ki mahfil jo sajne lagti hai

qarib-e-haal guzishta zamane lagte hain

jo aasman ko zid hai to kam nahin hum bhi

ki baad-e-barq nae ghar banane lagte hain

jo sunte hain ki tere shahr mein dashra hai

hum apne ghar mein diwali sajaane lagte hain

suni-sunai si har ek kahani lagti hai

nae hain lafz maani purane lagte hain